އަޅުގަނޑުމެން އާދައިގެ ޢާއްމު ސިކުނޑީތަކުން ވިސްނާއިރު ޑިމޮކްރެސީގެ ބޭނުމަކަށް ވާނީ ރައްޔިތުންނަށް ފަސޭހައާއި ފާގަތިކަމާއި ކުރިއެރުން ހޯދައިދިނުމެވެ. އެ މީހުންނަށް ލުއި ފަސޭހަ ޚިދުމަތްތައް ފަހިކޮށްދިނުމެވެ. ލާބައާއި މަންފާ ހޯދައިދިނުމެވެ. ހަމަހަމަކަމާއި އަމާންކަން ޤާއިމުކޮށްދިނުމެވެ. މިއަދު ޓެކްނޯލޮޖީގެ ރޮނގުން ދުނިޔެ މިހާ ބޮޑަށް ކުރިއަރައިފައިވަނީ ވެސް އިންސާނުންނަށް ލުއި ފަސޭހަ ގޮތްތައް ހޯދާން ކުރި މަސައްކަތުގެ ތެރެއިންނެވެ. މިކަން މި މަގަށް ނިހިނގާނަމަ ޑެމޮކްރެސީއެއް ނުވަތަ ޓެކްނޯލޮޖީއެއްގެ ބޭނުމެއް ނުވިސްނެއެވެ.
މިއަދު ދިވެހިރާއްޖެއިން ވެސް މި ވަނީ ޓެކްނޮލޮޖީގެ ބޭނުން، ފުޅާ ދާއިރާއެއްގައި ކުރާން ފަށައިފައެވެ. އިންޓަރނެޓަކީ މިއަދު އަސާސީކަމަކަށް ވަނީ ވެފައެވެ. މީސްމީޑިއާގެ ވަސީލަތްތަކާ ނުލައި މިއަދު ދިރިއުޅުން މި ވަނީ ދަތި އުނދަގޫކަމަކަށް ވެފައެވެ. މީހުން އެހާ ސްމާޓް ނުވިޔަސް، ސްމާޓް ފޯނެއް އަތުގައި ނެތް މީހެއް، ހަމަ ވަރަށް ނުފެންނާނެއެވެ. މި ހުރިހާ ކަމެއް މިހާ ބޮޑަށް ކުރިއަރައިގެން އައިސްފައި ވިޔަސް، ބައެއް ޚިދުމަތްތައް ހަމަ ކުރިން ވެސް އޮންނަ ގޮތަށް ބަދަލެއް ނެތި ކުރިޔަށް އެބަ ދެއެވެ. އެންމެ "ބޯދާ" ގޮތަށެވެ. މި ކަމާ މެދު ބަޔަކު ވިސްނާހެނެއް ވެސް ހިޔެއް ނުވެއެވެ. ހަމަ އިހަށް ވެސް ކުރާ ގޮތަށް ކޮށްލަކޮށްލައި ތިބެނީކަމަށް ވެދާނެއެވެ. އެއީ އެކަން އޮންނާނެ ގޮތް ކަމަށް ގަބޫލުކޮށްގެންނެވެ. ނަމަވެސް އެކަން އެ ގޮތަށް އޮންނާންޖެހޭނެކަމަކަށް އަޅުގަނޑުމެން ޢާއްމު ރައްޔިތުންނަކަށް ނުވިސްނެއެވެ.
