ކޮރަޕްޝަނާއި މަނީ ލޯންޑަރިންގގެ ތުހުމަތުގައި އިންޑިޔާގެ ކުރީގެ ފިނޭންސް މިނިސްޓަރު ޕަލަނިއައްޕަން ޗިދަމްބަރަމް ހައްޔަރުކޮށްފިއެވެ. އޭނާ ހައްޔަރުކޮށްފައި ވަނީ ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި) ގެ އޮފިސަރުން ނިއުދިއްލީގައި ހުންނަ އޭނާގެ ގެކޮޅުގެ ފާރުމަތިން އަރައިގެން ވަނުމަށް ފަހުއެވެ.
އާއްމުވެފައިވާ ބައެއް ވީޑިއޯތަކުން ފެންނަ ގޮތުގައި އޭނާއަށް ތާއީދުކުރާ މީހުން ވަނީ އޭނާ ހައްޔަރުކޮށްގެން ގެންދިޔަ ކާރަށް ހުރަސްއަޅައި، ހައްޔަރުކޮށް ގެންދިޔަ ނުދޭން މަސައްކަތްކޮށްފައެވެ.
ރޭ ޗިދަމްބަރަމް ހައްޔަރުކުރިއިރު، ފާއިތުވި 24 ގަޑިއިރު ސީބީއައި އޮފިސަރުން ގެންދިޔައީ އޭނާ ވީ ތަނެއް ނޭނގިގެން ހޯދަމުންނެވެ. އަދި އޭނާ އިންޑިޔާއިން ބޭރަށް ފުރުއްވަފާނެތީ އޭނާއަށް ހުރަސް އެޅުމަށް ހުރިހާ އެއާޕޯޓުތަކަށް ސީބީއައިން އޮތީ އަންގާފައެވެ.
ރޭ ނިއުދިއްލީގައި ހުންނަ ކޮންގްރެސް ޕާޓީގެ އޮފީހުގައި ކުއްލި ގޮތަކަށް ބޭއްވި ނިއުސް ކޮންފަރެންސަކުން އޭނާ ފެނިގެން ސީބީއައިން އޭނާ ހައްޔަރުކުރަން މަސްކަތްކުރިއެވެ. އެހެން ނަމަވެސް ފަހުން އޭނާ ހައްޔަރުކޮށްފައި ވަނީ ނިއުދިއްލީގެ ޖޯރް ބާޣު ގައި ހުންނަ އޭނާގެ ގެކޮޅުންނެވެ.
އޭނާގެ މައްޗަށް ތުހުމަތު ކުރެވެނީ ފިނޭންސް މިނިސްޓަރު ކަމުގައި ހުންނެވި އިރު ރިޝްވަތު ހޯއްދަވައިގެން، ބޭރުގެ އިންވެސްޓަރުންނަށް އިންޑިޔާގައި އިންވެސްޓުކުރުމުގެ ހުއްދަދެއްވުމުގެ ކުށެގައެވެ.
ޕީ. ޗިދަމްބަރަމް ވަނީ އޭނާގެ މައްޗަށް ކުރެވޭ ތުހުމަތުތަކަށް އިންކާރުކުރައްވާފައެވެ. އޭނާ ވިދާޅުވީ ބޮޑުވަޒީރު މޯދީގެ ސަރުކާރުން އޭނާގެ މައްޗަށް ކުރަން މަސައްކަތްކުރަނީ ސިޔާސީ ދައުވާއެއް ކަމުގައެވެ.
އުމުރުފުޅުން 73 އަހަރުގެ ޗިދަމްބަރަމް ރޭ ހޭދަކުރެއްވީ ސީބީއައިގެ ބަންދުގައެވެ. މިއަދު ވަގުތެއްގައި އޭނާ ހާޒިކޮށް އޭނާގެ ބަންދުގެ މުއްދަތު އިތުރުކުރުމަށް ހުށަހަޅަން ސީބީއައިން ވަނީ ނިންމާފައެވެ.
ކޮންގްރެސް ޕާޓީގެ ވެރިކަމުގައި 2004 އިން 2008 އަށް އަދި 2012 އިން 2014 އަށް ފިނޭންސް މިނިސްޓަރުކަން ކުރައްވާފައިވާ ޗިދަމްބަރަމް ހައްޔަރުކުރުން ހުއްޓުވަމަށް އޭނާ އިއްޔެ ދިއްލީގެ ހައިކޯޓަށް މައްސަލަ ހުށަހެޅުއްވިއެވެ. އެހެން ނަމަވެސް ކޯޓުން ވަނީ އެ މައްސަލަ ބޭރުކޮށްލައިފައެވެ. ދެން، ޗިދަމްބަރަމް ވަނީ އެ މައްސަލަ ސުޕްރީމް ކޯޓަށް މައްސަލަ ހުށަހަޅުއްވާފައެވެ. ސުޕްރީމް ކޯޓުގައި މާދަމާ (ހުކުރު ދުވަހު) މައްސަލަ ބެލުމަށް ވަނީ ތާވަލުކޮށްފައެވެ.
ޕީ. ޗިދަމްބަރަމްގެ ދަރިކަލުން ކާރްތީ ޗިދަމްބަރަމްވެސް ވަނީ މަނީ ލޯންޑަރިންގގެ މައްސަލައިގައި ފާއިތުވި އަހަރު ފެބްރުއަރީ މަހު ހައްޔަރު ކޮށްފައެވެ.
އިދކޮޅު ކޮންގްރެސް ޕާޓީގެ އިސް ބޭފުޅެއް ކަމުގައިވާ ޗިދަމްބަރަމް އަކީ ޓެމިލްނާޑޫގެ ސިވާގަންގާއަށް އުފަން ބޭފުޅެކެވެ. އޭނާ ވަނީ 1984 އިން 1999 އަށް އަދި 2004 އިން 2014 އަށް ލޯކް ސަބާ ގެ މެންބަރުކަން ކުރައްވާފައެވެ. އަދި އޭނާއަކީ 2016 އިން ފެށިގެން ރާޖިޔާ ސަބާގެ މެންބަރެކެވެ. އޭނާ ވަނީ 2008 އިން 2012 އަށް އިންޑިޔާގެ ހޯމް މިނިސްޓަރުކަން ވެސް ކުރައްވާފައެވެ.
