ސިވިލް ސާވިސް ކޮމިޝަން (ސީއެސްސީ) ގެ ނައިބު ރައީސް ކަމުގައި ހުންނެވި ޝަހީދު މުހައްމަދު ކޮމިޝަނުގެ މެމްބަރު ކަމުން ވަކިކުރުމުގެ މައްސަލަ މަޖިލީހުގެ މިނިވަން މުއައްސަސާތަކާބެހޭ ކޮމިޓީން ބެލުމަށްޓަކައި ރިޔާސަތުން އެ މައްސަލަ އެ ކޮމިޓީއަށް މިއަދު ފޮނުވައިފިއެވެ.
މަޖިލީހުގެ ރިޔާސަތުން، މަޖިލީހުގެ ރައީސް މުޙަންމަދު ނަޝީދު އިއުލާނު ކުރެއްވި ގޮތުގައި ޝަހީދު މަގާމުން ވަކިކުރުމުގެ މައްސަލައެއް މިނިވަން މުއައްސަސާތަކާބެހޭ ކޮމިޓީން ކުރިޔަށް ގެންދަން ބޭނުންވާތީ ރިޔާސަތަށް އެކަން ވަނީ އަންގަވާފައެވެ. އެހެންކަމުން ޝަހީދު ވަކިކުރުމަށްޓަކައި ކުރަންޖެހޭ ދިރާސާތައް ދެން ކުރިޔަށްދާނީ މިނިވަން މުއައްސަސާތަކާބެހޭ ކޮމިޓީގައެވެ. އެއަސްފަހު ކޮމިޓީން ތައްޔާރުކުރި ރިޕޯޓު މަޖިލީހުގެ ތަޅުމަށް ފޮނުވާނެއެވެ.
މިނިވަން މުއައްސަސާތަކޭބެހޭ ކޮމިޓީން ޝަހީދުގެ މައްސަލަ ބަލަން ނިންމީ ސިވިލްސާވިސް މުއައްޒަފުންގެ ހައްގަށް ޝަހީދު އަރާވަޑައިގެންފައިވާ ކަމުގެ ތުހުމަތުތަކެއް ކުރެވޭތީއެވެ. ޝަހީދުގެ މައްސަލަ ކޮމިޓީއަށް ހުށަހަޅުއްވީ ބާރަށު ދާއިރާގެ މެމްބަރު އަޙްމަދު އަބްދުﷲއެވެ.
