މިއަދު ފެށިގެން ދިޔަ 19 ވަނަ ރައްޔިތުންގެ މަޖިލީހުގެ ދެވަނަ ދައުރުގެ ތެރޭގައި ސަރުކާރުގެ ފަރާތުން 30 ބިލެއް އަދި "އެޖެންޑާ19" ޚާއްސަ ބިލުތަކުގެ ގޮތުގައި އެމްޑީޕީން 18 ބިލެއް ރައްޔިތުންގެ މަޖިލީހަށް ފޮނުއްވާނެ ކަމުގެ އިޝާރާތެއް ލިބިވަޑައިގެންފައިވާ ކަމަށް މަޖިލީހުގެ ރައީސް މުޙަންމަދު ނަޝީދު މިއަދު ވިދާޅުވެއްޖެއެވެ.
މަޖިލީހުގެ ދެވަނަ ދައުރުގެ ފުރަތަމަ ޖަލްސާގައި މެމްބަރުންނަށް މަރުޙަބާ ދެންނެވުމަށްފަހު ނަޝީދު ވިދާޅުވީ ސަރުކާރާއި އެމްޑީޕީން މި ދައުރުގައި މަޖިލީހަށް ފޮނުއްވާ ބިލުތަކުގެ ތެރެއިން އިންތިޤާލީ އިންތިޒާމުގެ ބިލެއްވެސް މަޖިލީހަށް އަންނާނެ ކަމަށެވެ. އަދި ފުލުހުންގެ ޤާނޫނާއި ކޯޓުތަކުގެ ޤާނޫނަކާއި ފަނޑިޔާރުންގެ ޤާނޫނަށް އިސްލާޙު ގެނައުމުގެ ބިލެއްވެސް މަޖިލީހަށް އަންނާނެ ކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ ދެވަނަ ދައުރުގައި ސަރުކާރުން ހުށަހަޅާ ބިލުތަކުގެ ތެރެއިން އެންމެ މުހިންމު އެއްބިލަކީ އިންކަމް ޓެކްސް ނެގުމުގެ ބިލު ކަމަށެވެ. މީގެއިތުރުން ލާމަރުކަޒީ ޤާނޫނަށް އިސްލާޙު ގެނައުމުގެ ބިލާއި ފެނާއި ކަރަންޓާއި ނަރުދަމާއާ ގުޅޭ ބިލެއްވެސް ހިމެނޭނެ ކަމަށް ނަޝީދު ވިދާޅުވިއެވެ.
މީގެއިތުރުން ބޯހިޔާވަހި ކަމުގެ ޤާނޫނަށް ގެންނަންޖެހޭ ބަދަލުތަކުގެ ބިލެއްގެ އިތުރުން ތައުލީ ދާއިރާއަށް ގެންނަންޖެހޭ އިސްލާޙުތަކުގެ ބިލަކާއި ވަރި، ކައިވެންޏާ ބެހޭ ބިލެއްގެ އިތުރުން ވަޒީފާއާބެހޭ ބިލަކާއި އެންމެ ކުޑަ އުޖޫރަ ކަނޑައެޅުމުގެ ބިލަކާއި، އަދި ދަތުރުފަތުރު ކުރުމާއިބެހޭ ނިޒާމާއި ބެހޭ ބިލެއްވެސް މި ދައުރުގައި މަޖިލީހަށް ފޮނުއްވާނެ ކަމަށް ނަޝީދު ވިދާޅުވިއެވެ.
