ސުޕްރީމް ކޯޓުން ހުސްވެފައިވާ ފަނޑިޔާރު ކަމުގެ މަގާމަށް އައްޔަން ކުރެއްވުމަށްޓަކައި، ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވާ ދެބޭފުޅުންގެ ތެރެއިން ގދ. މަޑެވެލި މޭނާ، އަލްއުސްތާޒު މަހާޒު އަލީ ޒާހިރު، އައްޔަން ކުރައްވަން ރައްޔިތުންގެ މަޖިލީހުން ދާދި ދެންމެއަކު ރުހުން ދެއްވައިފިއެވެ.
މަހާޒުގެ އިތުރުން ސ. ހުޅުދޫ ގޯރަންވިލާ އަލްއުސްތާޒާ ފާތިމަތު ދިޔާނާ ސައީދުގެ ނަންފުޅުވެސް ރައީސް ފޮނުއްވާފައިވާއިރު، މަޖިލީހުގައި ދާދި ދެންމެއަކު ނެގުނު ވޯޓުގައި މަހާޒު އައްޔަން ކުރައްވަން ތާއީދު ކުރައްވައި 55 މެމްބަރުން ވޯޓު ދެއްވާފައި ވެއެވެ. ނުފެންނަ ކަމަށް އެއްވެސް މެމްބަރަކު ވޯޓު ނުދެއްވައެވެ.
ޖުމްލަ ހަތް ފަނޑިޔާރުން ތިއްބަވާ ސުޕްރީމް ކޯޓުގެ ފަނޑިޔާރު ކަމަށް މަހާޒް އައްޔަން ކުރައްވަން މަޖިލީހުން މިއަދު ރުހުން ދެއްވިއިރު މަހާޒުގެ ނަންފުޅަކީ ރައީސުލްޖުމްހޫރިއްޔާ ޖޭއެސްސީގެ ލަފަޔަށްވެސް އެދިވަޑައިގެންނެވި ނަންފުޅެވެ.
ކުރީގެ ބަންޑާރަ ނައިބު ދިޔާނާގެ ނަންފުޅު ރައީސް ފޮނުއްވީ ޖޭއެސްސީން އެ ނަންފުޅު ރައީސްއަށް ފޮނުއްވުމުންނެވެ. ޖޭއެސްސީން ދިޔާނާގެ ނަންފުޅު ފޮނުއްވީ ފަނޑިޔާރު ކަމަށް ކުރިމަތި ލެއްވުމަށް އެފަރާތުން އާންމުކޮށް ހުޅުވާލުމުން އެކަމަށް ކުރިމަތިލެއްވި ބޭފުޅުންގެ ތެރެއިންނެވެ.
