އިންޑިޔާއިން ހަނދަށް ޖައްސަން މަސައްކަތްކުރި އުޅަނދު 'ވިކްރަމް ލޭންޑާ' ހަނދާ 2.1 ކިލޯމީޓަރަށް ގާތްވެފައި ވަނިކޮށް އެއާ ގުޅުން ކެނޑި، ހަނދަށް އުޅަނދެއް ފޮނުވި ހަތަރު ވަނަ ގައުމަށް ވާން އިންޑިޔާއިން ކުރި މަސައްކަތް ނާކާމިޔާބުވެއްޖެއެވެ. ވިކްރަމް ލޭންޑާ އަކީ އިންޑިޔާއިން ހަނދަށް ފޮނުވި، މީހަކު ނެތި ދަތުރުކުރާ 'ޗަންދްރަޔާން-2' ޖައްވީ އުޅަނދުން ހަނދަށް ތިރިކުރަން ފޮނުވި އުޅަނދެވެ.
"ލޭންޑާއާއި ބިމުގެ ކޮންޓްރޯލާ ދެމެދު މުވާސަލަތީ ގުޅުން ވަނީ ކެނޑިފައި. ޑޭޓާ ތަހުލީލުކުރަމުން ދަނީ." އިންޑިޔަން ސްޕޭސް ރިސާޗް އޮގަނައިޒޭޝަން (އައިއެސްއާރްއޯ) ގެ ޗެއާމަން ކައިލާސަވަޑިވޫ ސިވަން ވިދާޅުވިއެވެ. އެހެން ވިދާޅުވިއިރު އޭނާގެ މޫނުމަތިން ފެނުނީ މާޔޫސްކަމެވެ.
ރޭ އިންޑިޔާ ގަޑިން ދަންވަރު 1:55 ގައި (ރާއްޖޭ ގަޑިން ދަންވަރު 1:25 ގައި) ހަނދަށް ތިރިކުރަން މަސައްކަތްކުރި ވިކްރަމް ލޭންޑާއާ ގުޅުން ކެނޑުމަށް ފަހު އެ އުޅަނދު އަމިއްލަ ކޮންޓްރޯލުގައި ހަނދަށް ތިރިކުރީކަމެއް ނުވަތަ ކޮންޓްރޯލްނުވެ ވެއްޓުނީކަމެއް ސާފު ނުވެއެވެ.
ކާމިޔާބުކަމާއެކު ހަނދަށް ތިރިކުރެވުނުނަމަ އިންޑިޔާ ވީހީ ހަނދަށް އުޅަނދެއް ޖެއްސި ހަތަރުވަނަ ގައުމަށެވެ. މީގެ ކުރިން ކާމިޔާބުކަމާއެކު ހަނދަށް އުޅަނދު ޖައްސާފައި ވަނީ އެމެރިކާ، ރަޝިޔާ އަދި ޗައިނާއެވެ. ޗައިނާއިން ވަނީ މިއަހަރުގެ ކުރީކޮޅު ހަނދުގެ ދުނިޔެއަށް ނުފެންނަ ފަޅީއަށް އުޅަނދެއް ތިރިކޮށްފައެވެ. ހަނދަށް އުޅަނދެއް ފޮނުވަން މި އަހަރު އެޕްރީލް މަހު އިސްރާއީލުން ކުރި މަސައްކަތް ވަނީ ނާކާމިޔާބުވެފައެވެ.
އިންޑިޔާއިން މަސައްކަތްކުރީ ހަނދުގެ ދެކުނު ޕޯލްއަށް އުޅަނދު ތިރިކުރާށެވެ. އެކަން ކާމިޔާބުކުރެވުނުނަމަ އިންޑިޔާ ވީހީ އެ ސަރަހައްދަށް އުޅަނދެއް ތިރިކުރި ފުރަތަމަ ގައުމަށެވެ.
އިންޑިޔާއިން 141 މިލިއަން އެމެރިކާ ޑޮލަރު ޚަރަދުކޮށްގެން ފޮނުވާލި ޖައްވީ އުޅަނދު ޗަންދްރަޔާން-2 ޖައްވީ އުޅަނދު ހަނދާ ދިމާއަށް ދަތުރުފެށީ ފާއިތުވި ޖުލައި މަހުގެ 22 ވަނަ ދުވަހުއެވެ. އޮގަސްޓް މަހުގެ 20 ވަނަ ދުވަހު އެ އުޅަނދު ވަނީ ހަނދުގެ އޯބިޓަށް ވަދެފައެވެ. އަދި ހަނދަށް ތިރިކުރަން ތައްޔާރުކޮށްފައިވާ ވިކްރަމް ލޭންޑާ އުޅަނދު މި ސެޕްޓެންބަރު މަހުގެ 2 ވަނަ ދުވަހު ޖައްވީ އުޅަނދާ ވަކިވެ ހަނދަށް ތިރިކުރުމުގެ ދަތުރުފެށިއެވެ.
އިންޑިޔާގެ އެތައް މިލިއަން ބަޔަކަށް މާޔޫސްކަން ގެނުވި ނާކާމިޔާބީއަށް ފަހު ބޮޑުވަޒީރު ނަރެންދްރަ މޯދީ ވަނީ އައިއެސްއާރްއޯގެ ސައިންސުވެރިންނަށް ހިތްވަރުދެއްވާފައެވެ.
"(މިހާތަނަށް) ތިޔަ ބޭފުޅުން ތިޔަ ކުރެއްވި ކަމަކީ ކުޑަ ކާމިޔާބީއެއްނޫން." އެބޭފުޅުންނާ މުޚާޠަބުކުރައްވައި މޯދީ ވިދާޅުވިއެވެ.
"ހަޔާތުގައި އުސްގަނޑާއި، އަޑިގަނޑު އައިސް ގޮސް ވާނެ. ތިޔަ ބޭފުޅުންގެ ބުރަ މަސައްކަތް އަހަރުމެންނަށް ވަރަށް ގިނަ ފިލާވަޅު ދީފި. މުޅި ގައުމު ތިޔަ ބޭފުޅުންނާ މެދު ފަޚުރުވެރިވޭ." މޯދީ އިތުރަށް ވިދާޅުވިއެވެ.
ވިކްރަމް ލޭންޑާ ހަނދަށް ޖައްސަންކުރި މަސައްކަތް ކާމިޔާބު ނުވިނަމަވެސް ޖައްވީ އުޅަނދު ޗަންދްރަޔާން-2 ހަނދުގެ ވަށައިގެން ބުރު ޖަހައި މައުލޫމާތު އެއްކުރަމުން ދާނެއެވެ.
