އިރާގު ސަރުކާރާ ދެކޮޅަށް މި އޮކްޓޯބަރު މަހުގެ ކުރީކޮޅު ފެށި މުޒާހަރާތައް މެދުކެނޑިފައި އޮތުމަށް ބުރާސްފަތި ދުވަހު އަލުން ފަށާއިރު، ބުރާސްފަތި ދުވަހާއި، ހުކުރު ދުވަސް ވެފައިވަނީ ވެރިރަށް ބަޣުދާދާއި، ދެކުނުގެ ޕްރޮވިންސުތަކުގައި އެ ދެ ދުވަސް ވީ ލޭ އޮހޮރުން ބޮޑު ދެ ދުވަހަށެވެ.
މި މަހު ކުރީ ކޮޅު ކުރި މުޒާހަރާތަކުގައި 157 މީހުން މަރުވެފައިވާ އިރު، ފާއިތުވި ދެ ދުވަހުގެ މުޒާހަރާތަކުގައި އެކަނި 40 އަށްވުރެ ގިނަ މީހުން މަރުވެ، 2300 އެއްހާ މީހުން ވަނީ ޒަޚަމްވެފައެވެ. މަރުވި މީހުންގެ ތެރޭގައި ވިހި އަހަރުން ދަށުގެ 6 ޒުވާނުންވެސް ހިމެނޭކަމަށް ވެއެވެ.
ބަޣުދާދާއި، ދެކުނުގެ ހަތް ޕްރޮވިންސެއްގައި އެތައް ހާސް ބަޔަކު މުޒާހަރާކުރަމުން ދާއިރު، އެމީހުން ގޮވާލަމުން ދަނީ ސަރުކާރު އިސްތިއުފާ ދިނުމަށާއި، ބޮޑުވަޒީރު ޢާދިލު ޢަބްދުލްމަހްދީގެ މައްޗަށް ޝަރީއަތް ހިންގުމަށާއި، އިންތިޚާބުތަކާ ބެހޭ ގާނޫނު ބަދަލުކުރުމަށާއި، ގާނޫނުހަދާ މަޖިލީހުގެ އިންތިޚާބު އަވަސްކުރުމަށެވެ.
މުޒާހަރާކުރި މީހުން ވަނީ ބަޣުދާދުގެ ގްރީން ޒޯނަށް ވަންނަން މަސައްކަތްކޮށްފައެވެ. އެމީހުން ހުއްޓުވުމަށް ސަލާމަތީ ބާރުތަކުން ގިނަ އަދަދެއްގެ ރަބަރު ވަޒަނާއި، ކަރުނަ ގޭސް ބޭނުންކޮށްފައި ވެއެވެ. އިރާގުގެ ސަލާމަތީ މަސްދަރުތަކުން ޚަބަރުދޭ ގޮތުގައި ހުކުރު ދުވަހުގެ މުޒާހަރާތައް ނިމުނު އިރު ސަރުކާރާއި ސިޔާސީ ޕާޓީތަކުގެ 50 އިމާރާތެއްގައި ވަނީ ރޯކޮށްލާފައެވެ.
ދެކުނުގެ ޕްރޮވިންސެއް ކަމުގައިވާ ޛީޤާރްގެ ވެރިރަށް ނާޞިރިއްޔާގައި 3 ހާހަށްވުރެ ގިނަ މީހުން ވަނީ ޕްރޮވިންސު ސަރުކާރު އޮފީސް އިމާރާތަށް ވަދެ އެތަނުގައި ރޯކޮށްލާފައެވެ. ބަޞަރާގައި ވެސް އެ ޕްރޮވިންސުގެ ސަރުކާރުގެ އޮފީސްތައް ހުންނަ އިމާރާތަށް 4 ހާހަށްވުރެ ގިނަ މީހުން ވަދެގެންފައިވާ ކަމަށް ޚަބަރުލިބެއެވެ.
ދެކުނުގެ ޕްރޮވިންސުތަކުގައި ހަމަނުޖެހުން ބޮޑުވުގެ ސަބަބުން ސަރުކާރުން މިހާރު ވަނީ ދެކުނުގެ ހަތަރު ޕްރޮވިންސުކަމުގައިވާ ބަޞަރާ، ޛީޤާރް، އަލްމުޘައްނާ އަދި ވާސިޠުގައި ކާފިއު ހިންގާފައެވެ.
