އިނގިރޭސިވިލާތުގެ އެންމެ ބޮޑު އެއް ސިޔާސީ ޕާޓީ، ކޮންޒާވެޓިވް ޕާޓީ އަށް އެ ޕާޓީތެރޭގައި އާއްމުވަމުންދާ އިސްލާމްދީނަށް ނަފުރަތުކުރުމާއި، އެހެން މީހުންގެ ހިތްތަކުގައި އެދީނަށް ނަފުރަތު އުފައްދަން މަސައްކަތްކުރުމުގެ އޮއިވަރު މައިތިރި ކުރެވިފައިވާ ނުވާތީ އެކަމުގެ ފާޑުކިއުންތައް އެ ޕާޓީއަށް އަމާޒުވަމުން އެބަދެއެވެ.
ކުއްލި ގޮތަކަށް ބާއްވާ އަވަސް އާއްމު އިންތިޚާބަށް ދެދުވަހަށް ވެފައި ވަނިކޮށް، ތުރުކީގެ އަނަޑޯލޫ ނިއުސް އެޖެންސީއަށް ދެއްވި ބަސްދީގަތުމެއްގައި ކޮރްޑޮބާ (ޤުރްޠުބާ) ފައުންޑޭޝަންގެ ބާނީ އަދި ސީއީއޯ އަނަސް އައްތިކްރީތީ ވިދާޅުވީ އިސްލާމްދީނަށް ނަފުރަތުކުރުމާއި، ނަފުރަތު އުފެއްދުމުގެ އޮއިވަރު އެޕާޓީއަށް ނުހުއްޓިއްޖެނަމަ، އިނގިރޭސި މުޖްތައުގެ ތެރޭގައި، އަދި ތާރީޚު ފޮތްތަކުގައިވެސް، އެ ޕާޓީ ކުށްވެރިކުރެވޭނޭ ކަމުގައެވެ.
"ކޮންޒާވެޓިވް ޕާޓީން އިސްލާމްދީނާމެދު ނަފުރަތުއުފެއްދުމަށް ޖާގަދޭ ކަމާއި، މުޖުތަމައުގައި އެކަން އާލާވުމަށް ދޫކޮށްލާފައިވާ ކަމާއި، ނަސްލީ އިމްތިޔާޒުގެ ތެރޭގައި ހިމެނޭ މިއަމަލު މުޖުތަމައުން ނައްތާލުމަށް އެ ޕާޓީން މަސައްކަތް ނުކުރާ ކަމީ ގިނަ މުސްލިމުން ވަރަށް ސާފުކޮށް ދަންނަ ހަގީގަތެކެވެ." މުސްލިމް ކައުންސިލް އޮފް ބްރިޓަން (އެމްސީބީ) އިން ނެރުނު ބަޔާނެއްގައި ވެއެވެ.
ކުރީގެ ބޮޑުވަޒީރު ޑޭވިޑް ކެމަރަންގެ ދައުރުގައި 2012 އިން 2014 އަށް ސީނިއަރ މިނިސްޓަރ އޮފް ސްޓޭޓް ފޯ ފެއިތު އެންޑް ކޮމިއުނިޓީސްގެ މަގާމު އަދާކުރައްވާފައިވާ ބެރޮނެސް ސައީދާ ވާރްސީއަކީ ކޮންޒާވެޓިވް ޕާޓީގައި ހިމެނިވަޑައިގަންވާ މުސްލިމް އިސް ބޭފުޅެކެވެ. އޭނާ ވިދާޅުވި ގޮތުގައި އިސްލާމްދީނަށް ނަފުރަތުކުރުމުގެ މައްސަލައަށް ޕާޓީ ތެރެއިން ނިމުމެއް ގެނައުމަށް ފާއިތުވި 4 އަހަރު އޭނާ ކުރެއްވި މަސައްކަތްޕުޅަށް ޕާޓީން އެދެވޭ އިޖާބައެއް ދީފައި ނުވެއެވެ.
"މި މައްސަލަ (ކޮންޒާވެޓިވް ޕާޓީގެ ތެރޭގައި އޮތް އިސްލާމްދީނަށް ނަފުރަތު ކުރުމުގެ މައްސަލަ) ވެފައި މިވަނީ ޖަޒުބާތާއި ގުޅިފައިވާ މައްސަލައަކަށް. އިހްސާސު ވަނީ އަހަރެން މިހާރު އުޅެމުން މިދަނީ، އަހަރެން އެމީހަކާއެކު އުޅެން ނުޖެހޭ އަނިޔާކުރާ ފިރިޔައާއެކު ކަމަށް. ކޮންޒާވެޓިވް ޕާޓީގައި އަހަރެން މިހާރު ހުރުމަކީ މާ ރަނގަޅު ކަމަކަށް ނުވޭ." އިނގިރޭސި ނޫހަކާ ވާހަކަފުޅު ދައްކަވަމުން ވާރްސީ ވިދާޅުވިއެވެ.
އިނގިރޭސިވިލާތުގެ އެންމެ މަގުބޫލު އެއް ނޫސް 'ދަ ގާޑިއަން" ފާއިތުވި ނޮވެންބަރު މަހު ހާމަކޮށްފައިވާ ގޮތުގައި ކޮންސާވެޓިވް ޕާޓީގެ މަދުވެގެން 20 ކައުންސިލަރުން އިސްލާމްދީނާމެދު ނަފުރަތު އުފައްދާ ލިއުންތައް މީސްމީޑިޔާގައި ލިއުއްވައި ނުވަތަ ޝެއާ ކުރައްވާފައި، ނުވަތަ އެފަދަ ލިއުންތަކަށް ތާއީދުކުރައްވާފައިވާ ކަމުގެ ހެކިތައް އެ ނޫހަށް ވަނީ ލިބިފައެވެ.
މި މައްސަލަތައް ފެންމަތިވުމާ ގުޅިގެން ކޮންޒާވެޓިވް ޕާޓީގެ ޗެއާމަން ޖޭމްސް ކްލެވަލީ ވަނީ އޭނާގެ ޕާޓީގެ ތެރޭގައި އިސްލާމްދީނަށް ނަފުރަތު ކުރުން އޮތް ކަމަށްޓަކާ "ހިތާމަ ފާޅުކުރާ" ކަމަށް ވިދާޅުވެފައެވެ. އަދި އެ މައްސަލަތައް ބައްލަވައި ފިޔަވަޅު އަޅުއްވާނެ ކަމުގެ "ޔަގީންކަން" ދެއްވާފައެވެ.
މިހާރުގެ ބޮޑުވަޒީރު ބޮރިސް ޖޮންސަން އަކީވެސް އިސްލާމްދީނާމެދު ނަފްރަތު އުފެދޭ ވާހަކަތައް ދައްކަވާފައިވާ ބޭފުޅެއްކަން ފާހަގަކޮށްލަން ޖެހެއެވެ.