އަޅުގަނޑު ދަންނަވާން މި އުޅެނީ ވަރަށް ގިނަ ކަންތައްތަކެއްގެ ވާހަކައެވެ. ނަމަވެސް ހަމަ އެންމެ ކަމެއް ފާހަގަކޮށްލައިގެން ފުއްދައިލާނަމެވެ. ދައުލަތުގެ އެކި މަޤާމުތަކަށް، ޚާއްޞަކޮށް އިސް މަޤާމުތަކަށް އެދި ހުށަހަޅާއިރު އެ މީހެއްގެ ދަރަންޏާއި ކުށުގެ ރެކޯޑް ދައުލަތުގެ އެކި މުއައްސަސާއަކުން ސާފުކޮށް ފޯމެއް ފުރާން އެބަޖެހެއެވެ. މި ކަން ކުރާންޖެހެނީ ކުރު މުއްދަތެއްގައި އެކި ތަންތަނަށް ވަކިވަކީން ހިނގައިގެންނެވެ. މި ކަމަށްޓަކައި ފުރާންޖެހޭ ފޯމު، ބައެއް މުއައްސަސާތަކުގައި "ނިންދަވާން" ވެސް ޖެހެއެވެ. މިހާ ހާލުން މި ފޯމު ފުރައިގެން ހުށަހެޅިޔަސް އޭނާގެ ނަން، ކަމާބެހޭ ފަރާތަކަށް ފޮނުއްވާނެ ކަމުގެ ޔަގީންކަމެއް ނޯވެއެވެ. ނުވަތަ މިސާލަކަށް އެ ނަމެއް ފޮނުވިޔަސް އެ މަޤާމަކަށް އެމީހަކު ހަމަ ނުޖެހުނީއެވެ. ދެން އަނެއްކާ ޖެހިގެން އަންނަ ދުވަހު ހަމަ އޭނާ އެހެން މަޤާމަކަށް އެދި ހުށަހެޅިޔަސް، އަލުން އެ ފޯމު ފުރާން އެއްކަލަ ހުރިހާ އިދާރާއަކަށް ހިނގާންޖެހެއެވެ. މިކަން އަޅުގަނޑަށް ވަނީ ވަރަށް ހެއްވާ ކަމަކަށެވެ. މަޢާފުކުރައްވާށެވެ! މިދެންނެވީ އަޅުގަނޑު ދެކޭ ގޮތެވެ.
ދައުލަތުގެ އެންމެ މަތީ އިދާރާއިން މަޤާމަކަށް އެދި ހުށަހަޅާން ކުރައްވާ އިޢުލާނަކާ ގުޅިގެން ކުރިމަތިލާ މީހުންގެ ކުށުގެ ރެކޯޑެއް އޮތްތޯ އެ އިދާރާއަކުން ހޯއްދަވާން މާ ފަސޭހަފުޅު ނުވާނެތޯއެވެ؟ މީގެ އިތުރަށް ސިޔާސީ ޕާޓީއެއްގެ މެންބަރެއްތޯ ނޫންތޯ ސާފުކުރާ ފޯމެއް ވެސް ބައެއް މަޤާމުތަކާ ގުޅިގެން އޮވެއެވެ. މިކަން ސާފުކުރައްވަން ހަމަ އެ މީހެއްގެ އައިޑީ ނަމްބަރު އެސްއެމްއެސް އަކުން ވެސް އެ އިދާރާއަކަށް ސާފުކޮށްލެއްވޭނެއެވެ. އެކަމަކު މި ފޯމެއްވެސް އެ މީހަކު ތަންތަނަށް ހިނގައިގެން ފުރާންޖެހެއެވެ.
މިދެންނެވި ކަންކަން ދައުލަތުގެ އިދާރާއަކުން ސާފުކުރައްވާ ގޮތަށް އޮންނަ ނަމަ އަދި ޚާއްޞަކޮށް ދައުލަތުގެ އެންމެ މަތީ އިދާރާއިން އެކަން ސާފުކުރައްވާން އުޅުއްވައިފި ނަމަ، ހަމަ ވަގުތުން ވަގުތަށް އެ ރެކޯޑްތައް ސާފުކުރެއްވޭނެއެވެ. އެކަމުގެ ފޯމު ފުރާން ޢާއްމު އާދައިގެ ރައްޔިތަކު އުފުއްލާންޖެހޭ ތަކްލީފެއް އުފުއްލާކަށް ޖެހިވަޑައެއް ނުގަންނަވާނެއެވެ. އަދި އެކަމުގެ ސަބަބުން ދައުލަތުގެ އިދާރާތަކަށް ވެސް ވަރަށް ބޮޑު ލުޔެއް ލިބޭނެއެވެ. އެހެނީ ރެކޯޑް ސާފުކުރާން އަންނަ މީހުންގެ ފޯމުތައް ބަލައިގަނެ ފޯމުތަކުގެ ރެކޯޑް ބަލަހައްޓައި ނަންބަރު ދޫކޮށްގެން އެކި މީހުންނަށް ވަކިވަކީން ފޯމުގައި ސޮއިކޮށް ތައްގަނޑު ޖަހައި ވަކިވަކީން ދޫކުރާކަށް ނުޖެހޭނެއެވެ.
