އެމެރިކާއިން ތުރުކީއާ ދެކޮޅަށް ދަތިކުރުމުގެ ފިޔަވަޅު އަޅައިފިއްޔާ، އެ ގައުމުއި އެމެރިކާ ސިފައިން ބޭނުންކުރާ އިންޗަރްލިކް ވައިގެ މަރުކަޒު ބަންދުކުރަން ޖެހިދާނެ ކަމުގެ އިންޒާރު ރައީސު ރަޖަބް ޠައްޔިބް އެރްދޮޣާން ދެއްވައިފިއެވެ.
"އެކަން ކުރަން ޖެހިއްޖެ ނަމަ، އަހަރުމެންގެ ހުރިހާ ފަރާތަކާ އަހަރުމެން ވާހަކަ ދައްކާނަން. އަދި ބަންދުކުރަން ޖެހިއްޖެ ނަމަ އަހަރުމެނަށް އިންޗަރްލިކް (އަދަނާ ޕްރޮވިންސުގެ ދެކުނުގައި އޮންނަ ވައިގެ މަރުކަޒު) އަދި ކޫރެޗިކް (މަލަޓްޔާ ޕްރޮވިންސުގެ އިރުމަތީގައި ހުންނަ ރާޑަރު ސްޓޭޝަން) ބަންދުކުރެވިދާނެ." އަހަބަރް ޓީވީ ޗެނަލަށް ދެއްވި ބަސްދީގަތުމެއްގައި ރައީސު އެރްދޮޣާން ވިދާޅުވިއެވެ. އިންޗަރްލިކް ވައިގެ މަރުކަޒަކީ އެމެރިކާއިން ނިއުކުލިޔާ މިސައިލް ބަހައްޓާފައި ހުރި މަރުކަޒެކެވެ.
"އެފަދަ ފިޔަވަޅެއް އަހަރުމެން އަޅަން ޖެހިއްޖެއްޔާ، ހަމަ ޔަގީނުންވެސް، އަހަރުމެންނަށް އެ ބާރު އެބައޮތް." އެރްދޮޣާން ވިދާޅުވިއެވެ.
ތުރުކީއާ އެމެރިކާއާ ދެމެދު ފަހަކަށް އައިސް ތަފާތު މައްސަލަތަކުގެ ސަބަބުން ގުޅުން ގޯސްވެފައި ވެއެވެ. ރަޝިޔާގައި އުފައްދާ ވައިގެ ދިފާއީ ނިޒާމު އެސް-400 ތުރުކީއަށް ގަތުމުންވެސް ދަތިކުރުމުގެ ފިޔަވަޅު އަޅާނެ ކަމުގެ އިންޒާރު އެމެރިކާއިން ދިނެވެ. ސީރިޔާގެ އުތުރުގައި ހަރަކާތްތެރިވާ ކުރުދީ ހަނގުރާމަވެރި ޖަމާއަތް، ޕީޕަލްސް ޕްރޮޓެކްޝަން ޔުނިޓްސް (ވައިޕީޖީ) އަށް އެމެރިކާއިން ތާއީދުކުރުން ހިމެނެއެވެ. ވައިޕީޖީ އަކީ ތުރުކީން ޓެރަރިސްޓު ޖަމާއަތެއް ކަމުގައި ބަލާ ޖަމާއަތެކެވެ.
އެންމެ ފަހުން ގުޅުން ގޯސްވެގެން ދިޔަ މައްސަލައަކީ އުސްމާދީ ދައުލަތުގެ ސަރަހައްދުގައި ތިބި އަރްމީނިޔާ މީހުން ބޭރުކޮށްލަން 1915 ވަނަ އަހަރު ތުރުކީގައި އޮތް އުސްމާނީ ދައުލަތުން ހިންގި އޮޕަރޭޝަނަކީ 'ނަސްލު ނައްތާލުމުގެ' އަމަލެއް ކަމަށް ކަނޑައަޅައި އެމެރިކާގެ ކޮންގްރެސްއިން ގަރާރެއް ފާސްކުރުމުމެވެ.
ތުރުކީން ވަނީ މި ގަރާރު އަނބުރާ ގެންދިއުމަށް ގޮވާލާފައެވެ. އަދި ރައީސު އެރްދޮޣާން ވިދާޅުވެފައި ވަނީ ގަރާރު އަނބުރާ ނުގެންގޮސްފިނަމަ، އެމެރިކާއިން ރެޑް އިންޑިޔަނުންނާ ދެކޮޅަށް ހިންގާފައި ވަނީ ނަސްލު ނައްތާލުމުގެ އަމަލެއް ކަމަށް ނިންމައި ތުރުކީގެ ގާނޫނުހަދާ މަޖިލީހަށްވެސް ގަރާރެއް ފާސްކުރެވިދާނެ ކަމުގައެވެ.
