ވެލާނާ އިންޓަރނޭޝަނަލް އެއަރޕޯޓުން ބޭންކޮކަށް ފުރި އާއޭޝިޔާގެ މަތިންދާ ބޯޓް އެފްޑީ 178، އަނބުރާ ޖެއްސީ ޓެކްނިކަލް މައްސަލައެއް ދިމާވެގެންކަމަށް މޯލްޑިވްސް އެއަރޕޯރޓްސް ކޮމްޕެނީ ލިމިޓެޑުން (އެމްއޭސީއެލް ) ބުނެފިއެވެ.
އެކުންފުނިން ކޮށްފައިވާ ޓްވީޓެއްގައި ބުނީ މިރޭ 20:18 ގައި ބެންކޮކަށް ދިއުމަށް ފުރި އެއަރ އޭޝިއާގެ މަތިން ދާބޯޓަށް ޓެކްނިކަލް މައްސަލައެއް ކުރިމަތިވެ، ރައްކާތެރި ކަމާއެކު އަނބުރާ ޖައްސާފައިވަނީ 20:41 ގައި ކަމަށެވެ. އެ ބޯޓުން 59 ފަސިންޖަރުންނާއި 7 ފަޅުވެރިން ދަތުކުރިއެވެ. އެއްވެސް މީހަކަށް ގެއްލުމެއް ލިބިފައެއް ނުވެއެވެ.
އެއަރ އޭޝިޔާގެ މަތިންދާ ބޯޓް ނައްޓާލިތަނުން ބޯޓުގައި އަލިފާން ރޯވެ، ބޯޓު ކުޑައިރުކޮޅެއްގެ ތެރޭގައި އަނބުރާ ޖައްސާނެ ވާހަކަ ބޯޓުގެ ކެޕްޓަން ބުނި ކަމަށް ފަސިންޖަރަކާ ހަވާލާދީ ބައެއް މީޑިއާ ތަކުން ބުނެއެވެ. އެބޯޓް ނައްޓާލި ތަނުން ބައެއް މީހުންނަށް ވަނީ ބޯޓްގައި އަލިފާން ރޯވެފައި ވަނިކޮށް ފެނިފައެވެ. ނަމަވެސް އަނބުރާ ޖެއްސިއިރު އަލިފާނެއް ފެންނާކަށް ނެތެވެ.
