ޕާކިސްތާނުގައި ގެދޮރު އިމާރާތްކޮށް ވިއްކުމުގައި (ރިއަލް އެސްޓޭޓް) ހަރަކާތްތެރިވާ އެންމެ ބޮޑު މަހުޖަނު މަލިކު ރިޔާޒު ޙުސައިންގެ މިލްކިއްޔާތުގައިވާ މުދަލުގެ ތެރެއިން 190 މިލިއަން ޕައުންޑު (244 މިލިއަން އެމެރިކާ ޑޮލަރު) ޕާކިސްތާނު ސަރުކާރާ ހަވާލުކުރުމަށް އޭނާ އެއްބަސްވެއްޖެއެވެ.
މަލިކު ރިޔާޒު އަކީ ޕާކިސްތާނުގެ އެންމެ މުއްސަނދި، އެންމެ ނުފޫޒުގަދަ، އަދި އެންމެ ގިނަ މުވައްޒަފުން ގެންގުޅޭ ވިޔަފާރިވެރިޔާއެވެ. އަދި އޭނާއަކީ ހިލޭ ސާބަހަށް އެންމެ ގިނަ އެހީދޭ ވިޔަފާރިވެރިޔާއެވެ. އެހެންނަމަވެސް، އޭނާއާ ދެކޮޅަށް ކޮރަޕްޝަންގެ ބޮޑެތި މައްސަލަތަކެއް ތަހުގީގުކުރަމުން ގޮސްފައި ވެއެެވެ.
މަލިކު ރިޔާޒުގެ މިލްކިއްޔާތުގައިވާ މުދަލާއި ފައިސާ ހޯދުމުގައި ގާނޫނާ ޚިލާފު އަމަލުތައް ހިންގާފައިވާކަން އިނގިރޭސިިވިލާތުގެ ނޭޝަނަލް ކްރައިމް އެޖެންސީ (އެންސީއޭ) އިން ކުރި ތަހުގީގަށް ހާމަވެފައި ވާތީ އެ އެޖެންސީން ވަނީ ވެސްޓްމިންސްޓާ މެޖިސްޓްރޭޓްސް ކޯޓުގެ ކޯޓު އަމުރެއްގެ ދަށުން އޭނާގެ އެކައުންޓުތަކުގައި ހުރި 140 މިލިއަން ޕައުންޑު ފާއިތުވި އޮގަސްޓު މަހުގެ ތެރޭގައި ހިފަހައްޓާފައެެވެ. މީގެ އިތުރަށް ހައިޑް ޕާކް ޕްލޭސްގައި ހުރި އޭނާގެ 50 މިލިއަން ޕައުންޑުގެ އިމާރާތެއް ނަގާފައެވެ.
"އެއްބަސްވުމުގެ ދަށުން ދޫކޮށްލަން 190 މިލިއަން ހަމަޖެހުނީ ޕާކިސްތާނުގެ ރައްޔިތެއް ކަމުގައިވާ މަލިކު ރިޔާޒު ހުސައިންގެ (މައްޗަށް ހިންގުނު) ތަހުގީގުގެ ނަތީޖާއެއްގެ ގޮތުންނެވެ. އޭނާއަކީ ޕާކިސްތާނުގެ އަމިއްލަ ވިޔަފާރިވެރިންގެ ތެރެއިން އެންމެ ގިނަ މުވައްޒަފުން ގެންގުޅޭ އެެއް ފަރާތެވެ." އެންސީއޭގެ ބަޔާނުގައި ވެއެވެ.
"ބެލެވޭ ގޮތުގައި އެ ފައިސާ ހޯދާފައި ވަނީ ރިޝްވަތާއި ކޮރަޕްޝަނުގެ ޒަރީއާއިންނެވެ. އެ އެޖެންސީގެ ބަޔާނުގައި އިތުރަށް ބުނެފައިވެއެވެ. "އެ ފައިސާ ހަވާލުކުރެވޭނީ ޕާކިސްތާނު ސަރުކާރާއެވެ."
އެންސީއޭއާ މަލިކު ރިޔާޒާ ދެމެދު ވެވުނު އެއްބަސްވުމުގެ ދަށުން އިނގިރޭސިވިލާތުގައި ހުރި އޭނާގެ މިލްކިއްޔާތު ދޫކޮށްލުމުން އޭނާގެ މައްޗަށް ޖިނާއީ ދައުވާ ނުުކުރާނެއެވެ.
"މި އެއްބަސްވުމަކީ މަދަނީ މައްސަލައެއް. މީގައި ކުށްވެރިކުރުމެއް ނުހިމެނޭ." އެންސީއޭއިން ބުންޏެވެ.
މަލިކު ރިޔާޒު ވަނީ އޭނާގެ އަމިއްލަ ޓުވިޓާ އެކައުންޓުގައި ވެސް އެންސީއޭގެ ބަޔާން ހިއްސާކޮށްފައެވެ.
މި އެއްބަސްވުމުގެ ދަށުން ޕާކިސްތާނު ސަރުކާރަށް އެތައް ސަތޭކަ މިލިއަން ޑޮލަރެއް ލިބުމަކީ ކޮރަޕްޝަންގެ ޒަރީއާއިން ގައުމުން ބޭރުކޮށްފައިވާ އެތައް ބިލިއަން ޑޮލަރު ހޯދުމަށް ބޮޑުވަަޒީރު އިމްރާން ޚާން ކުރައްވާ މަސައްކަތަށް ލިބުނު ބޮޑު ކުރިއެރުމެކެވެ.
1995 ވަނަ އަހަރު އާދައިގެ ކޮންޓްރެކްޓަރެއްގެ ގޮތުގައި މަސައްކަތްފެށި މަލިކު ރިޔާޒު ވަނީ 2000 ވަަނަ އަހަރު ގެދޮރު އިމާރާތްކޮށް ވިއްކުުމުގެ ވިޔަފާރިއަށް ވަދެ އެ ވިޔަފާރިން ބޮޑު މަންފާއެއް ހޯދި ވިޔަފާރިވެރިއެކެވެ. އޭނާގެ މިލްކިއްޔާތުގެ އަގު 800 މިލިއަން އެމެރިކާ ޑޮލަރަށް އަރައެވެ.
އޭނާއަކީ ޕާކިސްތާނުގައި ނުފޫޒުގަދަ އަދި ނޫސްވެރިންނާއި، ސިޔާސި ފަރާތްތަކަށް އަގުބޮޑު ހަދިޔާ ދީގެން އޭނާއާގެ މައްސަލަތައް އޮއްބަމުން އައި މީހެކެވެ.
