ޢިލްމުވެރީންގެ އިލްތިމާސް: އެމްޑީއެންއަށް ފިޔަވަޅުއަޅުއްވައި، އެ ޖަމްޢިއްޔާ އުވާލަ ދެއްވާ!

އެމްޑީއެން އަށް އަޅަންޖެހޭ ޤާނޫނީ ފިޔަވަޅުތައް އަޅުއްވައި އެ ޖަމްޢިއްޔާ އުވާލެއްވުމަށް ކަމާ ބެހޭ އިދާރާތަކަށް ރާއްޖޭގެ ދީނީ ޢިލްމުވެރީން އިލްތިމާސް ކުރައްވައިފިއެވެ. މިއަދު ހަވީރު ޢިލްމުވެރީން ބޭއްވި ނޫސްވެރީންގެ ބައްދަލުވުމުގައި ޢިލްމުވެރީންގެ ފަރާތުން އިލްތިމާސް ހުށަހަޅައިދެއްވީ ޝައިޚު މުޙައްމަދު ލަޠީފް ޢަލީ އެވެ.

"މިހާރު ރައްޔިތުންގެ މެދުގައި އުފެދިފައިވާ ނުތަނަވަސްކަން ޙައްލުކޮށްދެއްވުމުގެ ގޮތުންނާއި އިސްލާމްދީނާ ޚިލާފު ކޮންމެ ޢަމަލަކާ މެދު ކަމާބެހޭ އިދުގެ ދާާރާތަކުން ފިޔަވަޅު އަޅުއްވާނެކަމުގެ ޔަޤީންކަމުގެ ސާފު މެސެޖު ރައްޔިތުންނަށް ފޯރުކޮށްދެއްވުމަށްޓަކައި އެމްޑީއެން އަށް އަޅަންޖެހޭ ޤާނޫނީ ފިޔަވަޅު އެޅުއްވުމާއި އެ ޖަމްޢިއްޔާ އުވާލެއްވުން" ކަމާ ބެހޭ އިދާރާތަކަށް ކުރެއްވި އިލްތިމާސްގައި ހިމެނެއެވެ.

އިސްލާމީ އުޞޫލުތަް ނަގަހައްޓައި ޙިމާޔަތް ކުރުމަށާއި ދީނާ ދެކޮޅަށް ހިންގޭ ޖަރީމާތައް ވަގުތުން ވަގުތައް ހުއްޓުވުމަށްޓަކައި ކުރަންޖެހޭ ކޮންމެ ކަމެއް ވަގުތުން ވަގުތަށް ކުރެއްވުމަށް ވެސް ކަމާ ބެހޭ އިދާރާތަކަށް ދީނީ ޢިލްމުވެރީން ވަނީ އިލްތިމާސް ކުރައްވާފައެވެ. އެއްވެސް ކަމެއްގައި އަޅަންޖެހޭ ފިޔަވަޅަށް ފަސްޖެހިވަޑައިނުގަންނެވުމަށާއި އިސްލާމީ އުޞޫލު ނެގެހެއްޓުމަށް ކުރެވޭ ކޮންމެ މަސައްކަތެއްގައި އެއްބާރުލެއްވުމަށް އިދާރާތަކަށް ވެސް ވަނީ އިލްތިމާސްކުރައްވާފައެވެ.

ކަމާބެހޭ އިދާރާތަކުގެ އިތުރުން ޢިލްމުވެރީންނަށާއި ރައްޔިތުންނަށް ވެސް ޢިލްމުވެރީން ވަނީ އިލްތިމާސެއް ކުރައްވައިފައެވެ.

ޢިލްމުވެރީންނަށް ކުރައްވާފައވާ އިލްތިމާސަކީ ދީނާ ދެކޮޅަަށް ހިންގޭ ކޮންމެ ޙަރަކާތަކާ ގުޅިގެން އެކަމުގެ ޙުކުމްތައް ރައްޔިތުންނަށް ހާމަކޮށްދިނުމުގައި ހުރިހާ ޢިލްމުވެރީން އެކަތިގަނޑެއްގެ ގޮތުގައި މަސައްކަތް ކުރެއްވުމަށާއި ރައްޔިތުންނަށް ހެޔޮގޮތް އަންގަވައިދެއްވުމުގައި ކުރެވެންހުރި ހުރިހާ މަސައްކަތެއް ކޮންމެ ޢިލްމުވެރިއަކުވެސް ކުރައްވަމުން ގެންދެވުމެވެ.

ރައްޔިތުންނަށް ކުރައްވަައިފައިވަ އިލްތިމާސަކީ ދަރީން ހެޔޮގޮތުގައި ތަރުބިއްޔަތުކުރުމަށާއި ދީނީ ތަޢުލީމު އޭގެ ރަނގަޅު ގޮތުގައި ދަރީންނަސް ފޯރުކޮށްދެއްވައި އިސްލާމީ އުޞޫލުތަކަށް ދަރީންގެ ހިތުގައި ލޯބި ޖެއްސެވުމަށް މަސައްކަތް ކުރުމެވެ.

މިައދު ހަވީރު ބޭއްވި ދީނީ ޢިލްމުވެރީންގެ ނޫސްވެރީންގެ ބައްދަލުވުމުގައި ރާއްޖޭގެ ގިނަ ޢަދަދެއްގެ ދީނީ ޢިލްމުވެރީން ބައިވެރިވެވަޑައިގެންނެވިއެވެ.