ރާއްޖޭގެ އެކިސަރަޙައްދުތަކުން ފަތުރުވެރިކަމަށް އަލަށް ދޫކުރާ ރަށްތައް މާދަމާރޭ އިޢުލާން ކުރައްވާނެ ކަމަށް ޓޫރިޒަމް މިނިސްޓަރ ޢަލީ ވަޙީދު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ކްރޮސް ރޯޑްގައި މިހާރު ކުރިއަށްދާ "ވިއަވަތި ރާއްޖެ" ކޮންފަރެންސްގައި ވާހަކަ ދައްކަވަމުންނެވެ.
އަލަށް ފަތުރުވެރިކަން ތަޢާރާފުކުރުމަށް 12 އަތޮޅުން ރަށްތައް ކަނޑައެޅޭއިރު، 8000 އެނދު ތަރައްޤީ ކުރެވި 18 ހާސް ވަޒީފާ އުފެދިގެންދާނެކަމަށް ވެސް މިނިސްޓަރ ވިދާޅުވިއެވެ. މިހާރު ވަނީ ކަނޑއެޅިފައިވާ ރަށްތަކުގެ އެމްވަޔަރުމަންޓް އެސެސްމަންޓާއި ރައްޔިތުންގެ ސޯޝަލް އިކޮނިމިކްސް އެސެސްމަންޓް ވެސް ހައްދަވައިފައި ކަމަށް މިނިސްޓަރ ޢަލީ ވަހީދު ފާހަގަ ކުރެއްވިއެވެ.
ފަތުރުވެރިކަމަށް އަލަށް ދޫކުރާ ރަށްތައް ކަނޑައެޅުމުގައި އެންމެ އިސްކަމެއް ދެއްވައިފައިވަނީ ރާއްޖޭގެ އުތުރާއި ދެކުނުން ރަށްތައް ދޫކުރުމަށެވެ. އަލަށްދޫކުރެވޭ ރަށްތަކަކީ ރިޔާސީ އިންތިޚާބަށް ވެވަޑައިގެންނެވި ވަޢުދާ އެއްގޮތަށް ފުރަތަމަ ފަހަރަށް ދޫކުރެވޭ ރަށްތައްކަމަށް ޓޫރިޒަމް މިނިސްޓަރ ވިދާޅުވިއެވެ.
"މީގެ ތެރޭގައި ރައިސްގެ މެނިސްފެސްޓޯ އަދި ކެމްޕޭނަށް ވަޑައިގެން ވިދާޅުވެވުނު އެއްޗެއްވިއަސް އަޅުގަނޑުމެން ވާނީ ހިމަނައިފައި. މިއީ އިންތިޚާބަކަށް ވަޢުދެއްވެ ވަޢުދާ އެއްގޮތަށް އެކުލަވާލައްވައިފައިވާ ލިސްޓެއް" ޓޫރިޒަމް މިނިސްޓަރ ވިދާޅުވިއެވެ.
އަންނަ އަހަރުން ފެށިގެން އަލަށް ރިސޯޓުތައް ހުޅުވާއިރު، އެތަންތަނަށް ބޭނުންވާ މުވައްޒަފުން މާލެއަށް ނުގޮސް އެރަށްރަށުގެ ކައިރީގައި ތަމްރީންކުރެވޭނެ އިންތިޒާމު ހަމަޖެހިގެންދާނެ ކަމަށްވެސް ކޮންފަރެންސްގައި ވާހަކަދައްކަވަމުން މިނިސްޓަރ ޢަލީ ވަހީދު ވިދާޅުވިއެވެ. ތަމްރީނުތައް ކުރިއަށް ދާނީ ސަރުކާރާއި އެވިޔަފާރިވެރިޔަކާ ގުޅިގެން މީހުން ދިރިއުޅޭ ރަށްރަށުގައި ކަމަށް މިނިސްޓަރ ފާހަގަކުރެއްވިއެވެ.
