އދ. ގެ ސަލާމަތީ މަޖިލީހުން އުތުރު ކޮރެޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ތެރެއިން ބައެއް އުވާލައި، އެ ފިޔަވަޅުތަކަށް ލުޔެއް ދިނުމަށް ގޮވާލާ ގަރާރެއް ޗައިނާއާއި ރަޝިޔާ ގުޅިގެން ސަލާމަތީ މަޖިލީހަށް ހުށަހަޅައިފިއެވެ.
ދެކޮރެޔާ ދެމެދުގައި ކުރެވޭ ރޭލުގެ ޚިދުމަތާއި، އުތުރު ކޮރެޔާގައި މަގުހެދުމުގެ މަޝްރޫއުތައް ދަތިކުރުމުގެ ފިޔަވަޅުތަކުން އިސްތިސްނާކުރުމަށާއި، ސަލާމަތީ މަޖިލީހުން އަޅާފައިވާ ފިޔަވަޅުތަކުގެ ތެރެއިން އާއްމު ދިރިއުޅުމުގެ ކަންކަމާ ގުޅިފައިވާ ފިޔަވަޅުތައް އުވާލުމަށް އެގަރާރުގައި ގޮވާލާފައި ވެއެވެ.
ކަނޑު މަހާއި، ފަރުމަހުގެ ބާވަތްތަކާއި، އަންނައުނާއި، ބުދު ފަދަ ތަކެތި ބޭރުން ކުރުން މަނާކޮށްފައި އޮތް އޮތުން ނިމުމަމަކަށް ގެނައުމަށްވެސް ގޮވާލާފައި ވެއެވެ.
"މަޝްވަރާކޮށްގެން ފުރިހަމަ، ސުލްހަވެރި ހައްލަކާއި ހަމައަށް ވާސިލުވުމުގެ ބޭނުމުގައި 'ހަ ފަރާތް އެކުލެވޭ' މަޝްވަރާތައް ނުވަތަ އެއުސޫލުން ކުރެވޭ ގިނަ ފަރާތްތައް އެކުލެވޭ މަޝްވަރާތައް ވީހާ އަވަހަކަށް ފެށުމަށް" ވެސް ގަރާރުގައި ވަނީ ގޮވާލާފައެވެ.
މީގެ އިތުރަށް، އުތުރު ކޮރެޔާގެ މަސައްކަތްތެރިން ގައުމުން ބޭރުގައި މަސައްކަތްކުރުން މަނާކޮށްފައި އޮތުމާއި، މިހާރު ގައުމުން ބޭރުގައި ތިބި އެފަދަ މީހުން އަންނަ ހަފުތާގެ ނިޔަލަށް އަނބުރާ ފޮނުވާލުމަށް އަންގާފައިވާ އެންގުން އުވާލުންވެސް ގަރާރުގައި ހިމަނާފައި ވެއެވެ.
މި ގަރާރު ހުށަހެޅުމާ ގުޅިގެން ގަރާރާ ގޮޅޭ ގޮތުން މެންބަރު ގައުމުތަކުގެ މެދުގައި މިއަދު ނުރަސްމީ މަޝްވަރާތައް ފަށާނެއެވެ. އެހެންނަމަވެސް ގަރާރަށް ވޯޓަށް އަހާނެ ދުވަހެއް އަދި ހަމަޖެހިފައި ނުވެއެވެ. ގަރާރު ފާސްވާނީ ސަލާމަތީ މަޖިލީހުގެ 15 މެންބަރުންގެ ތެރެއިން ވީޓޯކުރުމުގެ ހައްގު ލިބިގެންވާ އެމެރިކާ، ރަޝިޔާ، އިނގިރޭސިވިލާތް، ފްރާންސް އަދި ޗައިނާ، މި ފަސް ގައުމުން ކުރެ ގައުމެއް ވީޓޯ ނުކޮށް، ޖުމްލަ 9 މެންބަރުންގެ ވޯޓު ލިބިގެންނެވެ.
ސަލާމަތީ މަޖިލީހުގެ ދާއިމީ މެންބަރުންގެ ތެރެއިން އެމެރިކާއާއި، އިނގިރޭސިވިލާތާއި، ފްރާންސުން ދަނީ އުތުރު ކޮރެޔާއިން ނިއުކުލިޔާ ހަތިޔާރު އުފެއްދުމުގެ މަސައްކަތް ހުއްޓާނުލަނީސް ދަތިކުރުމުގެ ފިޔަވަޅުތައް އުވާލުމަށް ދެކޮޅުހަދަމުންނެވެ.
