ސަޤާފަތަކީ މީހާރުގެ ގޮތުން ބަލާކަމަށްވާނަމަ އިޤްތިސާދޫގެ ވަރަށް މުހިންމު ބައެއް ކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މުލިއާގެއަށް 100 އަހަރުފުރުމުގެ މުނާސަބަތުގައި ހޮނިހިރު ދުވަހުގެރޭ މުލިއާގޭގައި ބޭއްވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ދުނިޔޭގެ އެކި ޤައުމުތަކުން އެކި ރަށްރަށަށް ފަތުރުވެރިން ދަތުރުކުރާ އެންމެ މުހިއްމު އެއް ސަބަބަކީ ވެސް އެޤައުމެއްގެ ތަރިކައާއި ސަޤާފަތާއި އެބައެއްގެ ދިރިއުޅުން ހުރިގޮތް ދެނެގަތުން ކަމަށެވެ. އަދި ޚާއްޞަކޮށް މި މިލޭނިއަމްގެ ކުދިން ދަތުރުކުރުމުގައި އެންމެ އިސްކަމެއްދޭ ކަމަކަށްވެފައި އޮންނަނީ ތަރިކައާއި ސަޤާފަތް ދެނެގަތުން ކަމުގައި ވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ މިސަރުކާރުން ވަނީ ދިވެހިރާއްޖޭގެ ތަރިކައާއި ސަޤާފަތް ރައްކާތެރިކޮށް ދެމެހެއްޓުމަށްޓަކައި މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖްގެ ނަމުގައި އައު މިނިސްޓްރީއެއް އުފައްދަވައި، ސަޤާފީ ތަރިކައާ ބެހޭ ޤާނޫނެއްވެސް ވުޖޫދުކުރައްވައިފައި ކަމަށެވެ.
މުލިއާގޭގެ އައު ޢިމާރާތަށް 100 އަހަރު ފުރިގެންދިޔައިއިރު އެގެ އެހުރި ގޯތީގައި ޢިމާރާތެއް ހުންނަތާ މިހާރު 300 އަހަރުވެފައިވާކަމަށް ވެސް ރައީސް ވިދާޅުވިއެވެ. "އެއީ މުލީ ޚަތީބު މުޙައްމަދު ތަކުރުފާނު، މީގެ 300 އަހަރު ކުރިން ހުޅަނގު ދެކުނުކޮޅުގައި އެޅި ކުޑަކުޑަ ޢިމާރާތެއް. ބިންގަލެއް އަޅާ، ރާނާ އޭގެމަތީގައި މެއްލަޖަހާ ހެދި ގެއެއް. އެގެ ވާރުތަވަމުންއައިސް ހަސަން އިއްޒުއްދީން. އަޅުގަނޑުމެންގެ ދޮންބަންޑާރައިންނަށް މައިފުށުން އެގެ ވާރުތަވެގެންދިޔައީ. އެއަށްފަހު އައްސުލްޠާން އިބްރާހިމް ނޫރައްދީނަށް އެގެ ވާރުތަވުމަށްފަހުގައި އެގެ، އެރަސްގެފާނުގެ ދޮށީ މަނިއްޕުޅު ޝަމްސުއްދީން ތިނަކަށް އެގެ ވާރުތަވެގެންދިޔަ. އެއަށްފަހު އެރަދުން ރަސްކަމުގައި ހުންނަވާ، އެރަދުންގެ ދޮށީ ދަރިފުޅު އަދި ހަމައެކަނި ހުންނެވި ފިރިހެން ދަރިފުޅު ޕްރިންސް އިއްޒުއްދީނަށް މިގެ ހައްދަވާދެއްވީ. މިއަދު އަޅުގަނޑުމެންނަށް މިފެންނަ އިމާރާތަކީ އެއީ" ރައީސް ވިދާޅުވިއެވެ.
އެހެން ކަމުން މުލީއާގެއަކީ ރާއްޖޭގެ އެވޭލާ ރަސްމަތިފުށުގެ ތާރީޚާ ގުޅިފައިވާ ސަޤާފީ ތަރިކައިގެ ތެރޭގައި ހިމެނެންޖެހޭ ތަނެއްކަމަށް ދެކެވަޑައިގަންނަވާކަމަށް ރައީސް ވިދާޅުވިއެވެ.މުލިއާގޭގެ ތާރީޚަށް ބަލާއިރު އެއީ ދައުލަތުގެ އެތައް ވުޒާރާއެއް ހިންގެވި ގެއެކެވެ. މުލީއާގެއަކީ ރިޔާސީ ގަނޑުވަރުގެ ގޮތުގައި ވެސް ބޭނުއްކުރެއްވި ތަނެކެވެ. އޭގެ އިތުރުން ރައީސް އޮފީހާއި، ބޮޑުވަޒީރުގެ އޮފީހާއި ދާޚިލީ ވުޒާރާއާއި ޚާރިޖީ ވުޒާރާއާއި ސުޕްރީމް ކޯޓާއި ރައްޔިތުންގެ މަޖިލީހުގެ ބައްދަލުވުމާއި ވަޒީރުންގެ މަޖިލީހުގެ ބައްދަލުވުމާއި ވަލީ ކޮމިޓީ ވެސް އެތަނުގައި ކުރިއަށް ގެންގޮސްފައިވެއެވެ. އަދި ދިވެހިރާއްޖެ އިނގިރޭސިންގެ އިސްތިޢުމާރުން މިނިވަންކުރުމުގެ މުހިއްމު ވާހަކަ ދެކެވުނީވެސް މުލިއާގޭގައިކަން ކަމަށް ރައީސް ވިދާޅުވިއެއެވެ.
މިރަސްމިއްޔާތުގައި ރައީސް ވިދާޅުވީ ދިވެހިރާއްޖެއަކީ އެވޭލާ ޒަމާނުގެ މުއްސަނދި ސަގާފަތަކާއި ތަރިކައެއް އޮތް ރާއްޖެއެއް ކަމަށެވެ. ދިވެހީންގެ ސަޤާފަތާއި ތަރިކަ ރައްކާތެރިކުރުމަކީ އަންނަން އޮތް ޖީލުތަކަށް، ކާބަފައިން އުޅުނު ގޮތާއި ކުރި މަސައްކަތް ފޯރުކޮށްދިނުމަށްޓަކައި އަދުގެ ޖީލުގެ ކޮނޑުގައި އެޅިފައިއޮތް ވާޖިބެއް ކަމަށް ވެސް ވިދާޅުވިއެވެ.
