ޖުޑީޝަލް ސާވިސް ކޮމިޝަން (ޖޭއެސްސީ) އިން، ފެމެލީ ކޯޓްގެ އިސް ޤާޒީ ހަސަން ސަޢީދުގެ މައްސަލަ ބެއްލެވުމަށްފަހު، އޭނާއާމެދު އަޅާ ފިޔަވަޅެއްގެ ގޮތުން ނަސޭހަތް ދިނުމަށް ފަހު، ކްރިމިނަލް ކޯޓަށް ބަދަލު ކުރަން ނިންމައިފި އެވެ.
އިސްޤާޒީ ޙަސަން، ކްރިމިނަލް ކޯޓަށް ބަދަލު ކުރަން ނިންމައިފައި ވީނަމަވެސް، އޭނާއާމެދު، ފަނޑިޔާރެއްގެ ސުލޫކަށް އަސަރުކުރާ ފަދަ ކަންތައްތަކެއް ހުރި ކަމަށް ތަޙްޤިޤް ކޮމެޓީން ނިންމި ނިންމުން ޖޭސްއެސްސީ އިން ވަނީ ދަމަހައްޓާފައި ކަމަށް އެކޮމިޝަންގެ ނޫސްބަޔާނުގައިވެއެވެ.
ފެމެލީ ކޯޓްގެ އިސްޤާޒީގެ މައްސަލައިގައި ޖޭއެސް ސީގެ ތަޙްޤީގު ކޮމެޓީން ނިންމާފައި އޮތީ އޭނާ ފަނޑިޔާރު ކަމުން ވަކިކުރަން ރައްޔިތުންގެ މަޖިލީހަށް ފޮނުވުމަށެވެ. ނަމަވެސް ކޮމެޓީގެ އެ ނިންމުމަށް ޖަވާބުދާރީވާން އިސް ޤާޒީ ޙަސަންއަށް ފުރުސަތު ދެއްވުމަށް ފަހު، އޭނާ ވަކިކުރަން މަޖިލީހަށް ފޮނުވުމަށް ތަޙްޤީގު ކޮމެޓީން ދިން ލަފާގެ ބަދަލުގައި ފިޔަވަޅެއްގެ ގޮތުން ނަޞޭޙަތް ދިނުމާ އެކު އެހެން ކޯޓަކަށް ބަދަލު ކުރަން ޖޭއެސްސީ އިން ނިންމާފައިވާ ކަމަށް އެކޮމިޝަންގެ ނޫސްބަޔާނުގައިވެއެވެ. އެގޮތުން ނިންމައިފައިވަނީ ކްރިމިނަލް ކޯޓަށް ގާޒީ ޙަސަން ބަދަލުކުރެއްވުމަށެވެ.
ފެމެލީ ކޯޓްގެ އިސްގާޒީ ޙަސަން ސަޢީދުގެ މައްސަލަ ޖޭއެސްސީން ބަލަން ފެށުމާ ގުޅިގެން، މިދިޔަ ޖޫން މަހުން ފެށިގެން އޭނާ ހުންނެވީ ސަސްޕެންޑްކޮށްފަ އެވެ.
