ޕާކިސްތާނުގެ ކުރީގެ ރައީސު އަދި އަސްކަރީ ވެރިޔާ ޕަރްވޭޒު މުޝައްރަފުގެ މައްޗަށް މަރުގެ ހުކުމް އިއްވައިފިއެވެ. ޚާއްސަ ކޯޓަކުން އޭނާގެ މައްޗަށް ހުކުމް އިއްވާފައި ވަނީ ގައުމަށް ޣައްދާރުވުމާއި، ގާނޫނު އަސާސީގެ ބާރު ކަނޑުވާލުމުގެ ކުށުގައެވެ.
"ޕާކިސްތާނުގެ ގާނޫނު އަސާސީއާއި ޚިލާފުވެފައި ވާތީ 6 ވަނަ މާއްދާގެ ދަށުން މުޝައްރަފު ވަނީ ކުށްވެރިވެފައި." ޕާކިސްތާނު ސަރުކާރުގެ ލޯ އޮފިސަރ ސަލްމާން ނަދީމް ވިދާޅުވިއެވެ.
1999 ވަނަ އަހަރުގެ އޮކްޓޯބަރު މަހުގެ 13 ވަނަ ދުވަހު ގެންނެވި އަސްކަރީ އިންގިލާބުގައި އޭރުގެ ޖެނެރަލް ޕަރްވޭޒް މުޝައްރަފު ވެރިކަމާ ހަވާލުވެވަޑައިގެންނެވިއެވެ. އަދި ބޮޑު ވަޒީރު ނަވާޒޫ ޝަރީފު ގޭގައި ބަންދުކުރެއްވިއެވެ. އޮކްޓޯބަރު މަހގުެ 15 ވަނަ ދުވަހު މުޝައްރަފު ވަނީ ގާނޫނު އަސާސީއަށް އަމަލުކުރުން ހުއްޓަވާލައްވައި ކުއްލި ހާލަތު އިއުލާން ކުރައްވާފައެވެ.
ޕެޝާވަރު ހައިކޯޓުގެ ފަނޑިޔާރު ވަޤާރް އަޙްމަދު ސޭޓް އަކްބަރު، ލާހޯރު ހައިކޯޓުގެ ފަނޑިޔާރު ޝާހިދު ކަރީމް އަދި ސިންދު ހައިކޯޓުގެ ފަނޑިޔާރު ނަޒަރް އަކްބަރު ހިމެނިވަޑައިގަންނަވަ ޚާއްސަ ކޯޓުގެ ބެންޗަކީ ޕާކިސްތާން ސުޕްރީމް ކޯޓުގެ އަމުރަށް އެކުލަވައިލި ބެންޗެކެވެ.
މި ބެންޗުން މިއަދު ހުކުމް އިއްވީ 2 ފަނޑިޔާރުންގެ އަޣުލަބިއްޔަތުންނެވެ. އެއް ފަނޑިޔާރަކު ދެކޮޅު ހެއްދެވިއެވެ. ޕާކިސްތާނުގެ ގާނޫނު އަސާސީ ބުނާ ގޮތުން ގައުމަށް ޣައްދާރުވުމުގެ ކުށް މީހެއްގެ މައްޗަށް ސާބިތުވެއްޖެނަމަ އޭނާ މެރުމަށް ހުކުމްކުރެވިދާނެއެވެ.
ޕަރްވޭޒް މުޝައްރަފު މިހާރު ދިރިއުޅުއްވަމުން ގެންދަވަނީ ޔޫއޭއީގެ ދުބާއީގައެވެ. ޝަރީއަތަށް ހާޒިވެވަޑައިގަތުމަށް ތަކުރާރުކޮށް އެންގުމުންވެސް އޭނާ ވަނީ އެކަމަށް ދެކޮޅުހައްދަވާފައެވެ.
1964 ވަނަ އަހަރު ޕާކިސްތާނުގެ އަސްކަރިއްޔާއާ ގުޅިވަޑައިގަތުމަށް ފަހު، އަވަސް ކުރިއެރުންތަކެއް ހޯއްދަވައި 1998 ވަނަ އަހަރު ސިފައިންގެ އިސްވެރިޔާގެ މަގާމަށް ވަޑައިގެންނެވި ޕަރްވޭޒް މުޝައްރަފު އުފަންވެވަޑައިގަތީ އިނގިރޭސިންގެ ވެރިކަމުގެ ދަށުގައި އޮތް އިންޑިޔާގެ ދިއްލީއަށް 1934 ވަނަ އަހަރުއެވެ. އިންޑިޔާ ބައިކޮށް ޕާކިސްތާނު އުފެދުމުން މުޝައްރަފުގެ އާއިލާ ވަނީ ޕާކިސްތާނަށް ހިޖުރަކޮށްފައެވެ.
2008 ވަނަ އަހަރާ ހަމައަށް ޕާކިސްތާނުގެ ރައީސުކަން ކުރެއްވި ޕަރްވޭޒް މުޝައްރަފަށް ވެރިކަން ގެއްލުނީ އެއަހަރުގެ އޮގަސްޓް މަހު 7 ވަނަ ދުވަހު އޮތް އާއްމު އިންތިޚާބުގައި އިދިކޮޅު ޕާޓީތަކުން ހޯދި ކާމިޔާބީއާ ގުޅިގެން އޮގަސްޓް މަހުގެ 18 ވަނަ ދުވަހު ރައީސުކަމުން އިސްތިއުފާދެއްވަން މަޖުބޫރުވެވަޑައިގަތުމުންނެވެ.
