އިނގިރޭސިވިލާތުގައި އަންނަ ޑިސެންބަރު މަހު 12 ވަނަ ދުވަހު އަވަސް އިންތިޚާބެއް ބޭއްވުމަށް އެގައުމުގެ ގާނޫނުހަދާ މަޖިލިސްގެ ތިރީ ގެ، ހައުސް އޮފް ކޮމަންސް އިން ރޭ ފާސްކޮށްފިއެވެ.
ބޮޑުވަޒީރު ބޮރިސް ޖޮންސަން އަވަސް އިންތިޚާބެއް ބޭއްވުމަށް މަސައްކަތްޕުޅުކުރައްވާތާ ކިތަންމެ ދުވަހެކެވެ. މީގެ ކުރިން އޭނާ އެކަން ހުށަހެޅުއްވި ކޮންމެ ފަހަރަކު އިދިކޮޅު މެންބަރުން ވަނީ އެކަމާ ދެކޮޅުހަދާފައެވެ. ނަމަވެސް އިނގިރޭސިވިލާތް ޔޫރަޕިއަން ޔުނިއަން (އީޔޫ) އިން ވަކިވުން (ބްރެގްޒިޓް) އަންނަ އަހަރުގެ ޖަނަވަރީ މަހު 31 ވަނަ ދުވަހަށް ލަސްކުރުމަށް ނިމުމާ ގުޅިގެން އަވަސް އާއްމު އިންތިޚާބަކަށް ދެކޮޅު ހެދުން އިދިކޮޅު ލޭބާ ޕާޓީން ހުއްޓާލައި، އިންތިޚާބަކަށް ތާއީދުކުރަން ނިންމީއެވެ.
ހައުސް އޮފް ކޮމަންސްގައި ރޭ ނެގި ވޯޓުގައި 438 މެންބަރުން ވަނީ ޑިސެންބަރު 12 ގައި އިންތިޚާބު ބޭއްވުމަށް ތާއީދުކުރައްވާފައެވެ. ދެކޮޅަށް ވޯޓުދެއްވީ އެންމެ 20 މެންބަރުންނެވެ.
އިންތިޚާބަށް ތާއީދުކުރަން ލޭބާ ޕާޓީން ނިންމި ނަމަވެސް ހައުސް އޮފް ކޮމަންސްގައި ތިއްބެވި އެޕާޓީއަށް ނިސްބަތްވާ ގިނަ މެންބަރުންތަކެއް އަވަސް އިންތިޚާބަކާ ދެކޮޅެވެ. އިންތިޚާބަކަށް ތާއީދުކުރައްވައި، ޕާޓީގެ ލީޑަރު ކޯބިންއާއެކު 127 މެންބަރަކު ވޯޓުދެއްވި ނަމަވެސް، 100 މެންބަރަކު ވޯޓުގައި ބައިވެރިވެވަޑައިނުގަންނަވައެވެ. އަދި 11 މެންބަރަކު ވަނީ ދެކޮޅަށް ވޯޓުދެއްވާފައެވެ.
ލޭބާ ޕާޓީން އަވަސް އިންތިޚާބަކަށް ދެކޮޅު ހަދަމުން ގެންދިޔައީ، އެއްބަސްވުމަކާ ނުލާ މިމަހު 31 ގައި އިނގިރޭސިވިލާތް އީޔޫއިން ވަކިވާން ބޮޑުވަޒީރު ޖޮންސަން މަސައްކަތްޕުޅުކުރައްވާތީ އެކަމާ ދެކޮޅުހެދުމުގެ ގޮތުންނެވެ. މިހާރު އެކަން އެގޮތަށް ނުވާނެކަން ޔަގީންވުމުން ލޭބާ ޕާޓީގެ ވިސްނުން ބަދަލުކުރީއެވެ.
"އެއްބަސްވުމަކާ ނުލާ ނުކުތުމުގެ މައްސަލަ މިހާރަކު ނެތް. އެހެންކަމުން އާއްމު އިންތިޚާބެއް ބޭއްވުމަށް މިރޭ އަހަރުމެން ތާއީދުކުރާނަން." ލޭބާ ޕާޓީގެ ލީޑަރު ޖެރަމީ ކޯބިން އިއްޔެ ހަވީރު ކުރެއްވި ޓުވީޓެއްގައި ވެއެވެ.
ބޮޑުވަޒީރު ޖޮންސްގެ އުއްމީދަކީ ޑިސެންބަރު 12 އިންތިޚާބުގައި އަޣުލަބިއްޔަތު ހޯއްދަވައިގެން، އޭނާ ބޭނުންފުޅު އެޖެންޑާއާއެކު އީޔޫއިން އިނގިރޭސިވިލާތް ބޭރުވުމެވެ. އޭނާ ވަނީ ބްރެގްޒިޓް މައްސަލައިގައި ކޮންޒާވެޓިވް ޕާޓީން ބޭރުކޮށްލި 21 މެންބަރުންގެ ތެރެއިން 10 މެންބަރަކު އަލުން ޕާޓީއަށް ވައްދަވައި، ޕާޓީގެ ޓިކެޓުގައި އިންތިޚާބުގައި ވާދަކުރެއްވުމުގެ ފުރުސަތު އެބޭފުޅުންނަށް ދެއްވާފައެވެ.
އިދިކޮޅު ލީޑަރު ޖެރަމީ ކޯބިންވެސް ހުންނެވީ އުއްމީދުގައެވެ. "މިއީ އަހަރުމެންގެ ގައުމު ބަދަލުކޮށްލަން ޖީލަކަށް އެންމެ ފަހަރަކު ލިބޭނެ ފުރުސަތެއް." އޭނާ ވިދާޅުވިއެވެ. އޭނާ އިތުރަށް ވިދާޅުވި ގޮތުގައި މި އިންތިޚާބުގައި ލޭބާ ޕާޓީން ކުރާނީ "އަހަރުމެންގެ ގައުމަށް ހަގީގީ ބަދަލުގެނައުމަށް ކުރެވޭނެ އެންމެ އުއްމީދީ ކެމްޕޭން" އެވެ.
ކުޑަ ދެ ޕާޓީ ކަމުގައިވާ ލިބަރަލް ޑިމޮކްރެޓްސް އާއި ސްކޮޓިޝް ނޭޝަނަލް ޕާޓީ (އެސްއެންޕީ) އިންވެސް ވަނީ އިންތިޚާބަށް ތާއީދުކޮށްފައެވެ.
