އާދަޔާ ޚިލާފަށް ކުޑަ ވާލެއް ހއ. ފިއްލަދޫ އިން ފެނިއްޖެ އެވެ. މި ވާ ފެނިފައިވަނީ ރޭގަނޑު ގަޑީގައި ގެއެއްގެތެރެއަށް ވަދެގެން އުދުހެނިކޮށެވެ. ވާ އެގެއަށް ވަދެ އުދެހެން ފެށުމުން އެގޭގެ މީހުން ހީކުރީ އެއީ ކޮކާލެއް ކަމަށެވެ.
އެހެން ނަމަވެސް ކޮކާ އުދުހޭގޮތާ ތަފާތުކޮށް އޭތީ އުދުހޭތީވެ، އެއީ ކޮކާލެއް ނޫންކަން އެނގުނުނެވެ. އެހެންކަމުން ގޭ ދޮރުތައް ލައްޕައިފައި އެގޭގެ މީހުން އޭތި ހިފިއެވެ. އެ ވާ ހިފުނީ އޭތި އެގޭގެތެރޭގައި ގާތްގަޑަކަށް ގަޑިއެއްހާ އިރު އުދުހުނު ފަހުންނެވެ. އެއީ ވާލެއްކަން އެނގުނީ ހިފައިގެން ބެލުމުންނެވެ. އަދި އޭތި ފުޅިއަކަށް ލާފައި އެނގޭގެ މީހުން ބޭންދިއެވެ. އެވާހަކަ އަޑުއިވުމުން އޭތި ބަލާލަން އެދުމުން އެގޭގެ މީހުން އެވާ، އަޅުގަނޑަށް ގެނެސް ދިނެވެ.
ކަޅުކުލައިގެ މިވާލުގެ ފިޔަގަނޑު ފަތުރާނުލައި އޮންނައިރު ދިގުމިނުގައި ހުރީ ގާތްގަޑަކަށް ދެ ސެންޓިމީޓަރެވެ. ފިއްލަދޫ މީހުން ބުނާގޮތުގައި ކުރިން ދުވަހަކުވެސް މިވަރުގެ ވާލެއް އެރަށުން ފެނިފައެއް ނުވެއެވެ.
މިވާލާ ބެހޭ މަޢުލޫމާތު ހޯދާ ލުމުން އެނގުނީ މިވާލަކީ ކިޓީސް ހޮގް-ނޯސްޑް ބެޓް ނުވަތަ އާންމު ނަމުންނަމަ ބަމްބްލްބީ ބެޓެއް ނުވަތަ ވާލެއް ކަމެވެ. މިއީ ދުނިޔޭގައި އުޅޭ އެންމެ ކުޑަމެމަލެވެ. މިވައްތަރުގެ ވާ އުޅޭކަމަށް ވަނީ ވެސްޓަރން ތައިލޭންޑް ގަޔާއި ސައުތު އީސްޓް މިޔަންމާ ގައެވެ. ބަމްބްލްބީ ބެޓަކީ ކުދިކުދި ސޫފި ކައިއުޅޭ އެއްޗެކެވެ. މިވާލަކީ މީހުންނަށް ނުރައްކާ އެއްޗަކަށް ނުވިނަމަވެސް އޭނގެ ޒަރީއިން ފެތުރޭ ވައިރަހާއި ބެކްޓްރީއާ ފަދަ ތަކެތީގެ ސަބަބުން މީހުންނަށް ތަފާތު ބަލި ޖައްސައެވެ.
