ސިފައިންނާއި ފުލުހުން ގުޅިގެން ރ. މަޑުއްވަރީގައި މިހާރު ހިންގަމުން ގެންދާ ޚާއްސަ އޮޕަރޭޝަނުގެ ތެރެއިން ބަންދުކޮށްފައިވާ ތިން މީހުންގެ ބަންދުގެ މުއްދަތު މިއަދު ޖަހައިފިއެވެ.
އެ ތިން މީހުންގެ ބަންދާމެދު ގޮތެއް ނިންމަން މިއަދު ކޯޓަށް ގެންދިޔުމުން ކޯޓުންވަނީ ހޯމް މިނިސްޓްރީން ކަނޑައަޅާ ތަނެއްގައި ދިހަ ދުވަހު ބަންދުގައި ބައިތިއްބުމަށް މުއްދަތު ޖަހައިފައެވެ. އެހެންނަމަވެސް ސަލާމަތީ ސަބަބުތަކަށްޓަކައި ފުލުހުންވަނީ އެމީހުންނަށް މުއްދަތު ޖަހައިދިން ކޯޓު ސިއްރު ކޮށްފައެވެ. "މިފަހަރު ކޯޓު ހާމަނުކުރީ ސަލާމަތާއި ރައްކާތެރި ކަމަށް ބަލާފައި،" ފުލުހުންގެ ތަރުޖަމާނު ޗީފްއިންސްޕެކްޓަރ އޮފް ޕޮލިސް އިޒްމިއާ ޒާހިރު ވިދާޅުވިއެވެ.
މަޑުއްވަރީން އިއްޔެ ބަންދުކުރީ 30 އަހަރުގެ ފިރިހެނަކާއި، 34 އަހަރުގެ ފިރިހެނަކާއި 28 އަހަރުގެ ފިރިހެނެކެވެ. އެމީހުންނާ ބެހޭ އިތުރު އެއްވެސް އެއްޗެއް ފުލުހުން ހާމައެއް ނުކުރެއެވެ.
އިއްޔެ ހެނދުނުން ފެށިގެން ފުލުހުންނާއި ސިފައިން އެރަށުގައި ހަރަކާތްތެރިވަމުން ގެންދަނީ އެރަށުގައި ހަރުކަށި ފިކުރު ފަތުރައި، އަންހެނުންނާއި ކުޑަކުދީންނަށް ދޭންޖެހޭ ހައްގުތައް ނިގުޅައި، ކުދިންނަށް ވެކްސިން ނުދީ އަދި ކިޔަވައި ނުދިނުންފަދަ ކަންކަން ކުރަމުންދާ މީހުންގެ ގެތައް ބަލައި ފާސްކޮށް ބަންދުކުރަން ޖެހުނު ބަޔަކު ވިއްޔާ ބަންދުކުރުމަށެވެ.
ފުލުހުން އިއްޔެވަނީ އެރަށުން 6 ގެއަކާއި އެއް ދޯނި ބަލައިފާސްކޮށްފައެވެ. މި އޮޕަރޭޝަން އަންނަ ހަފްތާއާ ހަމައަށް ދެމިގެންދާނެ ކަމަށް ފުލުހުންވަނީ ވިދާޅުވެފައެވެ.
