ކުރީގެ ހައުސިން މިނިސްޓަރ ޑރ. މުޙައްމަދު މުޢިއްޒާ ދެކޮޅަށް ޖިނާއީ ތަޙުޤީޤެއް ހިންގަވައި ދެއްވުމަށް ދައުލަތުގެ ބަންޑާރަ ނާއިބުގެ އޮފީހުން މޯލްޑިވްސް ޕޮލިސް ސަރވިސްގައި މިއަދު އެދިވަޑައިގެންފިއެވެ.
ބާންޑާރަނާއިބުގެ އޮފީހުން މިކަމަށް އެދިވަޑައިގެންނެވީ ނޫމަޑި ރިސޯޓްސް އެންޑް ރެސިޑެންސް އޭޖީ (ނޫމަޑި) އިން ދިވެހި ސަރުކާރުގެ މައްޗަށް ހުށަހެޅި އާބިޓްރޭޝަން މައްސަލައިގައި ޑރ. މުޢިއްޒު ޢަމަލުކުރެއްވި ގޮތާ ގުޅިގެންނެވެ.
ނޫމަޑީގެ ފަރާތުން ދިވެހި ސަރުކާރާ ދެކޮޅަށް ހެއްކެއްގެ ގޮތުގައި ޑރ. މުޙައްމަދު މުޢިއްޒު ހުށަހަޅައި، ސަރުކާރާ ދެކޮޅަށް އާބިޓްރޭޝަންގައި އޭނާ ވަނީ ބަޔާން ދެއްވައިފައެވެ. އެހެންނަމަވެސް ވަޒީރުކަމުގައި އޭނާ ވަނީ އެ މައްސަލާގައި ދައުލަތް ދިފާޢު ކުރައްވާފައި ކަމަށް ބަންޑާރަ ނާއިބު ވިދާޅުވެފައިވެއެވެ.
"އެގޮތުން ނޫމަޑީގެ މައްސަލަ 11 ޑިސެންބަރު 2017ގައި އާބިޓްރޭޝަނަށް ހުށަހެޅުމުން ދައުލަތުން އެ މައްސަލާގައި ކުރިއަށްދާނެ ގޮތާއި ނެގޭނެ ދިފާޢުތަކާ ގުޅޭގޮތުން މަޝްވަރާކޮށް، ނިންމުންތައް ނިންމާފައި ވަނީ މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރގެ ހައިސިއްޔަތުން މުޢިއްޒުގެ ބައިވެރިވުމާއެކުގައެވެ. ވަޒީރުކަމުގެ މަޤާމުން ވަކިވެވަޑައިގަންނަވަންދެން، އެ މައްސަލަ ރައްދުވާ މިނިސްޓްރީގެ އެންމެ އިސްވެރިޔާގެ ޙައިސިއްޔަތުން މުޢިއްޒުގެ ދައުރެއް އާބިޓްރޭޝަން މައްސަލަތަކުގައި އޮތެވެ." ބަންޑާރަ ނާއިބުގެ އޮފީހުން ނެރެފައިވާ ބަޔާނެއްގައި ވިދާޅުވެފައިވެއެވެ.
މިނިސްޓަރު ކަމުން ވަކިވެ ވަޑައިގެންނެވުމަށްފަހު ނޫމަޑިގެ ފަރާތުން އާބިޓްރޭޝަނަށް ހުށަހަޅާ ހެއްކެއްގެ ގޮތުގައި މުޢިއްޒު ހުށަހެޅިއެވެ. އެފަަހަރު ދެއްވި ބަޔާނުގައި ކުރިން ޢަމަލުކުރެއްވި ގޮތާ ދިމާ އިދިކޮޅަށް، ދައުލަތާ ދެކޮޅަށް އޭނާ ވަނީ ވާހަކަ ދައްކަވާފައި ކަމަށް ބަންޑާރަނާއިބުގެ އޮފީހުން ނެރުއްވާފައިވާ ބަޔަނުގައިވެއެވެ. ދައުލަތާ ދެކޮޅަށް އޭނާ ބަޔާން ދެއްވާފައިވަނީ މިއަހަރު ޖޫން 14 ވަނަ ދުވަހުއެވެ.
"އެގޮތުން ނޫމަޑި ފޭސް 1 ގެ އެއްބަސްވުން ބާތިލުކޮށްފައިވަނީ އޭރުގެ ރައީސުލްޖުމްހޫރިއްޔާ ޢަބްދުﷲ ޔާމީން އަބްދުލްޤައްޔޫމް ބޭނުންވާތީ ކަމަށް ވިދާޅުވެ، އާބިޓްރޭޝަނަށް ބަޔާން ދެއްވުމަށްފަހު، އަލުން ބަޔާން ބަދަލު ކުރައްވާފައިވާކަން ފާހަގަކުރެވެއެވެ. ނޫމަޑީގެ އެއްބަސްވުންތަކާ ގުޅޭ ނިންމުންތައް ސަރުކާރުގެ ފަރާތުން ނިންމުމުގައި އެންމެ އިސް ދައުރެއް އަދާކުރެއްވި، އެ ޕްރޮޖެކްޓް ކުރިއަށް ގެންދިޔަ ވުޒާރާގެ އޭރުގެ ވަޒީރު ދައުލަތާ ދެކޮޅަށް އާބިޓްރޭޝަނަށް ބަޔާން ދެއްވުން ވެގެންދިޔައީ، އާބިޓްރޭޝަނުގައި ހިނގަމުންދިޔަ މައްސަލަތައް ދިފާޢު ކުރުމަށް ދައުލަތަށް އިތުރު ގޮންޖެހުންތަކެއް ކުރިމަތިވިކަމަކަށެވެ." ބަޔާނުގައި ވެއެވެ.
މިމައްސާލަގައި ބަންޑާރަ ނާއިބުގެ އޮފީހުން ފުލުހުންގެ ކިބައިން އެދިވަޑައިގެންފައިވަނީ ނޫމަޑި މައްސަލާގައި ޑރ. މުޢިއްޒު ޢަމަލުކޮށްފައިވާ ގޮތާއި، މިނިސްޓަރަކަށް ހުންނެވި އިރު ލިބިވަޑައިގެންފައިވާ ރަސްމީ ހައިސިއްޔަތު ނަހަމަ ގޮތުގައި ބޭނުންކޮށްފައިވާ ކަމާއި ދައުލަތުގެ މުވައްޒަފެއްގެ ޙައިސިއްޔަތުން ލިބިފައިވާ ސިއްރު މަޢުލޫމާތެއްގެ ނަހަމަ ބޭނުންކޮށްފައިވާ ކަމާއި ރަސްމީ އިދާރާއަކަށް ދޮގު މަޢުލޫމާތު ދީފައިވާ ކަން ނުވަތަ ނޫން ކަން ތަޙްޤީޤުކޮށް ދެއްވުމަށެވެ.
