ނޭޕާލުގެ މެދުތެރޭގައި އިއްޔެ ދަތުރުކުރަމުން ދިޔަ ބަހެއް މަގުން ކައްސާލައި ކޯރަކަށް ވެއްޓުމުގެ ސަބަބުން މަދުވެގެން 17 މީހުން މަރުވެއްޖެއެވެ. މަރުވި މީހުންގެ ތެރޭގައި ހަތް ކުޑަކުދިންވެސް ހިމެނެއެވެ.
ސިންދޫޕަލް ޗޯކް ޑިސްޓްރިކްޓްގައި މިހާދިސާ ހިނގީ ބަސް ކޮންޓުރޯލުނުވެ ގޮސް، 330 އަޑީގައި އޮތް ސަންކޯޝީ ކޯރަށް ވެއްޓިގެންނެވެ.
"މިހާތަނަށް 17 މީހުން މަރުވިކަން ވަނީ ޔަގީންކުރެވިފައި. އަދި 50 މީހަކު ޒަޚަމްވެފައިވޭ." ނޫސްވެރިންނަށް މައުލޫމާތު ދެއްވަމުން ޑިސްޓްރިކްޓް އޮފިޝަލް ގޯމާ ދޭވީ ޗެމްޖޯންގްވިދާޅުވިއެވެ. އޭނާ ވިދާޅުވި ގޮތުގައި ބަހުގެ ޑުރައިވަރުވެސް ހިމެނެނީ ޒަޚަމްވި މީހުންގެ ތެރޭގައެވެ.
ކޯރުގެ ތެރެއިން މީހުން ނެގުމަށް ފުލުހުންނަށް އެހީތެރިވީ އެ ސަރަހައްދުގައި ކުދި ބޯޓުފަހަރު ދުއްވާ މީހުންނެވެ. ފެނުނު މީހުން ސަލާމަތްކުރި ނަމަވެސް، އަދިވެސް ބަޔަކު ގެއްލިފައި ވުން އެކަށީގެން ވެއެވެ.
"ގެއްލިފައިވަނީ ކިތައް މީހުން ކަމެއް ނޭނގޭ. ބަހުން ދަތުރުކުރި މީހުންގެ އަދަދު ބެލެހެއްޓިފައި ނުވާތީ." ޗެމްޖޯންގް ވިދާޅުވިއެވެ.
މަގުތަކުގެ ހާލަތު ދެރަކަމާއި، އުޅަނދުތަކުގެ ފެންވަރު ދަށްވުމާއި، ދުއްވާ މީހުންގެ ފަރުވާކުޑަކަމުން ނުރައްކާތެރި ފަރުބަދަ މަތީ މަގުތަކުގައި ދަތުރުފަތުރު ކުރަންޖެހޭ ނޭޕާލުގައި މިފަދަ ހާދިސާތައް އާއްމުކޮށް ހިނގައެވެ.
ފާއިތުވި އޮކްޓޯބަރު މަހުގެ ތެރޭގައިވެސް މިގޮތަށް ބަހެއް ކޯރަކަށް ވެއްޓިގެން 11 މީހުން މަރުވެ 100 މީހުން ޒަޚަމްވެފައި ވެއެވެ.
