ސަރުކާރު ހިންގާ ކޯލިޝަނުގެ ހުރިހާ ލީޑަރުންގެ ބައްދަލުވުމެއް ނުބޭއްވި ދިގުލައިގެން ދިޔަނަމަވެސް އދ. ގެ އާންމު ޖަލްސާގައި ބައިވެރިވެވަޑައިގަތުމަށް ފަހު، ރާއްޖެ އެނބުރި ވަޑައިގެން ލަސްތަކެއްނުވެ ކޯލިޝަން ލީޑަރުންގެ ބައްދަލުވުމެއް ބާއްވަވާނެ ކަމަށް ރައީސުލްޖުމްހޫރިއްޔާ އިބްރާހިމް މުޙަންމަދު ސޯލިޙް ވިދާޅުވެއްޖެއެވެ.
ރައީސް ވިދާޅުވީ ކޯލިޝަނުގެ ހުރިހާ ލީޑަރުންގެ ބައްދަލުވުމެއް ނުބޭއްވި ލަސްވަމުން ދަނީ ހުރިހާ ލީޑަރުން މާލޭގައި ތިއްބަވާ ރަނގަޅު ދުވަސްވަރެއް ދިމާނުވެގެން ކަމަށެވެ. ހުސްވި 2018 ވަނަ އަހަރުގެ ޑިސެމްބަރު މަހު ކޯލިޝަނުގެ ހުރިހާ ލީޑަރުންގެ ބައްދަލުވުމެއް ބޭއްވި ފަހުން އަދި އެފަދަ ބައްދަލުވުމެއް ބާއްވާފައި ނުވެއެވެ.
ރައީސް ވިދާޅުވީ އެމަނިކުފާނު ޔޫއެން އިން އެނބުރި ރާއްޖެ ވަޑައިގެން، އަންނަ އޮކްޓޯބަރު މަހު ކުރީކޮޅު ލީޑަރުންގެ ބައްދަލުވުމެއް އިންތިޒާމު ކުރައްވާނެ ކަމަށެވެ. ހުރިހާ ލީޑަރުން މާލޭގައި އެއްވަގުތަކު ތިއްބަވާ ވަގުތުގެ ދަތިކަން މީގެކުރިން ދިމާވި ނަމަވެސް މިފަހަރު ވަގުތު ދެއްވައިގެން އެފަދަ ބައްދަލުވުމެއް އިންތިޒާމު ކުރައްވާނެ ކަމަށް ރައީސް ވިދާޅުވިއެވެ. ރައީސް ވިދާޅުވީ އަންނަ މަހު ބާއްވާ ބައްދަލުވުމުގައި ކުރިޔަށް އޮތް ލޯކަލް ކައުންސިލް އިންތިޚާބާބެހޭ މަޝްވަރާތައްވެސް ލީޑަރުންނާއެކު ކުރައްވާނެ ކަމަށެވެ.
އެމްޑީޕީގެ ރައީސް މުޙަންމަދު ނަޝީދާއި، ޖުމްހޫރީ ޕާޓީގެ ލީޑަރު ގާސިމް އިބްރާހިމް އާއި އެމްއާރުއެމްގެ ބާނީ ކުރީގެ ރައީސް މައުމޫން އަބްދުލްގަތްޔޫމްގެ އިތުރުން އަދާލަތު ޕާޓީގެ ރައީސް ޝައިޚް އިމްރާން އަބްދުﷲއާއެކު ރައީސް ސޯލިޙު މީގެކުރިން ބައްދަލުވުމެއް ބޭއްވިފަހުން ރައީސްއާއެކު އެފަދަ ބައްދަލުވުމެއް ހުރިހާ ލީޑަރުން ގުޅިގެން ބާއްވަން މަޖިލިސް އިންތިޚާބުގެ ދުވަސްވަރުވެސް މަސައްކަތް ކުރެވުނެވެ.
ނަމަވެސް އެދުވަސްވަރު ލީޑަރުންގެ ބައްދަލުވުމެއް ބާއްވާފައި ނުވަނީ ލީޑަރުންގެ މެދުގައިވެސް އެދުވަސްވަރު ބަހުގެ ހޫނު ހަމަލާތަކެއް ދެއްވަމުން ގެންދެވުމުން ބައްދަލުވުމެއް ބޭއްވިނަމަވެސް އެކަށީގެންވާ ނަތީޖާއެއް ނުނެރެވޭނެ ތީއެވެ.
ކޯލިޝަނުގެ ހުރިހާ ލީޑަރުންނާއެކު އެއްމޭޒު ދޮށުގައި ރައީސް ބައްދަލު ނުކުރައްވާތާ ދުވަސްތަކެއް ވީނަމަވެސް ރައީސް ސޯލިޙު ވަނީ ލީޑަރުންނާ ވަކިވަކިން ތަފާތު އެކިފަހަރު މަތިން ބައްދަލު ކުރައްވާފައެވެ. އޭގެތެރެއިން ބަޔެއް ބައްދަލުވުންތައް ބާއްވާފައި ވަނީ ރައީސް އޮފީހުގައެވެ.
