19 ވަނަ ރައްޔިތުންގެ މަޖިލީހުގެ ދެވަނަ ދައުރުގެ ޖަލްސާތައް މިއަދު ފަށައިފިއެވެ.
ދެވަނަ ދައުރުގެ ޖަލްސާތައް މިއަދު ފެށިއިރު މިއަދުގެ ޖަލްސާއަކީ 19 ވަނަ ރައްޔިތުންގެ މަޖިލީހުގެ 48 ވަނަ ޖަލްސާއެވެ. ދެވަނަ ދައުރުގެ ފުރަތަމަ ޖަލްސާ ފެށުނުއިރު ވަޑައިގެން ތިއްބެވީ 32 މެމްބަރުންނެވެ. ސަލާމުގައި ފަސް މެމްބަރަކު ތިއްބެވިއިރު، ރަސްމީ ދަތުރުފުޅެއްގައިވެސް އެއްވެސް މެމްބަރަކު މިވަގުތު ނެތް ކަމަށް ރިޔާސަތުން މަޖިލީހުގެ ރައީސް މުޙަންމަދު ނަޝީދު ވިދާޅުވިއެވެ.
މިއަދުގެ ޖަލްސާގެ އެޖެންޑާގައި ނުވަ ކަމެއް ހިމަނާފައި ވެއެވެ. މީގެތެރެއިން މަޖިލީހުގެ ރިޔާސަތުން މިއަދު ހުށަހަޅަން އޮތް ތިން ކަމުގެ ތެރެއިން އެއްކަމަކީ ނޭޝަނަލް އިންޓެގްރިޓީ ކޮމިޝަންގެ މެމްބަރު ކަމަށް އައްޔަން ކުރެއްވުމަށް ރައީސުލްޖުމްހޫރިއްޔާ އިބްރާހިމް މުޙަންމަދު ސޯލިޙު ފޮނުއްވި ނަންފުޅުތައް ދިރާސާ ކުރެއްވުމަށް މަޖިލީހުގެ މިނިވަން މުއައްސަސާތަކާބެހޭ ކޮމިޓީއަށް ފޮނުވުމެވެ.
ދެވަނަ ކަމަކަށް ރިޔާސަތުން ހުށަހަޅަން އޮތީ ސަޢޫދީ ޢަރަބިއްޔާގެ ޖިއްދާ ގައި ދިވެހިރާއްޖޭގެ ކޮންސިއުލޭޓެއް އުފައްދަވައި، އެތަނަކީ ސަޢޫދީ ޢަރަބިއްޔާގައި ހުންނަ ދިވެހިރާއްޖޭގެ އެމްބަސީގެ ދަށުން ހިނގަމުންދާ ތަނެއްކަމުގައި ހަމަޖެއްސެވުމާއި ގުޅިގެން ، ފޮރިން މިނިސްޓްރީގެ މަސައްކަތްތަކުގެ ދާއިރާއަށް ގެންނަވާފައިވާ ބަދަލުތައް ރައްޔިތުންގެ މަޖިލީހުން ފާސްކުރުމަށްޓަކައި ރައީސުލްޖުމްހޫރިއްޔާ ފޮނުއްވި މައްސަލަ ދިރާސާ ކުރުމަށް ޚާރިޖީ ގުޅުންތަކާބެހޭ ކޮމިޓީއަށް ފޮނުވުމެވެ.
ތިންވަނަ ކަމަކަށްވެސް އޮތީ މިނިވަން މުއައްސަސާއެއް ކަމަށްވާ އިލެކްޝަން ކޮމިޝަނުގެ މެމްބަރު ކަމަށް ކުރިމަތި ލެއްވި ބޭފުޅުންގެ ތެރެއިން އެ ކޮމިޝަނަށް އައްޔަން ކުރެއްވުމަށް ރައީސުލްޖުމްހޫރިއްޔާ ފޮނުއްވި ނަންފުޅުތައް ދިރާސާ ކުރުމަށްޓަކައި މިނިވަން މުއައްސަސާތަކާބެހޭ ކޮމިޓީއަށް ފޮނުއްވުމެވެ.
މީގެއިތުރުންވެސް ދެކަމެއްގެ އިބްތިދާއީ ބަހުސް މިއަދު އެޖެންޑާ ކޮށްފައިވެއެވެ. އަދި މަޖިލީހުގައި ނުނިމިހުރި ކަންކަމާއި ކޮމިޓީތަކުން ހުށަހަޅާ ބަޔެއް ކަންކަމަށްވެސް އެޖެންޑާއިން ވަނީ ޖާގަ ދީފައެވެ.
