ނޫސްވެރިޔާ ޑަފްނޭ ކަރުވާނާ ގަލިޓްސިޔާ މަރާލި މައްސަލަައާ ގުޅިގެން މޯލްޓާގެ ބޮޑުވަޒީރު ޖޯސެފް މަސްކަޓް އިސްތިއުފާދެއްވަން ނިންމަވައިފިއެވެ. ޓީވީ މެދުވެރިކުރައްވައި އިއްޔެ ގައުމާ މުޚާޠަބުކުރައްވަމުން އޭނާ ވިދާޅުވީ ދުވަހު ވެރިިކަންކުރާ ލޭބާ ޕާޓީގެ ލީޑަރު ކަމުން ޖަަނަވަރީ މަހުގެ 12 ވަނަ އިސްތިއުފާދެއްވަން ނިންމަވާފައިވާ ކަން ޕާޓީގެ ރައީސަށް އަންގަވާނެ ކަމުގައެވެ.
"12 ޖަަނަވަރީ 2020 ގައި އާ ލީޑަރަކު ހޮވުމުުގެ ތައްޔާރީތައް ފެއްޓެވުމަށް އެދި އަހަރެން ލޭބާ ޕާޓީގެ ރައީސަށް ލިޔާނަށް. އެދުވަހު އަހަރެން ޕާޓީގެ ލީޑަރުކަމުން އިސްތިއުފާދޭނަށް. އަދި ކުރިއަށް ދުވަސްތަކުގައި އަަހަރެން ބޮޑުވަޒީރުކަމުން ވެސް އިސްތިއުފާ ދޭނަން." 2013 އަހަރުން ފެށިގެން ބޮޑުވަޒީރުގެ މަގާމުގައި ހުންނެވި މަސްކަޓް ވިދާޅުވިއެވެ.
ލޭބަ ޕާޓީގެ ލީޑަރުން ހޮވުމަށް އަންނަ ޖަނަވަރީ މަހު އިންތިޚާބު ބާއްވަން ނިންމާފައި ވާއިރު، އެ ޕާޓީއަށް މޯލްޓާގެ ގާނޫނުހަދާ މަޖިލިސް، ހައުސް އޮފް ރެޕްރެޒެންޓެޓިވްސްގައި އަޣުލަބިއްޔަތު އެބައޮތެވެ. އެހެންކަމުން، އާއްމު އިންތިޚާބަކަށް ދާންނުޖެހި، ދެން ލޭބާ ޕާޓީގެ ލީޑަރަކަށް ހޮވިވަޑައިގަންނަވާ ބޭފުޅަކު ބޮޑުވަޒީރަކަށް ވެވަޑައިގަންނަވާނެއެެވެ.
ނޫސްވެރިޔާ ގަލިޓްސިޔާ މަރާލާފައިވަނީ މޯލްޓާގެ ވިޔަފާރިވެރިންނާ، ސިޔާސީ އިސްފަރާތްތަކުގެ މެދުގައި ހިނގަމުން ދިޔަ ކޮރަޕްޝަންގެ މަައްސަލަތަކެއް ފެންމަތިކުރިތާ އަށެއްކަ މަސްދުވަހުގެ ތެރޭގައެވެ. 2017 ވަނަ އަހަރުގެ އޮކްޓޯބަރު މަހުގެ ތެރޭގައި އޭނާ މަރާލާފައި ވަނީ ބިދްނީޖާގައި ހުންނަ އޭނާގެ ގޭގެ ކުރިމަތީގައި ކާރު ބޮމެއް ގޮއްވާލައިގެންނެވެ.
ބޮޑުވަޒީރު މަސްކަޓް އިސްތިއުފާދެއްވަން ނިންމަވާފައި މިވަނީ، ނޫސްވެރިޔާ ގަލިޓްސިޔާގެ މަރުގެ މައްސަލައިގައި ވިޔަފާރިވެރިޔާ ޔޮރްގޭން ފެނެޗްގެ މައްޗަށް ދައުވާއުފުލުމާ ގުޅިގެން، ބޮޑުވަޒީރުގެ އިސްތިއުފާއަށް ގޮވާލައި ކުރާ މުޒާހަރާތައް ވަރުގަދަވެފައި ވަނިކޮށެވެ. ފެނެޗްއަކީ މޯލްޓާ ސަރުކާރުގެ އިސްވެރިންނާ ގުޅުން އޮންނަ ވިޔަފާރިވެރިއެކެވެ.
މަސްކަޓް ދެއްކެވި ވާހަކަފުޅުގައި ގަލިޓްސިޔާގެ މަރުގެ މައްސަލައަށް އިޝާރާތްކުރައްވާފައި ނުވެއެވެ. އެހެންނަަމަވެސް އޭނާ ވިދާޅުވިގޮތުގައި އިސްތިއުފާދެއްވަނީ "މިއީ ކުރަންޖެހޭ ކަމަކަށް ވާތީ" ކަމުގައެވެ.
"ބޮޑުވަޒީރެއްގެ ހައިސިއްޔަތުން، މީގެ ދެ އަހަަރު ކުރިން އަހަރެން ވާނީ ވައުދުވެފަ ޑަފްނޭ ކަރުވާނާ ގަލިޓްސިޔާ މަރާލި މައްސަލައިގައި އިންސާފު ހޯދައިދޭނެކަމަށް. އަހަރެން މިވަނީ ވައުދު ފުއްދާފައި." މަސްކަޓް ވިދާޅުވިއެވެ.
މޯލްޓާއަކީ މެޑިޓަރޭނިއަން ކަނޑުގައި އިޓަލީއާއި ލީބިޔާއި ދެމެދު އޮންނަ ކުޑަ ޖަޒީރާ ގައުމެކެވެ. 316 އަކަކިލޯމީޓަރު ބޮޑުމިނުގައި ހުންނަ މޯލްޓާގެ އާބާދީއަކީ 4 ލައްކަ 93 ހާހެވެ. މޯލްޓާއަކީ ޔޫރަޕިއަން ޔުުނިއަން (އީޔޫ) ގައި ހިމެނޭ އެންމެ ކުޑަ ގައުމެވެ.
