ޔުކްރޭންގެ ރައީސު ވޮލޮޑިމީރް ޒެލެނެސްކީގެ އަރިހުން އެމެރިކާގެ ދާޚިލީ ސިޔާސީ ކަންކަމަށް ނުފޫޒު ފޯރާ ފަދަ ކަމެއް ކުރެއްވުމަށް އެދިވަޑައިގެން، އެމެރިކާގެ ރައީސު ޑޮނާލްޑް ޓްރަމްޕް ވަނީ އަޒުލުކުރަން ޖެހޭވަރުގެ ކުށެއް ކުރައްވާފައިކަމަށް ގާނޫނީ ތަޖުރިބާކާރުން ލަފާދީފިއެވެ.
އިއްޔެ އެމެރިކާގެ ގާނޫނުހަދާ މަޖިލީހުގެ ތިރީގެ، ހައުސް އޮފް ރެޕްރެޒެންޓެޓިވްސްގެ ޖުޑިޝަރީ ކޮމިޓީއަށް ލަފާދެއްވި ހަތަރު ގާނޫނީ ތަޖުރިބާކާރުންގެ ތެރެއިން ތިން ބޭފުޅަކު ވަނީ އަޒުލުކުރަން ޖެހޭކަމަށް ވިދާޅުވެ ލަފާދެއްވާފައެވެ. ދެކޮަަޅަށް ޚިޔާލު ފާޅުކުރެއްވީ އެންމެ ބޭފުޅެެކެވެ.
"(ހެކިބަސް ދިން ފަރާތްތަކުން) ދީފައިވާ ހެކިބަހާއި، ހުށަހެޅިފައިވާ ހެކިތަކުގެ މައްޗަށް ބިނާކޮށް (ދެންނެވޭނީ) ރައީސު ޓްރަމްޕްވަނީ ރައީސުކަމުގެ މަގާމުގެ ބޭނުން ނުބައިގޮތުގައި ކުރައްވައިގެން އަޒުލުކުރެވިދާފަދަ ބޮޑެތި ކުށް ކުރައްވާފައި. އަދި އިތުރު ގޯސްތައްވެސް ހައްދަވާފައި." ޖުޑިޝަރީ ކޮމިޓީގައި ވާހަކަަދައްކަވަމުން ހާވާޑް ލޯ ސްކޫލްގެ ޕްރޮފެސާ ނޯއާ ހެލްޑްމަން ވިދާޅުވިއެވެ.
"ޚާއްސަކޮށް 2020 ވަނަ އަހަރުގެ ރިޔާސީ އިންތިޚާބުގައި އަމިއްލަފުޅަށް ފައިދާ ހޯއްދެވުމަށް ޓަކައި، ސިޔާސީ އިދިކޮޅު ފަރާތެއްގެ މައްޗަށް ތަހުގީގު ހިންގާކަން އިއުލާންކުރެއްވުމަށް ޔުކްރޭންގެ ރައީސު ވޮލޮޑިމީރް ޒެލެންސްކީގެ އަރިހުގައި ގާނޫނީ ހަަމަތަކުން ބޭރުން ދަންނަވައިގެން ރައީސު ޓްރަމްޕްވަނީ ނަހަމަ ގޮތުގައި މަގާމުގެ ބޭނުންކުރައްވާފައި." ފެލްޑްމަން ވިދާޅުވިއެވެ.
ސްޓެންފަޑް ޔުނިވަސިޓީގެ ގާނޫނީ ތަޖުރިބާކާރުވެސް ވަނީ މި މޭރުމުން ލަފާ އަރުވާފައެވެ.
"ހެކިތަކުން މިފެންނަނީ ރައީސުކަމަށް ވާދަކުރައްވަފާނެ ވާދަވެރި ކެންޑިޑޭޓަކަށް ގެއްލުން ދިނުމުގައި ބޭރު ގައުމެއްގެ ސަރުކާރަކުން ބައިވެރިވުމަށް، އޭނާގެ މަގާމުގެ ބޭނުންކުރައްވާ ރައީސެއް" ޖުޑިޝަރީ ކޮމިޓީއަަށް ލަފާއަރުވަމުން ސްޓެންފަޑް ޔުނިވަސީޓެ ލޯ ސްކޫލްގެ ލޯ ޕްރޮފެސާ ޕަމެލާ ކާލަން ވިދާޅުވިއެވެ.
ނޯތު ކެރޮލައިނާގެ ލޯ ޕްރޮފެސާ މައިކަލް ގާހާޓް ވަނީ ޓްރަމްޕް އަޒުލުކުރުމުގެ މަސައްކަތާ 1973 ވަނަ އަހަރު އޭރުގެ ރައީސު ރިޗަޑް ނިކްސަން އަޒުލުކުރުމުގެ މަސައްކަތާ އެއްގޮތްކަމަށް ވިދާޅުވެފައެވެ.
"މި ގައުމުގައި ރަސްކަމެއް ގާއިމު ވިޔަ ނުދިނުމަށް ގާނޫނު އަސާސީން އަޅާފައިވާ ރައްކާތެރިކަމުގެ ހުރިހާ ފިޔަވަޅަކަށް ރައީސު ހަމަލާދެއްވާފައިވާކަން ނޫން އެހެން ނަތީޖާއެއް އަހަރެންނަށް ނުރެވޭ." ގާހާޓް ވިދާޅުވިއެވެ.
ރައީސު ޓްރަމްޕް އަޒުލުކުރަން ޖެހޭތޯ ބެލުމަށް ކުރެވޭ ތަހުގީގަށް ލަފާދެއްވި ހަތަރު ތަޖުރިބާކާރުންގެ ތެެރެއިން ރިޕަބްލިކަން ޕާޓީން ދެކޭގޮތަށް ތާއީދުުކުރެއްވީ ޖޯޖް ވޮޝިންޓަން ޔުނިވަސިޓީގެ ސްކޫލް އޮފް ލޯގެ ޕްރޮފެސާ ޖޮނަތަަން ޓާލީއެވެ. އޭނާ ވިދާޅުވީ "މިއީ އެމެރިިިކާގެ ރައީސަކު އަޒުކުރަން މަސައްކަތް ކުރަން ޖެހޭ ގޮތް ނޫން" ކަމުގައެވެ.
ހައުސުް އޮފް ރެޕްރެޒެންޓެޓިވްސްގެ ޑިމޮކްރެޓިކް ޕާޓީއަށް ނިސްބަތްވެވަޑައިގަންނަވާ މެންބަރުން މަސައްކަތްޕުޅުކުރައްވަމުން ގެންދަވަނީ މި ޑިސެންބަރު މަސް ނިމުމުގެ ކުރިން ރައީސު ޓްރަމްޕް އަޒުލުކުރުމާ މެދު ވޯޓަކަށް އެހުމަށެވެ.
