އިންޑިޔާގެ އަސްކަރިއްޔާ ޒަމާނީކުރުމަށް 130 ބިލިއަން ޑޮލަރު ހޭދަކުރަނީ

އިންޑިޔާއަށް ދިމާވެފައިވާ ސަލާމަތާއި ރައްކާތެރިކަމުގެ މައްސަލަތައް އިތުރުވެފައިވާތީ، އަސްކަރިއްޔާ ޒަމާނީކޮށް، ހަނގުރާމައިގެ ކުޅަދާނަކަން އިތުރުކުރުމަށް ކުރިއަށް އޮތް ފަސް އަހަރާއި ހަތް އަހަރުގެ މުއްދަތުގެތެރޭގައި 130 ބިލިއަން އެމެރިކާ ޑޮލަރު ޚަރަދުކުރުމަށް ސަރުކާރުން ނިންމާފައިވާކަން ރަސްމީ ކަރުދާހަކުން ހާމަވެއްޖެއެވެ.

އަސްކަރިއްޔާގެ ހުރިހާ ގޮތްޕެއްގެ އަސްކަރީ އުޅަނދުތައް ޒަމާނީކުރުމަށް ކުރިއަށް އޮތް 5-7 އަހަރުގެ ތެރޭގައި ސަރުކާރުން 130 ބިލިއަން ޑޮލަރު ޚަރަދުކުރާނެ." ސަރުކާރުން ތައްޔާރުކުރި އެ ކަރުދާހުގައި ވެއެވެ.

މި ކަރުދާހާ ހަވާލާދީ ބައެއް އޮފިޝަލުން ހާމަކުރި ގޮތުގައި ސަރުކާރުން ވަނީ އެއްގަމު ސިފައިންނާއި، ކަނޑުގެ ސިފައިނާއި، ވައިގެ ސިފައިންގެ ހަތިޔާރު ޒަމާނީ ކުރުމަށް ކައިރި މުސްތަގުބަލެއްގައި ޒަމާނީ މިސައިލާއި، ހަނގުރާމަތީ މަތިންދާބޯޓާއި، ސަބްމެރީނާއި، މަނަވަރު ގަތުމަށް މަޝްރޫއެއް އެކުލަވާލާފައެވެ.

އެ އޮފިޝަލުން ހާމަކުރި ގޮތުގައި ސަރުކާރުން އެންމެ ބޮޑަށް އިސްކަންދެނީ ފައިމަގުގައި ހަނގުރާމަކުރާ ލަޝްކަރުތަކުގެ ކުޅަދާނަކަން އިތުރުކުރުމަށެވެ. އެގޮތުން އެންމެ ފުރަތަމަ އެ ލަޝްކަރުތަކަށް ބޭނުންވާ 2600 އުޅަނދު ގަތުމުގެ އިތުރަށް، މުސްތަގުބަލުގައި 1700 އުޅަނދު ގަންނާނެއެވެ. އަދި ވައިގެ ސިފައިންގެ ބޭނުމަށް ތަފާތު ހާލަތްތަކުގައި ބޭނުންކުރެވޭ 110 ހަނގުރާމަމަތީ މަތިންދާބޯޓު ގަތުމަށްވެސް ވަނީ ނިންމާފައެވެ.

ބައެއް މަސްދަރުތަކުން ޚަބަރުދޭ ގޮތުގައި ޗައިނާގެ ވައިގެ ސިފައިންނާއި، ކަނޑުގެ ސިފައިންގެ ލަޝްކަރުތައް ވަރުގަދަކުރަމުން ދާތީ އިންޑިޔާ ވަނީ ކަންބޮޑުވެފައެވެ. އިންޑިޔާގެ ލަޝްކަރުތައް ޒަމާނީކުރުމަށް ނިންމީ ޗައިނާއާއި އަދި އެހެން ވާދަވެރިންނާއި ކުރިމަތިލުމުގެ ގާބިލުކަން އިތުރުކުރުމަށެވެ.

ލަޝްކަރުތައް ޒަމާނީކުރުމަށް ކުރާ މަސައްކަތުގައި އެންމެ ބޮޑު ހޭދައެއް ކުރުމަށް ހަމަޖެހިފައިވަނީ ކަނޑުގެ އަސްކަރިއްޔާއަށެވެ. ކަނޑުގެ ސިފައިންގެ ބޭނުމަށް 200 އުޅަނދާއި، 500 މަތިންދާބޯޓާއި، ހަމަލާ ދިނުމަށް ބޭނުންކުރާ 24 ސަބްމެރީން ގަތުމަށް ވަނީ ހަމަޖެހިފައެވެ. މިހާރު އިންޑިޔާގެ ކަނޑުގެ ސިފައިން ބޭނުންކުރަނީ 132 އުޅަނދާއި، 220 މަތިންދާބޯޓާއި، 12 ސަބްމެރީނެވެ.

ބޭރުން ހަތިޔާރު ގަތުމުގެ އިތުރަށް އިންޑިޔާއިން ހިންގާ ބެލިސްޓިކް މިސައިލް ތަރައްގީ ކުރުމުގެ މަޝްރޫއު ވަރުގަދަކުރުމަށް ވެސް ވަނީ ނިންމާފައެވެ. މިގޮތުން، އިންޑިޔާގެ އަމިއްލަ އިންޓަ ކޮންޓިނެންޓަލް ބެލިސްޓިކް މިސައިލް އަގްނީ- 5 ވަރަށް އަވަހަށް ތައާރަފުކުރާނެއެވެ. މި މިސައިލަކީ ނިއުކުލިޔާ ހަތިޔާރާއެކު 5 ހާސް ކިލޯމީޓަރަށް ދަތުރުކުރުމުގެ ގާބިލުކަން ލިބިގެންވާ މިސައިލަކަށް ވާނެއެވެ. މިހާރު އިންޑިޔާގައި ހުރި އެންމެ ދުރު ރާސްތާއަށް ދަތުރުކުރާ މިސައިލަކީ އަގްނީ-4 އެވެ. އެ މިސައިލް ދަތުރުކުރަނީ 3500 ކިލޯމީޓަރަށެވެ.

މިވަތު ދުނިޔޭގައި އިންޓަ ކޮންޓިނެންޓަލް ބެލިސްޓިކް މިސައިލް ހުރީ އެމެރިކާއާއި، ރަޝިޔާއާއި، ޗައިނާއާއި ފްރާންސާއި، އުތުރު ކޮރެޔާ ފަދަ މަދު ގައުމެއްގައެވެ.