ށ. މާއުނގޫދޫއަށް ބަޔަކު އަރައި، އެރަށުގެ ފާރުތަކުގައި އައިސިސްގެ ދިދަ ކުރަހައި އެރަށުގެ މީހުންގެ މެދުގައި ބިރުވެރިކަން އުފެއްދި މައްސަލައާއި، 13 އަހަރުގެ އަންހެން ކުއްޖަކާއެކު "ކައިވެނިކޮށްގެން" ކަމަށްބުނާ މައްސަލައާއި ގުޅިގެން ރައްޔިތުންގެ މަޖިލީހަށް ކުއްލި މައްސަލައެއް މިއަދު ހުށަހަޅައިފިއެވެ.
މިކަމާއި ގުޅިގެން މަޖިލީހަށް ކުއްލި މައްސަލައެއް ހުށަހެޅުއްވީ ހެންވޭރު ދެކުނު ދާއިރާގެ މެމްބަރު ޙުސައިން ޝަހީމް (އަނދުން ޙުސައިން) އެވެ.
ކުއްލި މައްސަލައިގައި ބުނެފައި ވަނީ މީހުންމެރުމާއި، ޖަރީމާތައް ހިންގާ ބަޔަކު ށ. މާ. އުނގޫދޫއަށް އަރައި، އައިސިސްގެ ދިދަ ކުރެހި މައްސަލައަކީ ކަމާބެހޭ ފަރާތްތަކުން ބަލަންޖެހޭނެ ކަމެއް ކަމަށެވެ. އަދި މިއީ ރާއްޖެއަށް ހުރި ބިރުވެރި ކަމެއް ކަމަށެވެ.
ކުއްލި މައްސަލައިގައި ދެން އޮތީ 13 އަހަރުގެ އަންހެން ކުއްޖަކާ "ކައިވެނިކޮށްގެން" ކަމަށް ބުނެ "ޖިންސީ ގުޅުން ހިންގި" ކަމަށް ބުނާ މައްސަލައެވެ. މި މައްސަލައިގައި ބުނެފައި ވަނީ އެކަން ސަރުކާރުގެ ކަމާބެހޭ ފަރާތްތަކުގެ ސަމާލުކަމަށް އައިސްފައި ވީނަމަވެސް އެކަމާމެދު ފިޔަވަޅު ނޭޅި ފަރާތްތަކާމެދު ފިޔަވަޅު އަޅަންވެސް ކުއްލި މައްސަލައިގައި ބުނެފައިވެއެވެ.
މި ކުއްލި މައްސަލައިގެ ބަހުސްގައި ވާހަކަ ދެއްކެވި ހުރިހާ މެމްބަރުންވެސް ވަނީ މާއުނގޫދޫއަށް ބަޔަކު އަރައި އައިސިސްގެ ދިދަ ކުރެހި މައްސަލަ އާއި 13 އަހަރުގެ ކުޑަކުއްޖަކާ ކައިވެނިކޮށްގެން އުޅުނު ކަމަށްބުނާ މައްސަލަ ކުށްވެރި ކޮށްފައެވެ. މެމްބަރުން ވިދާޅުވީ އެއީ ކައިވެންޏެއް ނޫން ކަމަށާއި އެއީ ކުޑަކުއްޖަކު ރޭޕް ކުރުން ކަމަށެވެ.
