މުޖުމައެއް ބިނާ ކުރުމުގެ އެންމެ މުހިންމު ބަޔަކީ މުދައްރިސުން ނުވަތަ ޓީޗަރުންނެވެ. ހުރިހާ ޕްރޮފެޝަނެއްގެ ބިންގާއަޅާދޭ ބަޔަކީ އެޓީޗަރުންނެވެ. އޮކްޓޯބަރު މަހުގެ ފަސްވަނަ ދުވަހަކީ ބައިނަލް އަޤްވާމީ ޓީޗަރުންގެ ދުވަހެވެ. މިދުވަސް ރާއްޖޭގައި ވެސް އަންނަނީ ކުލަގަދަކޮށް ފާހަގަ ކުރަމުންނެވެ. ސްކޫލުތަކުގައި ހިންގާ ޙަރަކާތްތަކުންނެވެ. ދަރިވަރުނާއި ބެލެނިވެރިން، މުދައްރިސުންނަށް ފޮނުވާ ތަހްނިޔާގެ މަސެޖްތަކުންނެވެ. ދެވޭ ހަދިޔާތަކުންނެވެ. މިފަދަ އެންމެ ދުވަހަކުން މުދައްރިސުންގެ ޚިދުމަތުގެ އަގުވަޒަން ކުރެވޭނެތޯއެވެ؟
މަސައްކަތާ އެކަށޭނަ އުޖޫރައެއް ނުލިބޭ!
މުސާރައިގެ ޝަކުވާއަކީ މަދު ދާއިރާއެއް ނޫނީ ހުރިހާ ދާއިރާއަކުން ވެސް އަޅުގަނޑުމެންނަށް އިވޭ އަޑެކެވެ. މުސާރަ ކުޑަވުގެ ވާހަކައެވެ. ކުރާމަސައްކަތާ އެކަށީގެންވާ އުޖޫރައެއް ނުލިބޭ ވާހަކައެވެ. ޓީޗަރުންގެ މަސައްކަތަށް ހޭދަވަނީ ހަމައެކަނި ކްލާސްރޫމްގައި ކިޔަވައިދިނުމަށް ހޭދަވާ ވަގުތެއް ނޫނެވެ. މަސައްކަތް ނިންމޭނެކަމަށް ކަނޑައެޅިފައިވާ ވަގުތު ޖެހޭ އިރަކަށް، އެނބުރި ގެއަކަށް ނުދެވެއެވެ. އެތައްގަޑީ އިރެއްގެ މަސައްކަތަށްފަހު އެނބުރި ގެއަށް ގޮސް ވެސް ދަރިވަރުންގެ އިތުރުގަޑީގެ ޙަރަކާތްތަކަށް ދާންޖެހޭނެއެވެ. އެހެންނަމަވެސް ޓީޗަރުންނަށް ވީތީ އިތުރު ގަޑީގައި މަސައްކަތް ކޮށްގެން ލިބޭ އިތުރު އުޖޫރައެއް ނޯވެއެވެ. ވަޒީފާއާ ބެހޭ ޤާނޫނާއި ސިވިލް ސާވިސްގެ ޤަވައިދުގައިވާ ގޮތުން ރަސްމީ ގަޑީގައި ނުކުރެވި ހުންނަ މަސައްކަތްތައް ކުރަން ނިކުމެއްޖެ ނަމަ އިތުރުގަޑީހެ ފައިސާ ދޭން ޖެހެނެއެވެ.
