ބްކޯއިން އައްޑޫ ސިޓީ މަރަދޫގައި މިއަދު ފިހާރައެއް ހުޅުވައިފިއެވެ. މިއީ ހޯލް ސޭލް އަދި ރީޓެއިލް ފިހާރައެކެވެ.
މިއީ މާލެއިން ބޭރުގައި އެކުންފުނީން ހުޅުވި ދެވަނަ ފިހާރައެވެ. އައްޑޫގައި މިފިހާރަ ހުޅުވުމުގެ ކުރިން ފުވައްމުލަކު ސިޓީގައި ވަނީ ސިބްކޯގެ ފިހާރައެއް ހުޅުވައިފައެވެ.
މިއަދު ހެނދުނު މަރަދޫގައި ބޭއްވި ރަސްމިއްޔާތެއްގައި މިފިހާރަ ހުޅުއްވައި ދެއްވީ މަރަދޫ ކައުންސެލަރ އިބްރާހީމް ފައިސަލް އާއި ސިބްކޯގެ ޑިރެކްޓަރ އަޙްމަދު މުޢުތަޞިމެވެ.
އައްޑޫގައި ސިބްކޯއިން ހުޅުވި އެކުންފުނީގެ ފިހާރަ ހުންނަނީ މަރަދޫ ކީރަންމާގޯޅި އާއި އަތިރެގޭ މަގާ ދޭތެރޭ ލިންކް ރޯޑުގައެވެ. ފިހާރަ ހުޅުވާފައި ހުންނާނީ މާލެއެކޭ އެއްގޮތަށް ހުކުރުދުވަސް ފިޔަވައި ކޮންމެ ދުވަހެއްގެ ހެނދުނު 9:00 އިން ހަވީރު 6:00 އަށެވެ.
ސިބްކޯ އައްޑޫ އައުޓްލެޓް ހުޅުވުމުގެ ރަސްމިއްޔާތުގައި ގިނަ އަދަދެއްގެ ވިޔަފާރިވެރިންނާއި ކަސްޓަމަރުން ބައިވެރިވިއެވެ. ސިބްކޯ އިން ގެންނަ މުދާ މުޅި ރާއްޖެއަށް ފޯރުކޮށްދިނުމަށް އެކުންފުނިން ގެންދަނީ މަސައްކަތް ކުރަމުންނެވެ.
ފިހާރަ ހުޅުވުމުގެ ރަސްމިއްޔާތަށްފަހު މީޑިއާ އަށް މައުލޫމާތުދެއްވަމުން ސިބްކޯގެ މެނޭޖަރ މާކެޓިން އެންޑް ކޮމިއުނިކޭޝަންސް، އަޙުމަދު ހާނީ ނަޢީމް ވިދާޅުވީ އައްޑޫގައި ހުޅުވި ސިބްކޯގެ އައުޓްލެޓުންވެސް މާލޭގައި އެ ކުންފުނިން ވިއްކާ ހުރިހާ ބްރޭންޑެއްގެ މުދާ މޭލެއިން ވިއްކާ އަގުގައި ލިބެން ހުންނާނެ ކަމަށެވެ.
މި ފިހާރައިން ރީޓެއިލްކޮށްނާއި، ހޯލްސޭލްކޮށް މުދާ ވިއްކާނެ ކަމަށް ވެސް ހާނީ ވިދާޅުވިއެވެ. ސިބްކޯގެ ފިހާރައެއް އައްޑޫގައި ހުޅުވުމުގެ މައިގަނޑު މަޤުސަދަކީ އައްޑޫގައި ހުންނަ ވިޔަފާރިތަކަށާއި ރިސޯޓް އަދި ގެސްޓްހައުސްތަކަށާއި ކެފޭ، ރެސްޓޯރަންޓްގެ އިތުރުން އައްޑޫ ސިޓީގެ ރައްޔިތުންނަށް ސިބްކޯ އިން ރާއްޖެ ގެންނަ މުދާ އެއް ފުރާޅެއްގެ ދަށުން ފަސޭހައިން ލިބޭނެ މަގު ފަހުކޮށްދިނުން ކަމަށް ވެސް ހާނީ ވިދާޅުވިއެވެ.
