ދެރަށެއްގެ ބިންހިއްކުމުގެ މަޝްރޫއުގެ ޑިޒައިނިން މަސައްކަތް ކުރުމާއި އީއައިއޭ ހެދުމުގެ މަސައްކަތް މިއަދު ކުންފުންޏަކާ ޙަވާލުކޮށްފިއެވެ.
އެދެރަށަކީ ރ. އަލިފުއްޓާއި ރ. ދުވާފަރެވެ. މި މަސައްކަތް ހަވާލުކޮށްފައި ވަނީ ލޭންޑް އެންޑް މެރިން އެންވަޔަރަންމެންޓަލް ގްރޫޕް ޕްރައިވެޓް ލިމިޓެޑް އިން އެސޯސިއޭޝަން ވިތު ރިޔަން ޕްރައިވެޓް ލިމިޓެޑާއެވެ.
މިމަސައްކަތް ނިންމުމަށް އެކުންފުންޏަށް ދީފައިވަނީ ދޮޅުހަސް ދުވަހެވެ. މަސައްކަތުގެ އަގަކީ 272،208 ރުފިޔާ އެވެ.
މި އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ ޑިރެކްޓަރ ޖެނެރަލް ފާތިމަތި ޝާނާ ފާރޫގެވެ. ލޭންޑް އެންޑް މެރިން އެންވަޔަރަންމެންޓަލް ގްރޫޕް ޕްރައިވެޓް ލިމިޓެޑް އިން އެސޯސިއޭޝަން ވިން ރިޔަން ޕްރައިވެޓް ލިމިޓެޑުގެ ފަރާތުން ސޮއިކުރެއްވީ ޑިރެކްޓަރ ޙުސައިން ސިމާދެވެ.
މީގެ އިތުރުން ލ. އިސްދޫ ބަނދަރު ހެދުމުގެ މަސައްކަތް ވަނީ އެމްޓީސީސީއާ ޙަވާލުކޮށްފައެވެ. އެކުންފުންޏާ އެމަސައްކަތް ޙަވާލުކޮށްފައިވަނީ 34 މިލިއަން ރުފިޔާއަށެވެ. މި މަޝްރޫއުގައި އެ ބަނދަރުގައި ބޮޑުހިލަ ބޭނުން ކޮށްގެން 160 މީޓަރުގެ ބޭރުތޮއްޓެއް ލުމާއި. ލުމާއި، 48 މީޓަރުގެ އެއްގަމު ތޮއްޓެއް ލުމާއި، 2 ނެރު ބައްތި ޖެހުމާއި ބަނދަރުގައި 12 ބައްތި ޖެހުމާއި، 98 މީޓަރގެ ރިވެޓްމެންޓެއް ޖެހުން ހިމެނެއެވެ.
ނެޝެނަލް ޕްލޭނިން މިނިސްޓްރީގައި ބޭއްވި ރަސްމިއްޔާތެއްގައި މި އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ ޑިރެކްޓަރ ޖެނެރަލް ފާތިމަތި ޝާނާ ފާރޫގެވެ. އެމްޓީސީސީގެ ފަރާތުން ސޮއިކުރެއްވީ ސީއޯއޯ ޝާހިދު ހުސެއިން މޫސާ އެވެ.