ޕްރީ ސްކޫލެއްގައި މަސައްކަތްކުރާތާ ފަސް އަހަރުވެފައިވާ ޓީޗަރަކު ބުނި ގޮތުގައި އޭނާއަށް މުސާރައިގެގޮތުގައި ލިބެނީ 6500 ރުފިޔާއެވެ. ނަމަވެސް އެޓެންޑެންސް އެލަވަންސާއެކު ގެއަށް ގެންދިއުމަށް ހަތްހާސްވަރު ޖެހޭކަމަށް ބުންޏެވެ. އެޓީޗަރަކީ ޕްރީސްކޫލު ޓީޗިން އެޑްވާންސް ލެވެލް ފުރިހަމަ ކޮށްފައިވާ ޓީޗަރެކެވެ. މިޓީޗަރުގެ މަސައްކަތް ހެދުނު 6:30 ގައި ފެށެއެވެ. ނިމޭގަޑިއެއް ކަމަށް މެންދުރުފަހު އެކެއްޖަހާއިރު ކަނޑައެޅިފައި އޮތްނަމަވެސް ގެއަށް ދެވޭއިރު ހުންނަނީ މެންދުރުންއަނބުރާ ދެއެއް ތިނެއްޖަހާފައިކަމަށް އެޓީޗަރު ބުންޏެވެ. ނަމަވެސް އޯޓީއެއް ނުލިބެއެވެ. އެޓީޗަރު ބުނިގޮތުގައި ޓީޗަރެއްގެ ގޮތުގައި އޭނާ މަސައްކަތް ކުރަނީ އެކަމަށް ހުރި ޝައުޤުވެރިކަމުންނެވެ. އެހާ ކުޑަ މުސާރައެއް ލިބޭކަމެއް ޝައުޤްވެރިކަމެއް ނެތްނަމަ ނުކުރެވެނެކަން އެޓީޗަރުގެ ވާހަކަ އިންވެސް އެނގެއެވެ. މިއީ ހަމައެކަނި އެޓީޗަރުގެ ބަހެއްނޫނެވެ.
މިހާރު ތިބި ގިނަ ޓީޗަރުނަކީ އެމީހުން އެންމެ ކުޑައިރުން ފެށިގެން އެކަމަށް ޝައުޤުހުރެގެން ޓީޗަރުންގެ ގޮތުގައި މަސައްކަތް ކުރުމަށް ބޭނުންވެ ތަމްރީނުވެގެން މަސައްކަތް ކުރާޓީޗަރުންނެވެ. ލިބޭ އުޖޫރަބޮޑުވެގެންނެއްނޫނެވެ. އެހެން ކަމަށްވާއިރު ކުރިމަގުގައި ޓީޗިން ދާއިރާއަށް ކުދިން ނުކުންނަންވީ ސަބަބަކީ ކޮބައިތޯ ސުވާލު އުފެދެއެވެ.
ޒުވާންޖީލް ޓީޗީންދާއިރާއަށް ޝަޢުޤެއް ނެތް!
"ޒުވާން ޓީޗަރުން, ދާއިރާގެ މުސްތަޤްބަލް" އަކީ މިއަހަރުގެ ޓީޗަރުންގެ ދުވަހުހެ ޝިޢާރުގެ ގޮތުގައި ކަނޑައަޅައިފައިވާ ޝިޢާރެވެ. މި ޝިޢާރުކަނޑައަޅައިފައި ވަނީ، މުސްތަޤްބަލުގައި ޒުވާން އަދި މޮޅު ޓީޗަރުން ދާއިރާއަށް ނުކުންނާނެ ކަމުގެ އުއްމީދުގައިކަން ކަށަވަރެވެ. ނަމަވެސް ރާއްޖޭގެ ޓީޗިން ދާއިރާގެ މުސްތަޤްބަލަކީ އޮތީ ކިހިނެއްތޯއެވެ؟
ކިޔަވައި ދިނުމުގެ އެއްވެސް ތަމްރީނެއް ނެތި ވަގުތީ ޓީޗަރުންގެ ގޮތުގައި 3191 ޓީޗަރުން ރާއްޖޭގައި މަސައްކަތް ކުރަމުންދާކަން މިދިޔަ އަހަރުގެ ތަފާސް ހިސާބުތަކުން ދައްކައެވެ. އެއީ 1024 ދިވެހި ޓީޗަރުންނާއި 2167 ބިދޭސީ ޓީޗަރުނެނެވެ. ބައެއް އަތޮޅުތަކުގައި ކިޔަވައި ދިނުމުގައި އުޅޭ ޓީޗަރުންގެ 33 އިންސައްތަ އަކީ ބިދޭސީ ޓީޗަރުނެވެ. މިޢަދަދުތަކުން ވެސް ތަމްރީނުވެގެން ނުކުންނަ ޓީޗަރުންނަށް މިދާއިރާގައި ވަޒިފާގެ ފުރުޞަތު އޮތްކަން އޮޅުމެއް ނެތި ހާމާވެއެވެ. އެހެންވީއިރު ދިވެހި ޒުވާނުން މިދާއިރާއަށް ނުކުންނަނީ ކީވެތޯ ބަލަންޖެހެވެ.
