އެމެރިކާގެ ރައީސު ޑޮލާންޑް ޓްރަމްޕް، އެގައުމުގެ ސަރުކާރާ ޠާލިބާން ޖަމާޢަތާ ދެމެދު ދެކެވެމުން އައި ސުލްހައިގެ ވާހަތައް ކެންސަލްކުރެއްވުމުން ޠާލިބާން ޖަމާއަތުން އެކަމަށް ރައްދުދީފިއެވެ.
އެ ޖަމާއަތުން ބުނެފައިވަނީ ވާހަކަތައް ކެންސަލްކުރުމުގެ ގެއްލުން އެންމެބޮޑަށް ލިބޭނީ އެމެރިކާއަށް ކަމުގައެވެ.
"މިހާރު، އެމެރިކާގެ ރައީސު ޑޮނާލް ޓްރަމްޕް މަޝްވަރާތައް މެދުކަނޑާލެއްވުމުން، އެ ކަމުގެ ގެއްލުން އެމެރިކާ މީހުން ފިޔަވައި އެހެން ފަރާތަކަށް ނުވާނެ." އިއްޔެ ޠާލިބާން ޖަމާއަތުން ނެރުނު ބަޔާނެއްގައި ވެއެވެ.
ޠާލިބާން ޖަމާއަތުގެ ތަރުޖަމާނު ޒަބީޙުﷲ މުޖާހިދު ބުނި ގޮތުގައި ވާހަކަތައް ކެންސަލްކުރުމުން "އެމެރިކާ މީހުންގެ ފުރާނައާއި މުދާތައް އިތުރަށް ގެއްލުން" ފިޔަވައި އެހެން ކަމެއް ނުވާނެ ކަމުގައެވެ. އަދި އަވަހަށް ވިޔަސް، ލަހުން ވިޔަސް، ވާހަކަތައް އަލުން ފެށުމަށް އެމެރިކާއަށް މަޖުބޫރުވާނެ ކަމުގައެވެ.
"ފާއިތުވި 18 އަހަރު އަހަރުމެން ކުރި ބުރަ މަސައްކަތް ބޭރުމީހުންގެ އިސްތިއުމާރު ނިމި، އަފްޣާން މީހުން ބޭނުން ގޮތަކަށް ދިރިއުޅެން އިޚްތިޔާރުކުރުމުގެ މިނިވަންކަން ލިބެންދެން ކުރިއަށް ދާނެ." ޠާލިބާންގެ ބަޔާނުގައި ވެއެވެ.
އެމެރިކާގެ މަންދޫބުންނާއި ޠާލިބާން ޖަމާޢަތުގެ ލީޑަރުންނާ ދެމެދު ކުރިއަށް ދިޔަ މަޝްވަރާތައް ރައީސު ޓްރަމްޕް ވަނީ ކުއްލި ގޮތަކަށް ކެންސަލްކުރައްވާފައެވެ. ސަބަބެއް ކަމުގައި އޭނާ ވިދާޅުވީ، ޠާލިބާން ޖަމާޢަތުން ދިން ޖާނުން ފިދާވުމުގެ ޙަމަލާއެއްގައި އެމެރިކާ ސިފައިންގެ މީހަކާ އިތުރު 11 މީހަކު މަރުވުމެވެ.
ޠާލިބާން ޖަމާއަތުން ދިން ހަރުކަށި ރައްދަށް ފަހު އެމެރިކާގެ ޚާރިޖީ ވަޒީރު މައިކް ޕޮމްޕެއޯ ވިދާޅުވީ ޠާލިބާން ޖަމާއަތުގެ އަމަލުތައް ރަނގަޅުކޮށް، އެމީހުންގެ މައްޗަށް ލާޒިމުކުރާ ކަންތައް ކޮށްފިނަމަ، ސުލްހައިގެ ވާހަކަތައް އަލުން ފެށުމުގެ ފުރުސަތު އެބައޮތް ކަމުގައެވެ.
