ސައޫދީ އަރަބިއްޔާއިން ފުރަތަމަ ފަހަރަށް ޓޫރިސްޓު ވިސާ ދޫކުރަން ނިންމައި ފަތުރުވެރިންނަށް އެގައުމު ހުޅުވާލައިފިއެވެ. އެ ގައުމުން މިއަދު ބުނެފައި ވަނީ 49 ގައުމެއްގެ ރައްޔިތުންނަށް އޮންލައިން ޓޫރިސްޓް ވިސާ ދޫކުރަން މާދަމާ ފަށާނެ ކަމުގައެވެ. އެހެން ގައުމުތަކުގެ ރައްޔިތުންނަށް ސައޫދީ އެންބަސީތަކާއި، ކޮންސިއުލޭޓްތައް މެދުވެރިކޮށް ވިސާއަށް އެދުމުގެ ފުރުސަތު އޮންނާނެއެވެ.
އެ ގައުމުގައި ފަތުރުވެރިކަމުގެ މަޝްހޫރު މަންޒިލެއް ކަމުގައިވާ އައްދިރްޢިއްޔާގައި މިކަން އިއުލާންކުރަމުން ސައޫދީ ކޮމިޝަން ފޯ ޓޫރިޒަމް އެންޑް ނޭޝަނަލް ހެރިޓޭޖް (އެސްޖީޓީސީ) އިން ބުނެފައި ވަނީ ޔޫރަޕްގެ 38 ގައުމަކާއި، އޭޝިޔާގެ 7 ގައުމަކާއި، އެމެރިކާއާއި، ކެނެޑާއާއި އޮސްޓްރޭލިޔާ އަދި ނިއުޒީލޭންޑުގެ ރައްޔިތުންނަށް ޓޫރިސްޓު ވިސާއަށް އެދުމުގެ ފުރުސަތު ހުޅުވާލާނެ ކަމުގައެވެ.
80 އެމެރިކާ ޑޮލަރުގެ ފީއެއް ކަނޑައެޅިފައިވާ މި ވިސާ ނަގާއިރު އަންހެނަކާއެކު މަހްރަމަކު ހުރުން ޝަރުޠުކޮށްފައި ނުވެއެވެ. އަދި ކުރިއެކޭ އެއް ގޮތަށް ޓޫރިސްޓް ވިސާގައި ވެސް ޣައިރު މުސްލިމުން މާއްކާ އާއި މަދީނާއަށް ނުވަދެވޭނެއެވެ.
ސައޫދީ އަރަބިއްޔާއިން ބޭރު ގައުމުތަކުގެ މީހުންނަށް ދޫކުރަމުން އައީ އެގައުމުގައި މަސައްކަތްކުރުމަށް ދޫކުރެވޭ ވިސާއާއި، ވިޔަފާރިވެރިންނަށް ދޫކުރާ ބިޒިނަސް ވިސާއާއި، ޙައްޖާއި ޢުމްރާގެ ވިސާއެވެ.
ފަތުރުވެރިންނަށް ސައޫދީ އަރަބިއްޔާ ހުޅުވާލަން މިއަދު އިއުލާނުކުރިއިރު، ފަތުރުވެރިންނަށް ވަނީ އެހެން ލުޔެއްވެސް ދީފައެވެ. އެއީ، ސައޫދީ އަރަބިއްޔާގައި ބޭރަށް ނުކުމެ އުޅޭއިރު، މުޅި ހަށިގަނޑު ފޮރުވޭ ކަޅު އަބާޔާ ލުމެވެ. އަލަށް ހަމަޖެއްސި އުސޫލުގެ ދަށުން ފަތުރުވެރިން އަންހުން ލާންޖެހޭނީ 'އެކަށީގެންވާ' ވަރަށް ހަށިގަނޑު ފޮރުވޭ ހެދުމެވެ.
ސައޫދީ އަރަބިއްޔާގެ ވަލީއަހުދު މުޙައްމަދު ބިން ސަލްމާންގެ ތަރައްގީގެ މަޝްރޫއު 'ވިޝަން 2030 ގައި އެ ގައުމަކީ ދުނިޔޭގައި މަގުބޫލު ފަތުރުވެރިކަމުގެ މަންޒިލަކަށް ހަދަން އަމާޒު ހިފާފައިވާއިރު، ސައޫދީން ލަފާކުރަނީ 2030 ވަނަ އަހަރު އެގައުމަށް 100 މިލިއަން ފަތުރުވެރިން ޒިޔާރަތްކުރާނެ ކަމުގައެވެ.