ވަޒީފާގެ ފުރުޞަތު މިހާތަނަވަސްކޮށް މިދާއިރާގައި އޮތްއިރުވެސް، ސްކޫލުތައް ނިންމާ ފެންވަރު ރަނގަޅު ދަރިވަރުން ޓީޗަރުކަމަށް ޝަޢުޤުވެރި ނުވުމާއި، ދާއިރާގައި ތިއްބެވި ހުނަރުވެރި ޤާބިލް ޓީޗަރުން، މިދާއިރާ ދޫކުރެއްވުމަކީ ދާއިރާއަށް ދިމާވެފައިވާ އެންމެ ބޮޑު ގޮންޖެހުން ކަމަށް މިއަހަރުގެ ޓީޗަރުންގެ ދުވަހު ޓީޗަރުންގެ ޖަމްޢިއްޔާއިން ނެރުނު ބަޔާނުގައި ވެސް ވަނީ ފާހަގަކުރައްވައިފައެވެ. މިސަބަބުތައް ޤައުމީ ފެންވަރެއްގައި ދެނެގަނެ މިކަމަށް ހައްލު ހޯދުމަކީ، ކޮންމެހެންވެސް މިއަދު ކުރަންޖެހިފައިވާ ޤުއުމީ ކަމެއްކަމަށް ޓީޗަރުންގެ ޖަމްޢިއްޔާއިން ދެކެއެވެ.
މައްސަލައިގެ ހައްލަކީ ކޮބާ؟
ސްކޫލުތައް ނިންމާ ކުދިންގެ ތެރެއިން ރަނގަޅު ނަތީޖާ ހޯދާ ކުދިން މިދާއިރާއަށް ޝަޢުޤުވެރިނުވާ ސަބަބުތަކާއި، ދާއިރާގައި ތިއްބެވި ހުނަރުވެރި ޤާބިލް ޓީޗަރުން ދާއިރާ ދޫކުރައްވަމުން ދިއުމަށް އޮތް ހައްލެއްކަމަށް، ޓީޗަރުންގެ ޖަމްޢިއްޔާއިން ވަނީ ކަންތަކެއް ފާހަގަ ކުރައްވައިފައެވެ.
ސްކޫލުތައް ނިންމާ، ފެންވަރު ރަނގަޅު ދަރިވަރުން މިދާއިރާއަށް ޝަޢުޤުވެރިކުރެވޭނީ އަދި ހުނަރުވެރި، ޤާބިލް ޓީޗަރުން މިދާއިރާގައި ދެމިތިބޭނީ، ޓީޗަރުކަމަކީ ޕްރޮފެޝަނަލް މަސައްކަތަކަށް ވީ ހިނދު، ޓީޗަރުންލައްވާ ކުރުވާ މަސައްކަތަކީ ޕްރޮފެޝަނަލް މަސައްކަތަކަށް ހަދައިގެން ކަމަށް އެޖްޢިއްޔާއިންބުނެއެވެ. ކިޔެވި އެއްޗެއްގެ ބޭނުން ހިފައިގެން ޕްރޮފެޝަނަލް މަސައްކަތްތަކެއް ކުރުމަށް ބާރުއަޅައި، އަދި އެކަމަކީ ތަރްހީބުދޭ ކަމަކަށް ހަދައިގެންނެވެ. ޓީޗަރުންލައްވާ ކުރުވަމުން އަންނަ "އަންޕްރޮފެޝަނަލް" ކަންކަން ކުރުވުން މިހާރުން މިހާރަށް ހުއްޓައިލެވިގެންނެވެ. ސްކޫލުތައް ހިންގުމުގައި އެޑްމިނިސްޓްރޭޓިވް ކަންކަމަށްވުރެ ބޮޑަށް އެކަޑަމިކް ކަންކަމަށް އިސްކަންދީ އަދި މަތީ ހަރުފަތްތަކުން އެކަމުގައި ބައިވެރިވާ މިންވަރު އިތުރު ކުރެވިގެންނެވެ. މުޖްތަމަޢުގައި ޓީޗަރުންނަށް އޮތް ޤަދަރާއި އިޙްތިރާމް މަތިކުރެވިގެންނެވެ.
