އުއްތަމަފަނޑިޔާރަކަށް މުޢްތަޞިމް ޢަދްނާން، ސްޕްރީމްކޯޓްގެ ފަނޑިޔާރަކަށް ޙުސްނު ސުޢޫދު އަދި ޕީޖީ އަކަށް ޝަމީމަށް މަޖިލީހުގެ ރުހުން ދީފިއެވެ.
މިހާރު ކުރިއަށްދާ ވޯޓް ގައި އުއްތަމަފަނޑިޔާރަކަށް މ.ގުލްފާމްގޭ އަޙްމަދު މުޢްތަޞިމަށް ރުހުން ދިނުމަށް ފާސްކުރެއްވީ 68 މެމްބަރުންގެ ޢިއްތިފާޤުންނެވެ. ސްޕްރީމްކޯޓްގެ ފަނޑިޔާރަކަށް ސުޢޫދަށް ރުހުންދެއްވީ 64 މެމްބަރުންގެ އަޣްލިބިއްޔަތުންނެވެ. ޕީޖީ އަކަށް ޝަމީމްގެ ނަން ފާސްކުރެއްވީ 74 މެމްބަރުންގެ ޢިއްތުފާޤުންނެވެ.
ޕީޖީ ކަމަށް އައްޔަން ކުރައްވަން ރުހުން ދެއްވި ޝަމީމަކީ ކުރިން ޑެޕިއުޓީ ޕީޖީކަން ކުރައްވައިފައިވާ ބޭފުޅެކެވެ. މެމްބަރުން ވިދާޅުވެފައިވަނީ ޝަމީމަކީ އެމަޤާމަށް އެންމެ އެކަށީގެންވާ އެއް ބޭފުޅާކަމުގައެވެ. އަދި އޭނާއަކީ އިޚްލާޞްތެރިކަމާއެކު މަސައްކަތް ކުރައްވާނެ ބޭފުޅެއްކަމަށް ދެކެވަޑައިގަންނަވާ ކަމަށެވެ.
މުޢުތަސިމް ޢަދުނާނަކީ ވެސް ކުރިން ސްޕްރީމް ކޯރޓްގެ ފަނޑިޔާރުކަން ކުރައްވައިފައިވާ ބޭފުޅެކެވެ. މުޢުތަޞިމަކީ އުއްތަމަ ފަނޑިޔާރުކަމަށް އެންމެ އެކަށޭނަ، ގިނަ ވެގެން ނުޅުއްވާ ޢަބުރުވެރި އަބުއި ބޭފުޅެއްކަމަށް މެމްބަރުން ވިދާޅުވިއެވެ. އަދި ކުރިން ސްޕްރީމް ކޯޓްގެ ފަނޑިޔާރަކަށް ހުންނަވައިގެން މުހިންމު މަސައްކަތްތަކެއް އޭނާ ކުރައްވައިފައިވާކަމަށް ވެސް ބައެއް މެމްބަރުން ވިދާޅުވިއެވެ.
ޙުސްނު ސުޢޫދަކި ކުރިން ދައުލަތުގެ ބަންޑާރަނައިބްކަން ކުރައްވައިފައިވާ ބޭފުޅެކެވެ. އަދި ރައީސް އިބްރާހީމް މުޙައްމަދު ޞާލިޙް އުފައްދަވައިފައިވާ މަރުތަކާ ބެހޭ ރިޔާސީ ކޮމިޝަންގެ ރައީސް ވެސް މެއެވެ. ސުޢޫދު ސްޕްރީމް ކޯޓްގެ ފަނޑިޔާރުކަމަށް އައްޔަން ކުރުމާމެދު ބައެއް އާންމުންނާއި ބައެއް މެމްބަރުންގެ ޚިޔާލު ވަނީ ތަފާތުވެފައެވެ. ނަމަވެސް ސްޢޫދާ ދެކޮޅަށް ވޯޓް ދެއްވީ އެންމެ މެމްބަރެކެވެ.
