މަލޭ ސަރަޙައްދުގައި ޕިކްނިކް އައިލެންޑެއް ނުވަތަ ދަތުރުދާނެ ރަށެއް ތަރައްޤީކުރުމަށް އާއްމުންގެ ޚިޔާލު ހޯދުމަށް ނިންމައިފިއެވެ.
މިނިސްޓްރީ އޮފް ނެޝެނަލް ޕްލޭނިންގ އިން ހާމަކޮށްފައިވާ ގޮތުގައި ދަތުރު ދިއުމަށް ތަރައްޤީ ކުރާ ރަށާބެހޭގޮތުން އާއްމުންގެ ޚިޔާލު ހޯއްދެވުމުގެ ބައްދަލުވުން އޮންނާނީ މިމަހު 12 ވާ އަންގާރަ ދުވަހުގެ ހަވީރު 16:00 އިން 18.00އަށް ދަރުބާރުގޭ ހަކުރާ މާލަމުގައެވެ.
މާލޭ ސަރަޙައްދުގައި ހަދާ ޕިކްނިކް އައިލެންޑް ހެދުމަށް ހަމަޖެހިފައިވަނީ ތައިލޭންޑުގެ ސިންހަ އެސްޓޭޓުން އެނބޫދޫ ފިނޮޅު ހިއްކައިގެން ރިސޯރޓް ތަރައްޤީކުރުމަށް ހިއްކާ ރަށްތަކުގެ ތެރެއިން ރަށެއްގައެވެ.
މިއަހަރުގެ އޭޕްރީލްމަހު މިމަޝްރޫޢު އިޢްލާންކުރައްވަމުން ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙް ވިދާޅުވެފައި ވަނީ ޕިކްނިކް އައިލެންޑް ތަރައްގީ ކުރަނީ މި ޒަމާނުގައި އެ ފަދަ ރަށަކުން ލިބެން ޖެހޭ ހުރިހާ ޚިދުމަތެއް ލިބޭގޮތަށް ކަމަށެވެ. މާލެ ސަރަހައްދުގައި ދިރިއުޅޭ މީހުން ދަތުރުދާނެ ރަށެއް ކަނޑައެޅުމަކީ މި ސަރުކާރުގެ ފުރަތަމަ 100 ދުވަހުގެ ވައުދުތަކުގެ ތެރޭގައި ހިމެނޭ އެއްވަޢުދެކެވެ. ދަތުރުދާނެ ރަށެއްގެ ހިދުމަތާއެކު މާލޭގައު ދިރިއުޅޭ ރައްޔިތުންނަށް ދިމާވާ އިޖުތިމާއީ ގިނަ މައްސަލަތަކަކަށް ޙައްލު ލިބިގެންދާނެކަމަށް ވެސް ރައީސް އިބްރާޙީމް މުޙައްމަދު ޞާލިޙް ވަނީ ވިދާޅުވެފައެވެ. އަންނަ އަހަރުގެ ކުރީކޮޅު މިރަށަށް ދަތުރުދާން ފެށޭނެ ކަމަށް ވެސް އެމަނިކުފާނު ވަނީ ވިދާޅުވެފައެވެ.
