ސައޫދީ އަރަބިއްޔާގެ ދިފާއު ވަރުގަދަކުރުމަށް އެމެރިކާ ސިފައިންގެ އިތުރު 3000 މީހުންނާއި ހަތިޔާރު ސައޫދީ އަރަބިއްޔާއަށް ފޮނުވުމަށް އެމެރިކާގެ ދިފާއީ ވުޒާރާ، ޕެންޓަގަންއިން އިއްޔެ ނިންމައިފިއެވެ.
އެމެރިކާގެ ސެކްރެޓަރީ އޮފް ޑިފެންސް (ދިފާއީ ވަޒީރު) މާކް އެސްޕާ ވަނީ ސިފައިންގެ 3000 މީހުންގެ އިތުރަށް، ޕެޓްރިއޮޓިކް މިސައިލް ދެ ސިސްޓަމާއި، ބެލިސްޓިކް މިސައިލުން ދިފާއުވުމަށް ބޭނުންކުރާ ތާޑް މިސައިލް ސިސްޓަމަކާއި، ހަނގުރާމަމަތީ މަތިންދާބޯޓުގެ ދެ ސްކުއާޑްރަން (ސްކުއާޑްރަންއެއްގައި މަދުވެގެން 12 މަތިންދާބޯޓު ހިމެނޭނެ) ސައޫދީ އަރަބިއްޔާއަށް ފޮނުވުމުގެ ހުއްދަ ދެއްވާފައި ކަމަށް ޕެންޓަގަންއިން ނެރުނު ބަޔާނެއްގައި ވެއެވެ.
އަރާމްކޯގެ ތެޔޮ ސާފުކުރާ ކާރުޚާނާތަކަށް ދިން ހަމަލާތަކަށް ފަހު ސައޫދީ އަރަބިއްޔާއިން ދަނީ އެގައުމުގެ ދިފާއު ވަރުގަދަ ކުރުމަށް މަސައްކަތް ކުރަމުންނެވެ. މިކަމުގައި އެ ގައުމުން އެންމެ ބޮޑަށް ހޯދަނީ އެމެރިކާގެ އެހީތެރިކަމެވެ.
މާކް އެސްޕާ ވިދާޅުވި ގޮތުގައި އިތުރު ހަތިޔާރާއި ސިފައިން ސައޫދީ އަރަބިއްޔާ ފޮނުވަނީ ވަލީއަހުދު މުޙައްމަދު ބިން ސަލްމާންގެ އެދިވަޑައިގަތުމަށެވެ.
ޕެންޓަގަންއިން ބުނި ގޮތުގައި މެދުއިރުމަތީގައި ހަރަކާތްތެރިވާ އެމެރިކާގެ ސެންޓްރަލް ކޮމާންޑުގެ ސިފައިންގެ އަދަދު ވަނީ މޭ މަހުން ފެށިގެން 14000 އަށް އިތުރުކޮށްފައެވެ.
ސައޫދީ އަރަބިއްޔާއަށް އިތުރު ހަތިޔާރާއި ސިފައިން ފޮނުވަން ނިންމުމާ ގުޅިގެން އެމެރިކާގެ ރައީސު ޑޮނާލްޑް ޓްރަމްޕް ވިދާޅުވީ، ސައޫދީ އަރަބިއްޔާއަށް ފޮނުވާ އެމެރިކާ ސިފައިންގެ ހުރިހާ ޚަރަދެއް ބަލަހައްޓާނީ އެގައުމުން ކަމުގައެވެ.
"ސައޫދީ އަރަބިއްޔާއަށް އެހީވުމަށް އަހަރުމެން އިތުރު ސިފައިންނާއި ހަތިޔާރު މެދުއިރުމައްޗަށް ފޮނުވާނަން. އަހަރުމެން ކުރާ ހުރިހާ ކަމަކަށް އަގުދައްކަން ސައޫދީ އަރަބިއްޔާ ވަނީ އެއްބަސްވެފައި........ ސައޫދީ އަރަބިއްޔާއިން ވަނީ އަހަރުމެންގެ އެހީގެ ހުރީހާ ޚަރަދަކާ ހަވާލުވެފައި. އަހަރުމެން އެކަމުގެ އަގު ވަޒަންކުރަން." ޓްރަމްޕް ވިދާޅުވިއެވެ.
