ޕީޕީއެމްގެ ހިންގުން އެޕާޓީގެ މުސްތަޝާރު ހަވާލުކުރުމަށް ސިވިލް ކޯޓުން ކުރި ހުކުމުގެ އިސްތިއުނާފުގެ އަޑުއެހުންތައް ހައިކޯޓުން މިއަދު ނިންމާލައިފި އެވެ.
މިމައްސަލަ ހައިކޯޓުގައި އިސްތިއުނާފުކުރީ ސ. ހުޅުދޫ ފެންފިޔާޒު ވިލާ، އައްބާސް ވާފިރެވެ. އޭނާއަކީ މިމައްސަލައާ ގުޅުންހުރި މީހެއްނޫނެނެވެ. މިމައްސަލަ އިސްތިއުނާފުކުރުމަށް އޭނާ ހުށަހެޅީ މައްސަލަ ރައީސް މައުމޫނުގެ ފަރާތުން މައްސަލަ އިސްތިއުނާފުކުރަން ތައްޔާރުވަމުންދަނިކޮށެވެ.
އޭނާ ހުށަހެޅި މައްސަލައިގެތެރއަށް ރައީސް މައުމޫންވަނީ ތަދައްޚުލުވެވަޑައިގެންފައެވެ. މިއަދު ބޭއްވި އަޑުއެހުމުގައި ރައީސް މައުމޫނު އަބްދުލްގައްޔޫމުގެ ފަރާތުން ވާހަކަފުޅުދެއްކެވީ ދަރިކަނބަލުން ޔުމްނާ މައުމޫނެވެ.
"ގާނޫނުއަސާސީގެ ދަށުން އެމީހެއްގެ މައްޗަށް ގާނޫނު ހިންގުމުގައި ކޮންމެ މީހަކީވެސް ހަމަހަމަ ވެގެންވާ މީހެއްކަމާއި، ގާނޫނުން ލިބިދޭ މަންފާތައް ހަމަހަމަ ކަމާއެކު ލިބުމަކީ ހަމަ ކޮންމެ މީހެއްގެ ހައްގަކަށް ވާތީ ހަމަހަމަ ކަމާ އިންސާފުވެރިކަމާއެކު މި ދެ މައްސަލަ ނިންމަވާދެއްވުމަށް ރައީސް މައުމޫނު އެދިވަޑައިގަންނަވާ" ރައީސް މައުމޫނުގެފަރާތުން ފާހަކަފުޅުދައްކަވަމުން ޔުމްނާ ވިދާޅުވި އެވެ.
މިމައްސަލާގައި އިތުރުކަމެއް ސާފުކުރަން ނުޖެހޭނަމަ ދެން އޮންނާނީ ޙުކުމްކުރުންކަމަށް މިއަދުގެ ޝަރިއަތުންވަނީ ހާމަކުރައްވާފައެވެ.
