މިއަދު ދެވަނަ ދައުރަކަށް ހުވައިކުރެއްވި އިންޑޮނޭޝިޔާގެ ރައީސު ޖޯކޯ ވިދޯދޯ އައު ދައުރަށް އެކުލަވާލައްވާ ވަޒީރުންގެ މަޖިލީހުގައި ބައިވެރިވަޑައިގަތުމަށް އިދިކޮޅު ލީޑަރު، އަދި ފާއިތުވި ރިޔާސީ ދެ އިންތިޚާބުގައި ވެސް އޭނާއާ ވާދަކުރެއްވި ޕްރަބޯވޯ ސުބިއާންޓޯއަށް ދައުވަތު ދެއްވައިފިއެވެ. ސުބިއާންޓޯ ވަނީ އެ ދައުވަތު ގަބޫލުފުޅުކުރައްވާފައެވެ.
"ވަޒީރުންގެ މަޖިލިސް ވަރުގަދަކުރުމަށް (އެ މަޖިލީހާ ގުޅުމަށް) އަހަރުމެންގެ ކިބައިން އެދިވަޑައިގެންފައި ވަނީ. އަހަރުމެން މިތިބީ ގުޅެން ތައްޔާރަށް." ގެރިންދާ ޕާޓީގެ ލީޑަރު ސުބިއާންޓޯ ވިދާޅުވިއެވެ.
"އޭނާ (ރައީސު) އުއްމީދުކުރައްވާ ލަނޑުދަނޑިއަށް ވާސިލުވުމަށް އަހަރެންނަށް ކުރެވުނުހާ މަސައްކަތެއް ކުރާނަން." އޭނާ އިތުރަށް ވިދާޅުވިއެވެ.
ސިފައިންގެ ކުރީގެ ޖެނެރަލެއް ކަމުގައިވާ ސުބިއާންޓޯއަށް ދެއްވަނީ ޑިފެންސް މިނިސްޓަރުކަން ކަމަށް އަޑު ފެތުރިފައިވާތީ އެކަމާ ގުޅިގެން ދެންނެވުނު ސުވާލަށް އޭނާ ސީދާ ޖަވާބެއް ނުދެއްވައެވެ. އޭނާ ވިދާޅުވީ ދިފާއީ ކަންކަމުގައި އެހީތެރިވުމަށް ރައީސު ވިދޯދޯ އެދިވަޑައިގެންފައިވާ ކަމުގައެވެ.
މީގެ އިތުރަށް މަޝްހޫރު ޓެކްނޮލޮޖީ ކުންފުނި ގޯޖެކްގެ ބާނީ އަދި ސީއިއޯ ނަދީމް މަކާރިމްއަށްވެސް ރައީސު ވިދޯދޯވަނީ ވަޒީރުންގެ މަޖިލީހުގައި ހިމެނިވަޑައިގަތުމުގެ ދައުވަތު ދެއްވާފައެވެ. ވަޒީރުންގެ މަޖިލީހާ ގުޅިވަޑައިގަތުމަށްޓަކައި ނަދީމް ވަނީ ގޯޖެކް ކުންފުނިން މިއަދު އިސްތިއުފާ ދެއްވާފައެވެ.
"މިއަދުން ފެށިގެން ގޯޖެކްގައި އަހަރެންގެ އެއްވެސް މަގާމެއް އަދި ތަންފީޒީ ބާރެއްވެސް ނޯންނާނެ." ނަދީމް ވިދާޅުވިއެވެ.
އެމެރިކާގެ ހާވާޑް ބިޒިނަސް ސްކޫލުން މަތީ ތައުލީމު ހާސިލުކުރައްވާފައިވާ ނަދީމް މަކާރިމް 2010 ވަނަ އަހަރު ގޯޖެކް އުފެއްދެވީ އިންޑޮނޭޝިޔާގައި އޭރު އޮޅުން ބޮޅުން ބޮޑު ސައިކަލް ޓެކްސީ 'އޯޖެކް'ގެ ޚިދުމަތް ޒަމާނީ ވަސީލަތެއްގެ ތެރެއިން ދީ އެ ޚިދުމަތް ފަސޭހައިން އިންތިޒާމުކުރެވިގެން ދެވޭ ގޮތް ހެދުމަށެވެ. މިއަދު އެއީ މުޅި ދެކުނު އޭޝިޔާއަށް ފެތުރިފައިވާ 10 ބިލިއަން ޑޮލަރުގެ، ޑިޖިޓަލް ޚިދުމަތްދޭ ޓެކްނޮލޮޖީ ކުންފުންޏެކެވެ.
