ޕްރޮސެކިޔުޓަރ ޖެނެރަލް (ޕީޖީ) ކަމަށް އައްޔަން ކުރެއްވުމަށް އަލްއުސްތާޒު ޙުސައިން ޝަމީމްގެ ނަން ރައްޔިތުން މަޖިލީހަށް ރައީސް އިބްރާހީމް މުޙައްމަދު ޞާލިޙު ފޮނުވައިފިއެވެ.
ޙުސައިން ޝަމީމަކީ ކުރިން ޑެޕިޔުޓީ ޕޮރޮސެކިއުޓަރ ޖެނެރަލްކަން ކުރައްވާފައިވާ ތަޖުރިބާކާރު، ޤާބިލް ބޭފުޅެކެވެ.
ރައީސް އިބްރާހީމް މުޙައްމަދު ޞާލިޙު ކުރައްވާފައިވާ ޓުވީޓެއްގައި ވިދާޅުވެފައިވަނީ "ހުސްވެފައިވާ ޕްރޮސިކިއުޓަރ ޖެނެރަލްގެ މަގާމަށް ބޭފުޅަކު ޢައްޔަންކުރުމަށްޓަކައި އާންމުކޮށް ޢިއުލާންކުރުމުން އެކަމަށް އިޖާބަދެއްވި ބޭފުޅުންގެ ތެރެއިން ހ. ހިޔާކަން އޒ. ޙުސެއިން ޝަމީމު އެ މަޤާމަށް އައްޔަންކުރުމަށް ރައްޔިތުންގެ މަޖިލީހުގެ ރުހުން ހޯދުމަށް މިއަދު ފޮނުވައިފިން،" ކަމަށެވެ.
ޕީޖީގެ މަޤާމު ހުސްވެފައިވަނީ އެންމެ ފަހުން އެމަޤާމުގައި އިންނެވި ޢާއިޝަތު ބިޝާމް އިސްތިއުފާ ދެއްވުމުންނެވެ. އޭނާ އެމަޤާމުން އިސްތިއުފާ ދެއްވީ އޭނާ މަޤާމުން ވަކި ކުރުމަށް މަޖިލީހުން ތައްޔާރުވަމުން ދަނިކޮށް ނޮވެމްބަރު 28 ވަނަ ދުވަހުއެއެވެ.
ބިޝާމް އިސްތިއުފާ ދެއްވުމުން ރައީސް އިބްރާހީމް މުޙައްމަދު ޞާލިޙުވަނީ އޭނާ ޕީޖީކަމުގައި އިންނަވައިގެން ކޮށްދެއްވައިފައިވާ ޚިދުމަތްތައް ފާހަގަ ކުރައްވައި ޝުކުރު އަދާކުރައްވައިފައެވެ. އަދި ފާގަތި މުސްތަޤުބަލަކަށް އެދިވަޑައިގަންނަވާ ކަމަށް ވެސް ރައީސް ވަނީ ވިދާޅުވެފައެވެ.
