އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން އެ ގައުމުގެ ގާނޫނުހަދާ މަޖިލީހުގެ ތިރީގެ، ހައުސް އޮފް ކޮމަންސްގެ މަސައްކަތް ހުއްޓުވުން (ސަސްޕެންޑް ކުރުން) އެއީ ގާނޫނާ ޚިލާފު ކަމެއް ކަމުގައި އެ ގައުމުގެ ސުޕްރީމްކޯޓުން ނިންމައިފިއެވެ.
ބޮރިސް ޖޮންސަން ވަނީ މިމަހު ކުރީކޮޅު 5 ހަފުތާއަށް ގާނޫނުހަދާ މަޖިލީހުގެ މަސައްކަތް މެދުކަނޑާލެއްވުމަށް ނިންމަވާފައެވެ.
މިއަދު ސުޕްރީމްކޯޓުން ނިންމާފައި ވަނީ 31 އޮކްޓޯބަރުގައި އިނގިރޭސިވިލާތް ޔޫރަޕިއަން ޔުނިއަން (އީޔޫ) އިން ވަކިވުމާ ގުޅޭ މަސައްކަތްތައް ކުރަންވެފައި އޮއްވައި އެގޮތަށް ގާނޫނުހަދާ މަޖިލީހުގެ މަސައްކަތް ހުއްޓުވުމަކީ ގޯސްކޮށް ކޮށްފައިވާ ކަމެއް ކަމުގައެވެ.
"ޑިމޮކްރެސީގެ އަސާސުތަކަށް (އެ ނިންމުމުން) ކުރި އަސަރު އާދަޔާ ޚިލާފަށް ބޮޑު." ކޯޓުގެ ނިންމުން އިއްވަވަމުން ކޯޓުގެ އިސް ފަނޑިޔާރު ލޭޑީ ހޭލް ވިދާޅުވިއެވެ.
ސަރުކާރުން ބުނީ މިހާރު އެ ނިންމުން ދިރާސާކުރަމުން ދާކަމުގައެވެ.
"ގާނޫނޫ ހަދާ މަޖިލީހުގެ މަސައްކަތް ހުއްޓުވަން އެންގެވުމަށް ރާނީ އެލިޒަބަތަށް ދަންނަވަން ނިންމި ނިންމުމަކީ ގާނޫނާ ޚިލާފު ނިންމުމެއް. އެއީ، އެކަމުގެ ސަބަބުން، ގަބޫލުކުރެވޭ ފަދަ ސަބަބެއް ނެތި ގާނޫނުހަދާ މަޖިލީހުގެ ދަސްތޫރީ މަސައްކަތް ހުއްޓުމަކަށް އަންނާތީ." ލޭޑީ ހޭލް އިއްވެވި ހުކުމުގައި ވެއެވެ.
ހުކުމު އިތުރަށް ބަޔާންކުރައްވަމުން ލޭޑީ ހޭލް ވިދާޅުވީ ކޯޓުގެ ފަނޑިޔާރުންގެ އިއްތިފާގުން ނިންމާފައިވާ ގޮތުގައި، ގާނޫނު ހަދާ މަޖިލިސް ހުއްޓުމަކަށް ގެނައުމަށް ނިންމި ނިންމުން އެއީ ގާނޫނީ ހައިސިއްޔަތެއް ނެތް ބާޠިލު ނިންމުމެކެވެ. ދެން، ކުރިއަށް ދާނެ ގޮތް ކަނޑައަޅުއްވާނީ ހައުސް އޮފް ކޮމަންސްގެ ސްޕީކާއެވެ.
ހައުސް އޮފް ކޮމަންސްގެ ސްޕީކާ ޖޯން ބާކޯ ވަނީ ކޯޓުގެ ނިންމުމަށް މަރުހަބާ ވިދާޅުވެފައެވެ. އޭނާ ވިދާޅުވީ ލަސްނުކޮށް ގާނޫނުހަދާ މަޖިލީހުގެ ޖަލްސާއެއް ބާއްވަން ޖެހޭ ކަމުގައެވެ. އަދި އޭނާ އެކަމާ ގުޅޭ ގޮތުން ޕާޓީތަކުގެ ލީޑަރުންނާ މަޝްވަރާކުރައްވާނެ ކަމުގައެވެ.
