ސައޫދީ އަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒު އެގައުމުގެ ވަޒީރުންގެ މަޖިލީހަށް ބައެއް ބަދަލުތައް ގެންނަވައިފިއެވެ. މި ބަދަލުތަކުގައި ޚާރިޖީ ވަޒީރު އިބްރާހީމް އަލްޢައްސާފުއާއި ދަތުރުފަތުރާ ބެހޭ ވަޒީރު ނަބީލް ބިން މުޙައްމަދު އަލްޢާމޫދީ ވަނީ މަގާމުން ދުރުކުރައްވާފައެވެ.
ރޭގެ ވަގުތެއްގައި ސަލްމާން ރަސްގެފާނު ނެރެއްވި ޝާހީ ދެ އަމުރުފުޅެއްގައި ވަކިކުރެއްވި ދެ ވަޒީރުންގެ މަގާމަށް އާ ދެބޭފުޅަކު ވަނީ އައްޔަންކުރައްވާފައެވެ. ފޮރިން މިނިސްޓަރު ނުވަތަ ޚާރިޖީ ވަޒީރުކަމަށް މިފަހަރު އައްޔަންކުރައްވާފައި ވަނީ ޝާހީ އާއިލާގެ ބޭފުޅެކެވެ. އެއީ އަމީރު ފައިޞަލް ބިން ފަރްޙާން ބިން ޢަބްދުﷲ އާލުސުޢޫދު އެވެ. ޓްރާންސްޕޯޓް މިނިސްޓަރު ނުވަތަ ދަތުރުފަތުރާ ބެހޭ ވަޒީރުކަމަށް އައްޔަންކުރައްވާފައި ވަނީ ޞާލިޙް ބިން ނާޞިރު ބިން އަލްޢަލީ އަލްޖާސިރު އެވެ.
ކުރީގެ ޚާރިޖީ ވަޒީރު އިބްރާހީމް އަލްޢައްސާފު މަގާމުގައި ހުންނެވީ 10 މަސްދުވަހުއެވެ.
1974 ވަނަ އަހަރު އުފަންވެވަޑައިގަތް ފައިޞަލް ބިން ފަރްޙާން އާލްސުޢޫދު ކުރިން ހުންނެވީ ޖަރުމަނުގައި ހުންނަވާ ސައުދީ ސަފީރުގެ މަގާމުގައެވެ. އޭގެ ކުރިން އޭނާ ވަނީ އެމެރިކާގައި ހުންނަ ސައޫދީ އެންބަސީގެ އިސް މުސްތަޝާރެއްގެ މަގާމުވެސް އަދާކުރައްވާފައެވެ. ޑިޕްލޮމެޓިކް ދާއިރާގެ ތަޖުރިބާގެ އިތުރަށް އޭނާއަކީ ހަތިޔާރުގެ ދާއިރާގައިވެސް ތަޖުރިބާ ހޯއްދަވާފައިވާ ބޭފުޅެކެވެ. އޭނާ ވަނީ ސައުދީ އަރަބިއަން މިލިޓަރީ އިންޑަސްޓްރީޒް ގެ ގަވަނިންގ ބޯޑުގެ މެންބަރުކަންވެސް ކުރައްވާފައެވެ.
ވަލީއަހްދު މުޙައްމަދު ބިން ސަލްމާންގެ އަރިސް ބޭފުޅެއްކަމުގައި ވާ ފައިޞަލް ބިން ފަރްޙާންއަކީ އަސްކަރީ ސިނާއަތުގެ ދާއިރާގައި 15 އަހަރުގެ ތަޖުރިބާ ލިބިވަޑައިގެން ހުންނެވި ބޭފުޅެކެވެ.
އާ ޚާރިޖީ ވަޒީރަކީ އީރާނާ މެދު ހަރުކަށި ސިޔާސަތެއް ގެންގުޅުއްވާ ބޭފުޅެކެވެ. ޖަރުމަގައި ހުންނަވާ ސަފީރުގެ މަގާމުގައި ހުންނަވައިގެން އޭނާ ވަނީ އީރާނާ ދެކޮޅަށް އަސްކަރީ ފިޔަވަޅު އެޅުމަކީ ވެސް އޮތް އިޚްތިޔާރެއް ކަމަށް ވިދާޅުވެ އިންޒާރު ދެއްވާފައެވެ. އަދި އޭނާއަކީ އިސްތަންބޫލުގައި ހުންނަ ސައޫދީ ކޮންސިއުލޭޓުގައި ނޫސްވެރިޔާ ޖަމާލު ޚާޝުޤްޖީ މަރާލުމުގައި ވެސް އިސް ދައުރެއް އަދާކުރައްވާފައިވާ ކަމަށް ތުހުމަތުކުރެވޭ ބޭފުޅެކެވެ. އޭރު އޭނާ ހުންނެވީ އެމެރިކާގައި ހުންނަ ސައޫދީ އެންބަސީގައެވެ.
އީރާނާ ސައޫދީ އަރަބިއްޔާއާ ދެމެދު ނުތަނަސްވަންކަން އިތުރުވެފައިވާ ދަނޑިވަޅެއްގައި، އީރާނަށް ދޫދެއްވުމަށް ދެކޮޅުހައްދަވާ، އަސްކަރީ ސިނާއަތާ ގުޅުންހުރި ބޭފުޅަކު އައްޔަންކުރުމަކީ އީރާނަށް ސައޫދީން ދިން މެސެޖެއް ކަމުގައި ބެލެވިދާނެއެވެ.
