އެމެރިކާގެ ރައީސު ޑޮނާލްޑް ޓްރަމްޕް ތުރުކީއާ ދެކޮޅަށް ދަތިކުރުމުގެ ފިޔަވަޅު އަޅުއްވައިފިއެވެ. މިއާއެކު އެމެރިކާއިން ވަނީ ތުރުކީން ސީރިޔާގެ އިރުއުތުރުގައި ކުރިއަށް ގެންދާ އަސްކަރީ އޮޕަރޭޝަން ވަގުތުން ހުއްޓާލުމަށް ގޮވައިލާފައެވެ.
ތުރުކީން ކުރުދީ ހަނގުރާމަވެރިންނާ ދެކޮޅަށް ކުރިއަށް ގެންދާ އޮޕަރޭޝަނުގައި ފާއިތުވި ބުދަދުވަހު ސީރިޔާ ސަރަހައްދަށް ވަނީ، އެމެރިކާ ސިފައިން އެކަމަށް މަގުފަހިކޮށް އެ ސަރަހައްދުން ފަހަތަށް ޖެހުމުންނެވެ. ނަމަވެސް ފަހުން އެމެރިކާއިން ބުނީ ތުރުކީން ކުރުދީންނަށް ހަމަލާދިނުމަށް އާބަސް ނުބުނާކަމަށާ، ސިފައިން ފަހަތަށް ޖެއްސީ ތުރުކީ ސިފައިންނާ ކުރިމަތިލުމެއް ހިނގާފާނެތީ، އެ ސަރަހައްދުގައި ނުތިބެން ވެގެން ކަމަށެވެ.
އެމެރިކާގެ ޓްރެޜަރީ ޑިޕާޓްމަންޓް (މާލީ ވުޒާރާ) އިން ނެރުނު ބަޔާނެއްގައިވާ ގޮތުން، ތުރުކީގެ ހަމަލާ ވަތުގުން ހުއްޓާލުމަށް މަޖުބޫރުކުރުމުގެ ގޮތުން ތުރުކީ ސަރުކާރުގެ ތިން ވަޒީރަކާ ދެކޮޅަށް ތަދިކުރުމުގެ ފިޔަވަޅު އަޅަން ރައީސު ޓްރަމްޕް ވަނީ އަމުރު ނެރުއްވާފައެވެ. އެ ތިން ވަޒީރުންނަކީ ދިފާއީ ވަޒީރު ހުލޫސީ އަކަރް، ދާޚިލީ ވަޒީރު ސުލައިމާން ސޮއިލޫ އަދި ހަކަތައާ ބެހޭ ވަޒީރު ފާތިހު ޑޮންމޭޒް އެވެ.
ރައީސު ޓްރަމްޕް ނެރުއްވި ބަޔާނެއްގައި ވިދާޅުވީ "ތުރުކީގެ ވެރިން މި ނުރައްކާތެރި ފަނާކުރަނިވި މަގުން ކުރިއަށް ވަޑައިގަންނަވާނަމަ ނިކަން އަވަހަށް ތުރުކީގެ އިގްތިސާދު ފުނޑުފުނޑުކޮށްލުމަށް" ތައްޔާރަށް ހުންނެވި ކަމުގައެވެ.
އޭނާ ވިދާޅުވީ ތުރުކީ ސަރުކާރާއެކު މަޝްވަރާކުރެއްވުމަށް ނާއިބު ރައީސު މައިކް ޕެންސްއާއި ނޭޝަނަލް ސެކިއުރިޓީ އެޑްވަޒަރު ރޮބަޓް އޯބަރާޔަން ވަރަށް އަވަހަށް އަންކަރާއަށް ފޮނުއްވާނެ ކަމުގައެވެ.
ތިން ވަޒީރުންނާ ދެކޮޅަށް ދަތިކުރުގެ ފިޔަވަޅު އެޅުއްވުމުގެ އިތުރަށް ރައީސު ޓްރަމްޕް ވަނީ ތުރުކީއާ އެކު ކުރިއަށްދާ ވިޔަފާރީގެ މަޝްވަރާތައް މަޑުޖައްސާލަން ނިންމަވައި، ތުރުކީގެ ދަގަނޑުން ނަގާ ޑިއުޓީ %50 ބޮޑުކުރުމަށް ނިންމަވާފައެވެ.
ތުރުކީން ބުނާ ގޮތުގައި އެގައުމުން އިރުއުތުރު ސީރިޔާގައި ފަށާފައިވާ 'ސުލްހައިގެ އާރު' އަސްކަރީ އޮޕަރޭޝަނަކީ ބައިނަލްއަގުވާމީ ގާނޫނުތަކާ، އދ. ގެ ސަލާމަތީ މަޖިލީހުގެ ގަރާރުތަކާ އެއްގޮތްވާ ގޮތުގެ މަތިން އަމިއްލަ ނަފުސުގައި ކުރިއަށް ގެންދާ އޮޕަރޭޝަނެކެވެ. މަގްސަދަކީ ސީރިޔާގެ ކުރުދީންގެ ޖަމާއަތް ޕީޕަލްސް ޕްރޮޓެކްޝަން ޔުނިޓްސް (ވައިޕީޖީ) ގެ ހަނގުރާމަވެރިންގެ މައްޗަށް އެކުލެވޭ ސީރިޔަން ޑިމޮކްރެޓިކް ފޯސަސް (އެސްޑީއެފް) އިން ކޮންޓުރޯލުކުރާ ފުރާތު ކޯރުގެ އިރުމަތީ ސަރަހައްދުތަކުން ކުރުދީ 'ޓެރަރިސްޓުން' ބޭރުކޮށް އެ ސަރަހައްދު 'ސާފުކުރުމެވެ.'
މީގެ ކުރިން ބައްޝާރުލް އަސަދުގެ ސަރުކާރުގެ ދުޝްމަނުންގެ ގޮތުގައި ތިބި ކުރުދީ ހަނގުރާމަވެރިން ވަނީ ތުރުކީގެ ހަމަލާއާ ގުޅިގެން ސީރިޔާ ސަރުކާރުގެ ސިފައިންގެ ގޮޅަށް ޖެހި ސީރިޔާގެ ސިފައިން އެ ސަރަހައްދަށް ވަނުމަށް މަގުފަހިކޮށްދީފައެވެ. މިކަމުގެ ސަބަބުން ސީރިޔާ ސިފައިންނާއި ތުރުކީ ސިފައިންގެ މެދުގައި އެ ސަރަހައްދުގައި ކުރިމަތިލުމެއް ހިނގާފާނެ ކަމުގެ ބިރު މިހާރު ވަނީ ބޮޑުވެފައެވެ.
