އޭޝިޔާގެ ވިޔަފާރީގެ ބާރުތައް ގުޅިގެން އެކުލަވާލި މުއާހަދާ ރީޖަނަލް ކޮމްޕްރިހެންސިވް އިކޮނޮމިކް ޕާޓްނަޝިޕް (އާރްސީއީޕީ) ގައި ބައިވެރިވާން އިންޑިޔާ ދެކޮޅު ހަދައިފިއެވެ.
އިގްތިސާދީ ގޮތުން ދުނިޔޭގައި އެންމެ ހަލުވިކޮށް ތަރައްގީ ވަމުންދާ ސަރަހައްދު ކަމުގައިވާ ދެކުނު އިރުމަތީ އޭޝިޔާގެ ގައުމުތަކުގެ ވެރިން ވަނީ ޗައިނާއިން ތާއީދުކޮށްފައިވާ މި އެއްބަސްވުން ވުޖޫދަށް ގެންނަން ފާއިތުވި ހަފުތާއެއްހާ ދުވަހުގެ ތެރޭގައި ގިނަ މަސައްކަތްތަކެއް ކޮށްފައެވެ.
16 ގައުމުގެ ބައިވެރިވުމާއެކު އެކުލަވާލާ މި މުއާހަދާގައި ބައިވެެރިވާން އޮތީ އެސޯސިއޭޝަން އޮފް ސައުތު އީސްޓް އޭޝިޔަން ނޭޝަންސް (އާސިޔާން) ގެ ދިހަ ގައުމު ކަމަށްވާ ބްރުނާއީ، ކެމްބޯޑިޔާ، އިންޑޮނޭޝިޔާ، ލާއޯސް، މެލޭޝިޔާ، މިޔަންމާ، ފިލިޕީންސް، ސިންގަޕޫރު، ތައިލޭންޑް އަދި ވިއެޓްނާމް ގެ އިތުރަށް އޮސްޓްރޭލިޔާ، ޗައިނާ، އިންޑިޔާ، ޖަޕާން، ނިއުޒީލޭންޑް އަދި ދެކުނު ކޮރެޔާއެެެވެ. މި 16 ގައުމު އެކުވުމުން އުފެދޭނީ ދުނިޔޭގެ އިގްތިސާދީ ޖަމާއަތެވެ. އެއީ އިގްތިސާދުގެ %32 ހިއްސާކުރާ، 3.6 ބިިލިއަން މީހުންގެ އާބާދީއެއް އޮތް، ޖުމްލަ ޖީޑީޕީ 38 ޓްރިލިއަން ޑޮލަރަށް އަރާ ޖަމާއަތަަކަށް ވާނެއެވެ.
އެހެންނަމަވެސް، ދިގު ދެމިގެން ދިޔަ މަޝްވަރާތަކަކަށް ފަހު އިންޑިޔާ ވަނީ މި މުއާހަދާގައި ބައިވެރިނުވާން ނިންމާފައެވެ. މި މުއާހަދާގައި ބައިވެރިވާ ގައުމުތަކުގެ ތެރެއިން އިންޑިޔާއަކީ ޗައިނާއާއި ޖަޕާނަށް ފަހު ތިންވަނައަށް އެންމެ ބޮޑު އިގްތިސާދަށް ވިޔަސް، އިންޑިޔާ ބައިވެރިވާން ފަސްޖެހޭ ސަބަބުތަކެއް އެބަހުއްޓެވެ. އޭގެ ތެރޭގައި، ޗައިނާ، ޖަޕާން އަދި އާސިޔާންގެ ގައުމުތަކުން އެތެރެކުރާ މުދާ އިންޑިޔާގެ ބާޒާރުގައި ގިނަވެދާނެ ކަމުގެ ބިރާއި، އޮސްޓްރޭލިޔާއާއި ނިއުޒީލޭންޑުގެ ކިރު އިންޑިޔާއަށް އެތެރެކުރަން ފަށައިފިނަަމަ އިންޑިޔާގެ ދަނޑުވެރިންނަށް ގެއްލުުން ވެދާނެ ކަމުގެ ބިރު ހިމެނެއެވެ.
ތައިލޭންޑުގައި އިއްޔެ ނިމުނު އާރސީއީޕީގެ ވެރިންގެ ބައްދަލުވުމަށް ފަހު ނެރުނު ބަޔާނުގައި ވަނީ 15 ގައުމުން 2020 ގައި މުއާހަދާގައި ސޮއިކުރުމަށް ބޭނުންވާ ހުރިިހާ އިގްތިސާދީ ނިންމުންތަކާއި، ގާނޫނީ އުސޫލުތަކުގެ މައްޗަށް އެއްބަސްވެފައިވާ ކަމުގައެވެ.
"އެހެންނަމަވެސް، ހައްލު ނުކުރެވި ހުރި، ގިނަ މައްސަަލަތަކާހެދި" އިންޑިޔާއިން މުއާހަދާގައި ބައިވެރި ނުވަން ނިންމިކަން ވެސް ބަޔާނުގައި ފާހަގަކޮށްފައި ވެއެވެ.
އާރސީއީޕީ ސަމިޓުގައި ވާހަކަފުޅު ދައްކަވަމުން އިންޑިޔާގެ ބޮޑުވަޒީރު ނަރެންދްރަ މޯދީ އިއްޔެ ވިދާޅުވީ އެ މުހާއަދާގައި ސޮއިކުރަން އޭނާގެ "ޟަމީރު ތަންނުދޭ" ކަމުގައެވެ.
ޗައިނާގެ ވައިސް މިނިސްޓަރ ފޯ ފްރިން އެފެއާޒް ލީ ޔޫޗަންގް ވިދާޅުވީ "ބައިވެރިވި 15 ގައުމުން ނިންމީ މުއަހަދާއާއިގެން ކުރިއަށް ދާން" ކަމުގައެވެ.