މިއީ ކަމަކަށް އެދޭ މީހާ ކުރާންޖެހޭ ގޮތަށް ހަމަކޮންމެހެން ބާއްވާން ބޭނުންފުޅުވާ ކަމެއް ނަމަވެސް، އެއް އިދާރާއަކުން (މިސާލަކަށް ދިވެހި ފުލުހުންގެ ޚިދުމަތުން) އެކަން ކުރެވޭނެ ލުއި ފަސޭހަ ގޮތެއް އިންތިޒާމުކުރެއްވިދާނެއެވެ. މި ފަދަ ޓެކްނޮލޮޖީގެ ޒަމާނެއްގައި އެންމެ އިހު ޒަމާނުގައި ކަންކުރި ބީދައިން ހުރިހާ އިދާރާއަކަށް ވަކިވަކީން ހިނގައި އެކަން ކުރާންޖެހޭ ގޮތަށް އޮތުމަކީ ހަމަޖެހޭ ގޮތެއްކަމަކަށް އަޅުގަނޑަކަށް ނުވިސްނެއެވެ. އަދި ހަފުތާއަކު އެއް ފަހަރު ކުށުގެ ރެކޯޑް ސާފުކުރުމަކީ ކޮން ބޭނުމެއް އޮތް ކަމެއް ތޯއެވެ؟ މިހެން މި ދެންނެވީ އެއް އިދާރާއަކަށް ދެ މަޤާމަކަށް ކުރިމަތިލާން އެދި ހުށަހެޅިޔަސް އެ ހުށައަޅާ ކޮންމެ ފޯމަކާ އެކީ އެ މަޤާމެއްގެ ކުށުގެ ރެކޯޑް ފުރިހަމަ ކޮށްފައި ހުށައަޅާން ލާޒިމުކޮށްފައި އޮންނާތީއެވެ. މިއީ ދައުލަތުން ވިސްނައިވަޑައިގަންނަވާން ވެއްޖެ ކަމެއްކަން ކަށަވަރެވެ. ނުވަތަ ޓެކްނޯލޮޖީ ކިތަންމެ ވަރަކަށް ކުރިއަރައިގެން އަތްނުފޯރާހާ އުހަށް އެރިޔަސް މި ކަން ބާއްވާންވީ، މިއީ ހަމަ އޮންނަ ގޮތޭ ވިދާޅުވެ 1960ގެ އަހަރުތަކުގައި ވެސް އޮންނަ ގޮތަށްތޯއެވެ!
މިއަދު އިންފޮމޭޝަން ޓެކްނޯލެޖީގެ ދާއިރާއަށް ޚާއްޞަވެފައިވާ ވަކި ވުޒާރާއެއް ވެސް އެބަ ހުރެއެވެ. މިނިސްޓްރީގެ ހަމަ ކުޑަކުޑަ މަސައްކަތްޕުޅަކުން މި ކަން އިޞްލާޙުކޮށްލެއްވިދާނެ ކަމަށް އަޅުގަނޑު ދެކެމެވެ. ޓެކްނޮލޮޖީ ކުރިއަރައިގެން ގޮސް، ކޮންމެ މީހެއްގެ އަތުގައި އޮންނަ އަތު ފޯނުން އިނގިލީގެ ކުރިން ފައިސާގެ ބޮޑެތި މުޢާލަމާތްތައް ހިންގައި، ގޭގެ ބިލުތައް ދައްކައި ހެދޭ ވަރަށް ޚިދުމަތް މިވަނީ ކުރިއަރައިފައެވެ. ނަމަވެސް ކުށުގެ ރެކޯޑް ސާފުކުރުމުގައި އަދި ވެސް މި އޮންނަނީ އެންމެ އިހު ޒަމާނުގެ "ބޯދާ" ގޮތެވެ. ވީމާ، ދައުލަތުގެ އިދާރާތަކުން ދެއްވާ ޚިދުމަތްތަކުގައި "ރައްޔިތުންނަށް ލުއިފަސޭހަ ކުރައްވާކަށް ވިސްނައިވަޑައެއް ނުގަންނަވަންތޯ" މިއީ އަޅުގަނޑުގެ ހިތުގައި އުފެދިފައިވާ ސުވާލަކަށް ވާތީ ހަމަ ޙިއްޞާކޮށްލާހިތްވީއެވެ. ކަމާ ބެހޭ އެންމެހައި އިދާރާތަކުން މިކަމަށް ނަޒަރެއް ދެއްވާނެ ކަމުގެ އުއްމީދުގައެވެ.