ޓީޗަރުންގެ ޤަދަރާއި އިޙްތުރާމް މަތިކުރެވޭނީ ޓީޗަރުން ކުރައްވާ ބުރަމަސައްކަތާ، އެކަށޭނަ އުޖޫރައެއް ދެވިގެންނެވެ. ޓީޗަރުކަމުގެ މަސައްކަތަކީ އަށް ގަޑީއިރުން ނުނިމޭނެކަމަށް ހީކުރާ ހީކުރުން ދޫކޮށްލައި، އެބައިމީހުންގެ އާޢިލާއެކު ވަގުތު ހޭދަކުރަންޖެހޭނެ ކަމަށް ޤަބޫލުކުރެވި އެކަމަށް އިޙްތިރާމްކުރެވިގެންނެވެ. މިދާއިރާއަކީ ވަޒީފާގެ ގޮތުން ކުރިއަށްދެވޭނެ ފަހި ފުރުޞަތުތަކެއް ހުރި ދާއިރާއެއްކަން ދައްކައި ދެވިގެންނެވެ.
ޓީޗަރުން ތަމްރީނުކުރުމުގެ ރިސޯސްތަކާއެއްވަރުގެ ޤާބިލިއްޔަތުކަން ނެތް ތަންތަނުން ޓީޗަރުން ތަމްރީނު ކުރުމަށް ހުއްދަ ދިނުން ހުއްޓާލެވިގެންނެވެ. އަދި އެތަންތަނުގައި ޓީޗަރުންނަށް ތަމްރީނު ދެއްވުމަށް ތިއްބަވާ ފަރާތްތަކަކީ ވެސް އެކަމަށް އެންމެ އެކަށޭނަ ޤާބިލްފަރާތްތަކަށް ހެދިގެންނެވެ.
ޙަރަކާތްތެރި މުދައްރިސުންގެ އައުޖީލެއް ނުއުފެއްދޭނަމަ، ފެންވަރު ރަނގަޅު ތަޢުލީމެއް ލިބިގަތުމަށް އެތައްކުދިންނެއް، މުސްތަޤްބަލުގައި މަޙްރޫމްވާނެކަން، މިއަހަރުގެ މުދައްރިސުންގެ ދުވަހާގުޅިގެން އެޑިއުޝަން މިނިސްޓަރ ދެއްވި ޚިތާބުގައި ވެސް ވަނީ ފާހަގަކުރައްވައިފައެވެ.
ޒުވާނުން ޓީޗިން ދާއިރާއަށް ޝަޢުޤުވެރިނުވަނީ ކީއްވެގެންތޯ އަދި ދާއިރާގައި ތިއްބެވި ހުނަރުވެރި ޤާބިލް ޓީޗަރުން ދާއިރާ ދޫކުރައްވަމުން ދަނީ ކީވެގެންތޯ ހޯދިގެން ނޫނީ މައްސަލައަށް ހައްލެއް ލިބިގެނެއް ނުދާނެއެވެ. ޓީޗަރުންގެ ޖަމްޢިއްޔާއިން ފާހަގަ ކޮށްފައިވާ ފަދައިން މިކަން ދެނެގަނެ މިކަމަށް ހައްލު ހޯދުމަކީ، ކޮންމެހެންވެސް މިއަދު ކުރަންޖެހިފައިވާ ޤައުމީ މަސައްކަތެކެވެ.
