އިލެކްޝަން ކޮމިޝަނުގެ މެމްބަރު ކަމަށް ރައީސް ފޮނުއްވި ލިސްޓުގެ އެންމެކުރީގައި ފުއާދު

އިލެކްޝަން ކޮމިޝަނުގެ މެމްބަރު ކަމުގެ މަގާމަށް އެ ކޮމިޝަނުގެ ކުރީގެ ރައީސް ފުއާދު ތައުފީގު ކުރިމަތި ލައްވައިފިއެވެ.

އިލެކްޝަން ކޮމިޝަނުގެ މެމްބަރެއްގެ ޖާގަ ހުސްވުމާއި ގުޅިގެން މެމްބަރަކު އައްޔަން ކުރެއްވުމަށް ރައީސް އޮފީހުން ކުރި އިއުލާނާއި ގުޅިގެން މެމްބަރު ކަމަށް ފުއާދު ކުރިމަތި ލެއްވިކަން ކަށަވަރުވީ ކޮމިޝަނުގެ މެމްބަރު ކަމަށް ކުރިމަތި ލެއްވި ބޭފުޅުންގެ ލިސްޓު ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުވުމާއެކު މިއަދު މަޖިލީހުގެ ރިޔާސަތުން އެ ލިސްޓު އިއުލާނު ކުރެއްވުމުންނެވެ.

ކޮމިޝަނަށް ކުރިމަތި ލެއްވި 10 ބޭފުޅުންގެ ނަންފުޅު ރައްޔިތުންގެ މަޖިލީހަށް ރައީސް ފޮނުއްވިއިރު ލިސްޓު ތަރުތީބު ކުރެއްވުމުގައިވެސް ރައީސް ސޯލިޙު އެންމެ އިސްކަން ދެއްވާފައި ވަނީ ފުއާދަށެވެ. ކޮމިޝަނަށް އައްޔަން ކުރައްވަން ރައީސް އެންމެ އިސްކަން ދެއްވި ބޭފުޅަކަށް ފުއާދު ވެވަޑައިގެންފައިވާއިރު ރައީސްގެ ލިސްޓުގެ ދެވަނައިގައި ވަނީ އަންނަ މަހުގެ 24 ވަނަ ދުވަހު ކޮމިޝަނުގެ މެމްބަރު ކަމުގެ ދައުރު ހަމަވާ އެ ކޮމިޝަނުގެ ނައިބު ރައީސް ކަމުގައި އަމްޖަދު މުސްތޮފާގެ ނަމެވެ.

ފުއާދާއި އަމްޖަދުގެ ނަންފުޅުގެ އިތުރުން ރައީސްގެ ތަރުތީބު ލިސްޓުގައި ފާހަގަ ކުރައްވާފައިވާ އިތުރު ދެބޭފުޅަކުވެސް ހިމެނެއެވެ. އެއީ ތިންވަނައަށް ހިމަނާފައިވާ ޙަސަން ނާޒިމް އާއި ހަތަރު ވަނައަށް ހިމަނާފައިވާ ހަނީފާ ޚާލިދެވެ.

މި ހަތަރު ބޭފުޅުންގެ ނަންފުޅު ރައީސް ފާހަގަ ކުރައްވައި މަޖިލީހަށް ފޮނުއްވިއިރު މީގެތެރެއިން އިލެކްޝަން ކޮމިޝަނަށް މިވަގުތު އައްޔަން ކުރައްވާނީ އެންމެ ބޭފުޅެކެވެ.

އިލެކްޝަން ކޮމިޝަނުގެ މެމްބަރު ކަމަށް އައްޔަން ކުރެއްވުމަށް ރައީސް ފޮނުއްވި 4 ނަންފުޅު ރައީސް އިސްކަންދެއްވާ ތަރުތީބުން:

1-ފުއާދު ތައުފީގު، މއ. ތަޅަމުދިގެ

2- އަމްޖަދު މުސްތަފާ، އަލިވާގެ ގއ. މާމެންދޫ

3- ހަސަން ނާޒިމް، ހ. ގާޑެނިއާ

4- ހަނީފާ ހާލިދު، އަނބުގަސްދޮށުގެ، ހއ. ކެލާ

އިލެކްޝަން ކޮމިޝަނުގެ މެމްބަރު ކަމަށް ކުރިމަތިލެއްވި އިތުރު ބޭފުޅުން:

1- އައިމިނަތު ޝާދިޔާ، މ. ޕިސްތާގެ

2- މުއާވިޔަތު މުހައްމަދު، މ. ޒޭވަރު

3- އަލީ މުހައްމަދު މަނިކު، ދަފްތަރު ނަންބަރު 1851

4- މުހައްމަދު އަހުމަދުފުޅު، ބުރެވިމާގެ، ޅ. ހިންނަވަރު

5- ނިއުމާތު ޝަފީގް، މ. މާފުށީގެ

6- މުހައްމަދު އިސްމާއިލް، މ. ކެލަން