މިސަރުކާރުން 206 ޤައިދީންނަށް މަޢާފްދީ ޖަލުން ދޫކޮށްލައި، ބޮޑެތި ކުށްތަކުގެ 79 ޤައިދީއަކަށް ޙުކުމް ލުއިކޮށްދީފައިވާކަމަށް ހޯމް މިނިސްޓަރ ޢިމްރާން ޢަބްދުﷲ ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ތުލުސްދޫ ދާއިރާގެ މެމްބަރ އިބްރާހިމް ނަސީމް ކުރެއްވި ސުވާލަށް ޖަވާބުދެއްވަމުންނެވެ. މެމްބަރ ނަސީމް މިނިސްޓަރ ޢިމްރާނާ ސުވާލުކުރެއްވީ މި ސަރުކާރު ވެރިކަމަށް އައި ފަހުން، ބޮޑެތި ކިތައް ކުށްވެރިން މިނިވަންކޮށްފައިވޭތޯ އެވެ.
ހޯމް މިނިސްޓަރ ޢިމްރާން ވިދާޅުވީ ރައްޔިތުންގެ މަޖިލިހުގެ އިންތިހާބާ ދިމާކޮށް އެއްވެސް ކުށްވެރިއަކަށް ލުޔެއް ނުވަތަ މާފެއް ވެސް ދީފައި ނުވާ ކަމަށެވެ. އަދި ބޮޑެތި އެއްވެސް ކުށަކަށް ރައީސުލްޖުމްހޫރިއްޔާ މާފުދެއްވާފައި ނުވާނެ ކަމަށެވެ. ނަމަވެސް ބޮޑެތި ކުށްވެރިންނަށް ޙުކުމް ލުއިކޮށްދެއްވައިފައިވާކަމަށް ފާހަގަ ކުރެއްވިއެވެ. ޙުކުމް ލުއިކޮށްދެއްވައިފައިވާ 79 ޤައިދީންގެ ތެރޭގައި މަސްތުވާތަކެތީގެ ވިޔަފާރިކުރުމުގެ ޙުކްމްތަންފީޒުކުރަމުންދިޔަ މީހުންނާއި ދީނުގެ ބައެއް ހައްދުތަކަށް އަރައިގަނެ، ރާ ބޮއެފައިވާ ކަމުގެ ޙުކުމް ތަންފީޒުކުރަމުން ދިޔަ މީހުންނާއި ވައްކަމުގެ ޙުކުމް ތަންފީޒު ކުރަމުން ދިޔަ މީހުންވެސް ހިމެނޭކަމަށް އިމްރާން ވިދާޅުވި އެވެ.މަޢާފްދެއްވާ އަދި ޙުކްމް ލުއިކޮށް ދެއްވައިފައި ވަނީ މަޢާފް ދިނުމާއި އަދަބު ލުއިކޮށްދިނުމުގެ ޤާނުނުގެ ދަށުން ރައީސުލްޖުމްހޫރިއްޔާއަށް ޤާނޫނުން ލިބިދޭ ބާރާއި އިޚްތިޔާރުގެ ދަށުން ކަމަށް ހޯމް މިނިސްޓަރ ފާހަގަ ކުރެއްވިއެވެ. ހޯމް މިނިސްޓަރ ވިދާޅުވީ ދުނިޔޭގެ އެހެން ގައުމުތަކުގައި ވެސް އަލަށް ރައީސަކު ވަޑައިގެން އެ ވަގުތަކަށް ރައްޔިތުންގެ ޙާލަތު ބެއްލެވުމަށް ފަހު، ޢަފޫއާންމެއް ދެއްވުމުގެ އުސޫލެއް ގެންގުޅެމުންދާކަމުގައެވެ. އަދި އެއީ ރާއްޖޭގައިވެސް އާކާދައެއްގެ ގޮތުގައި ކުރަމުން އަންނަ ކަމެއް ކަމަށް ފާހަގަ ކުރެއްވިއެވެ.
މަސްތުވާ ތަކެތީގެ ވިޔަފާރީގެ ޙުކުމް ލުއިކޮށްދެއްވައިވާ މީހުންގެ ޙުކުމް ލުއި ކޮށްދެއްވުމުގައި ޤާނޫނަށް އައިސްފައިވާ ބަދަލަށް ވަރަށް ބޮޑަށް ރިޢާޔަތް ކުރައްވައިފައި ވާކަމަށް މިނިސްޓަރ ޢިމްރާން ފާހަގަ ކުރެއްވިއެވެ. ޤާނޫނަށް ގެނެވިފައިވާ ބަދަލަށް ބަލާއިރު 14 ގްރާމަށް ވުރެ މަދުން ހުރިކަމުގައިވާނަމަ މަސްތުވާ ތަކެތީގެ ވިޔަފާރި ކުރުމުގެ ކުށުގެ ތެރެއަކަށް ނުދާނެއެވެ. ނަމަވެސް އެއްގްރާމް ހަމަނުވާ ވަރުގެ މަސްތުވާތަކެތި ގެންގުޅެގެންވެސް 25 އަހަރުގެ ޖަލު ޙުކުމް ތަންފީޒު ކުރަމުންދާ މީހުން ތިބިކަން މިނިސްޓަރ ފާހަގަ ކުރެއްވިއެވެ. މަސްތުވާތެކެތީގެ ވިޔަފާރީގެ ކުށުގެ ހުކުމްލުއި ކޮށްދެއްވައިފައި ވަނީ އެކަންކަމަށް ރިޢާޔަތް ކުރައްވައިގެންކަމަށް މިނިސްޓަރ ފާހަގަ ކުރެއްވިއެވެ. އަދި 14 ގްރާމަށްވުރެ މަދުން މަސްތުވާ ތެކެތި ގެންގުޅެގެން ޙުކުމް ތަންފީޒު ކުރަންޖެހިފައިވާ ފަރާތްތަކުގެ މައްސަލަތައް ބައްލަވަމުން ގެންދަވާކަމަށް ވިދާޅުވިއެވެ.
ޢިމްރާން ވިދާޅުވީ ޖަލުތަކުގެ ނިޒާމް ބައްޓަން ކުރައްވަމުން ގެންދަވަނީ ޖަލުތަކުގައި ބަންދުކޮށްފައި ތިބޭ މީހުންނަށް ތަފާތު ރިހިބިލިޓޭޝަން ޕްރޮގްރާމްތައް ހިންގައިގެން ކުށްތަކުން ސަލާމަތްކުރުމަށްކަމަށެވެ. އެގޮތުން ޔޫއެން އޯޑީސީ އާ ގުޅިގެން ފެށުމަށް ހަމަޖައްސަވައިފައިވާ ރިހެބިލިޓޭޝަން ތަމްރީނު ތަކުން ބޮޑެތި ކުށްތައް ކޮށްފައިވާ މީހުން ޖަލުން ބޭރުކުރެވޭނީ މުޖުތަމަޢަށް ފައިދާ ހުރި ބައެއްގެ ގޮތުގައި ކަމަށް މިނިސްޓަރ ފާހަގަ ކުރެއްވިއެވެ.
މުޖުތަމައަށް ފައިދާ ހުރި ބައެއްގެ ގޮތުގައި އެމީހުން (ގައިދީން) ތަމްރީނުކޮށްގެން ނޫނިއްޔާ ދެން ޖަލުން ބޭރެއް ނުކުރެވޭނެ. މިއަސާސްގެ މައްޗަށް އަޅުގަޅުމެން މަސައްކަތްކުރަމުން މިދަނީ " މިނިސްޓަރ ޢިމްރާން ވިދާޅުވިއެވެ.
