ދިވެހި ފަންނާނުންގެ އުފެއްދުން ވިއްކަން ޑިއުޓީފްރީގައި ފިހާރައެއް ހުޅުވަން ހަމަޖައްސަވައިފއިވާ ކަމަށް އިކޮނޮމިކްސް މިނިސްޓަރ ފައްޔާޒު އިސްމާޢީލް ވިޅުވެއްޖެއެވެ. މިނިސްޓަރ މިހެން ވިދާޅުވީ ފަންނު އެކްސްޕޯރ އިފްތިތާޙްކުރުމަށް މިރޭ އާރޓް ގެލަރީގައި ބޭއްވި ރަސްމިއްޔާތުގައި ވާހަކަ ފުޅު ދައްކަވަމުންނެވެ. އެމްއޭސީއެލްގެ ބޯރޑްގެ އެއްބާރުލުމާއެކު އަންނަ އޮކްޓޫބަރ މަސްތެރޭގައި ޑިއުޓީ ފްރީގައި ދިވެހި ފަންނާނުންގެ އުފެއްދުންތަކަށް ޚާއްޞަ ފިހާރަ ހުޅުވިގެން ދާނެކަމަށް މިނިސްޓަރ ވިދާޅުވިއެވެ.
މާލޭގެ ސްވެނިއަރ ބާޒާރުގައި ވެސް ދިވެހި އުފެއްދުނަތައް ވިއްކޭނެ އިންތިޒާމު ހަމަޖެއްސުމަށް ކުރިއަށް އޮތް އަހަރު ތެރޭގައި ޢިމާރާތެއް އެޅުމަށް ހަމަޖައްސަވައިފައި ވާކަމަށްވެސް މިނިސްޓަރ ވިދާޅުވިއެވެ. އަދި ރާއްޖޭގެ ކޮންމެ ރިސޯރޓެއްގައިވެސް ދިވެހި އުފެއްދުންތައް ވިއްކޭނެ އިންތިޒާމު ހަމަޖެއްސެވުމަށް މަސައްކަތްކުރައްވަމުން ގެންދަވާ ކަމަށް މިނިސްޓަރ ވިދާޅުވިއެވެ. ކުދި އަދި މެދު ފަންތީގެ ވިޔަފާރިއަށް ފަސޭހަކުރުމަށް، މަސައްކަތް ކުރާނެ ޖާގައާއި އެއްޗިހި ރައްކާކުރާނެ ޖާގަ ކުޑައަގެއްގައި ހަމަޖެއްސެވުމަށް ވެސް މަސައްކަތް ކުރައްވަމުން ގެންދަވާކަމަށް ވެސް މިނިސްޓަރ ވާކަފުޅުގައި ވިދާޅުވިއެވެ. ދިވެހި އުފެއްދުމެއްކަން ދައްކުވައިދޭ ލޯގޯ އެއް ފަރުމާ ކުރެއްވަމުންގެންދަވާކަމަށް ވެސް މިނިސްޓަރ ފައްޔާޒުގެ ވާހަކަ ފުޅުގައި ފާހަގަ ކުރެއްވިއެވެ.
ފަންނު އެކްސްޕޯގެ ރަންވަނައަށް ހޮވޭ ފަސް ފަރާތުގެތެރެއިން ކޮންމެ ފަރާތަކަށް އެއްމިލިއަން ރުފިޔާގެ ލުރި ލޯނެއް އެސްއެމްއީ ބޭންކުމެދުވެރިކޮށް ދެއްވުމަށް ވަނީ ހަމަޖައްސަވައިފައެވެ. ފަސްމިލިއަން ރުފިޔާގެ ސޮއިކުރެވިފައިވާ ލޯން އެއްބަސްވުން، އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަނާއި އިކޮނޮމިކް މިނިސްޓްރީއާ ދެމެދު މިރޭގެ ރަސްމިއްޔާތުގައި ވަނީ ބަދަލުކުރެވިފައެވެ.
"މިމަޢުރަޒު ނިމުމުން ވަނަ ދީފައި ނިންމާލާކަށް ނޫން ނިމައްފައި އޮތީ، އިކޮނޮމިކްސް މިނިސްޓްރީގެ ޑިޕާރޓް މަންޓް ތަކާއި ވިޔަފާރި ކުންފުނިތައް މެދުވެރިކޮށް، ފަންނުވެރިން ގޮވައިގެން ބާޒާރަށް ނުކުމެ މާކެޓް ހޯދައި ދީގެން އިންޑަސްޓްރީއެއްގެ ގޮތުގައި ފައިތިލަ ސާބިތު ކޮށްދޭނެ އިންތިޒާމް ހަމަޖެއްސުން" ކަމަށް މިނިސްޓަރ ފައްޔާޒު ވިދާޅުވިއެވެ.
ލުއި ލޯނު ދެއްވުމުގެ އިތުރުން މަސައްކަތްތެރިންގެ އުފެއްދުންތައް މާކެޓް ކޮށްދީގެން ނަފާލިބޭނެ ގޮތް ހޯދަދިނުމަށް ހަމަޖެހިފައިވާކަމަށް މިނިސްޓަރ ވިދާޅުވިއެވެ. އެގޮތުން ބިޒުނަސް ސެންޓަރ ކޯޕަރޭޝަން މެދުވެރިކޮށް މިހާރުވެސް ހަތް ރަށެއްގައި ޚިދުމަތް ފޯރުކޮށް ދެއްވަމުންގެންދަވާކަމަށް މިނިސްޓަރ ފައްޔާޒު ވިދާޅުވިއެވެ. މިއަހަރު ތެރޭގައި އިތުރު ފަސްރަށެއްގައި ބިޒްނަސް ސެންޓަރުތައް ޤާއިމްކުރައްވާނެކަމަށް އިކޮނޮމިކްސް މިނިސްޓަރ ފައްޔާޒު ވިދާޅުވިއެވެ.
އެސެންޓަރުތަކުގެ ބޭނުން އަދި ފުރިހަމަ ގޮތުގައި ނުހިފޭކަން ފާހަގަކުރައްވާ، އެތަންތަނުގެ މުވައްޒަފުންނަށް އިތުރު ތަމްރީނުތައް ދެއްވައި ރަށްރަށުގައި ތިބި ކުދި ވިޔަފާރި ވެރިންނަށް އެކިގޮތްގޮތުން ފަންނީ އެހީތެރިކަމާއި ލޯން ހޯދުމަށް މަސައްކަތް ކޮށްދެވޭނެ ކަމަށް ވިދާޅުވިއެވެ. މިކަންކަމުގެ ތެރެއިން ކުދި އަދި މެދު ފަންތީގެ ވިޔަފާރިތަކަށް ބޮޑެތި ބަދަލުތަކެއް ގެނެވޭނެކަމަ މިނިސްޓަރ ފާހަގަކުރެއްވިއެވެ.
މުޅި ރާއްޖެއަށް ހުޅުވާލައިގެން ބާއްވާ ފަންނު އެކްސްޕޯ އޮންނާނީ އަންނަ ނޮވެމްބަރު މަހުގެ 22 އިން 28 މާލޭގަ އެވެ. އެކްސްޕޯގައި ބައިވެރިވުމުގެ ފުރުޞަތު މިމަހުގެ ނިޔަލަށް ވަނީ ހުޅުވާލައްވައިފައެވެ.
