ޗައިނާގެ މުވާސަލާތީ ބިޔަ ކުންފުނި ހުވާވޭއިން އެ ކުންފުނީގެ މުވައްޒަރަފުންނަށް ބޯނަސްގެ ގޮތުގައި 285 މިލިއަން ޑޮލަރު ދޭން އިއްޔެ ނިންމައިފިއެވެ. އެ ކުންފުނިން ބުނީ މި ބޯނަސްއަކީ އެމެރިކާއިން އެކުންފުންޏާ ދެކޮޅަށް އެޅި ދަތިކުރުމުގެ ފިޔަވަޅުތަކުގެ އަސަރު ކުޑަކުރުމަށް މަސައްކަތްކުރި މުވައްޒަފުންނަށް ދިން އިނާމެއް ކަމުގައެވެ.
ދުނިޔޭގެ މުވަސަލާތީ އާލާތް އުފައްދާ އެންމެ ބޮޑު ކުންފުނިން ބުނި ގޮތުގައި އެކުންފުންޏާއެކު ވިޔަފާރީގެ މުއާމަލާތްކުރުން އެމެރިކާގެ ކުންފުނިތަކަށް މަނާކުރުމާ ގުޅިގެން އެކުންފުނީގެ އުފެއްދުންތަކަށް ބޭނުންވާ ބައިތައް ހޯދުމުގައި ދަތިތަކެއް ކުރިމަތިވިއެވެ. އެހެންނަމަވެސް މުވައްޒަފުން ވަނީ އެމެރިކާގެ ފިއްތުންތަކުގެ ކުރިމަތީގައި ހިތްވަރާއި ސާބިތުކަން ދައްކާފައެވެ.
ކުންފުނީގެ ހިއުމަން ރިސޯސް ޑިޕާޓްމަންޓުން ނެރުނު މެމޯގައި ބުނެފައި ވަނީ މި ބޯނަސްއަކީ މުވަައްޒަފުން ކުރި މަސައްކަތުގެ އަގު ވަަޒަންކުރުމުގެ ގޮތުން ދިން އިނާމެއް ކަމުގައެވެ.
އެ ޑިޕާޓްމަންޓުގެ ބަޔާނުގައި ވާގޮތުން 2 ބިލިއަން ޔުއާން (285 މިލިއަން އެމެރިކާ ޑޮަލަރު) ގެ ބޯނަސް ބަހާނީ އެ ކުންފުނީގެ 1 ލައްކަ 80 ހާސް މުވައްޒަފުންގެ ތެރެއިން 90 ހާސް މުވައްޒަފުންނަށެވެ. އެއީ ކޮންމެ މުވައްޒަފަކަށް 22 ހާސް ޔުއާން (3100 އެެމެރިކާ ޑޮލަރު) ގެ މަގުންނެވެ. ބެލެވޭ ގޮތުގައި މިއީ ރިސާޗް އެންޑް ޑިވޮލޮޮޕްމަންޓެ ދާއިރާގެ މުވައްޒަފުންނެވެ. އެ މުވަައްޒަފުން ވަނީ ހުވާވޭގެ އަމިއްލަ ޕްރޮސެސާއަކާއި، އަމިއްލަ އޮޕަރޭޓިންގ ސިސްޓަމެއް އުފައްދާފައެވެ. އަދި އެމެރިކާ ކުންފުނިތަކުން ނުލިބުނު ބައިތަކުގެ ބަދަލުގައި އަމިއްލަ ބައިތަކެއް ތަރައްގީ ކޮށްފައެވެ.
މި ބޯނަސްގެ އިތުރަށް ހުވާވޭއިން ނިންމާފައި ވަނީ އެކުންފުނީގެ ހުރިހާ މުވައްޒަފުންނަށް އެއް މަސްދުވަހުގެ މުސާރަ އިތުރަށް ދިނުމަށެވެ.
ހުވާވޭ ކުންފުނިން ދޭ މުވާސަލާތީ ޚިދުމަތްތަކާއި، ވިއްކާ އާލާތްތައް މެދުވެރިކޮށް ޖާސޫސުކުރަމުން ދާތީ، އެމެރިކާގެ ގައުމީ ސަލާމަތަށް ނުރައްކާވާކަމަށް ބުނެ، އެމެރިކާގެ ކުންފުނިތަކުން ހުވާވޭއާ ވިޔަފާރީގެ މުއާމަަލާތްކުރުން މަނާކޮށް ވައިޓްހައުސްއިން ރިޔާސީ އަމުރެއް ނެރެފައި ވަނީ 15 މޭ 2019 ގައެވެ.
ޗައިނާގެ ހުވާވޭ ކުންފުންޏަކީ ދުނިޔޭގައި މުވާސަތީ ޚިދުމަތާގުޅޭ އާލާތްތައް އުފައްދާ އެންމެ ބޮޑު ކުންފުންޏެވެ. އަދި މޯބައިލް 5ޖީ ގެ ޚިދުމަތް ތައާރަފުކޮށްފައި ވަނީ އެކުންފުނިންނެވެ. 1987 ވަނަ އަހަރު އުފެދުނު އެކުންފުނީގައި 1 ލައްކަ 80 ހާސް މުވައްޒަފުން ތިބިއިރު، އެ ކުންފުނިން ވަނީ ފާއިތުވި 2018 ވަނަ އަހަރު 105 ބިލިއަން އެމެރިކާ ޑޮަލަރުގެ ވިޔަފާރިކޮށް، 8.65 ބިލިއަން އެމެރިކާ ޑޮަލަރުގެ ސާފު ފައިދާއެއް ހޯދާފައެވެ.
