އިންޑިޔާގެ ގާނޫނު އަސާސީގެ 370 ވަނަ މާއްދާ އުވާލައި، ކަޝްމީރުގެ އިންޑިޔާ ފަޅިއަށް ދީފައި އޮތް އިމްތިޔާޒުތައް ނިގުޅައިގަތުމަކީ ނަޒީ ފިކުރުން ހިތްވަރު ލިބިގެން ކުރި ކަމެއް ކަމުގައި ޕާކިސްތާނުގެ ބޮޑުވަޒީރު އިމްރާން ޚާން ވިދާޅުވެއްޖެއެވެ.
"ކާފިއު ހިންގުމާއި، ބާރުގެ ބޭނުންކުރުމާއި، އައިއޯކޭ (އިންޑިޔަން އޮކިޕައިޑް ކަޝްމީރު – މިއީ ކަޝްމީރުގެ އިންޑިޔާ ފަޅިއަށް ޕާސިތާނުގައި ކިޔާ ނަމެވެ.) ގައި ނަސްލު ސާފުކުރަށް ތައްޔާރުވުމުގެ ހާދިސާތައް ނިއުޅެމުން ދަނީ ނަޒީންގެ ފިކުރުން ހިތްވަރު ލިބިފައިވާ އާރްއެސްސްގެ ފިކުރާ މުޅިން އެއްގޮތަށް." ކަޝްމީރުގެ ހާލަތާ މެދު ނުރުހުން ފާޅުކުރައްވައި އިމްރާން ޚާން ކުރެއްވި ޓުވީޓެއްގައި ވެއެވެ.
"ނާޒީންގެ އާރްޔާން ދަރިކޮޅު މަތިވެރިކަމުގެ ފިކުރުފަދައިން، އާރްއެސްއެސް ހިންދޫން މަތިވެރިކަމުގެ ފިކުރު އައިއޯކޭގައި ނުހުއްޓިދާނެތީ އަހަރެން ކަންބޮޑުވޭ. އިމްރާން ޚާން ވިދާޅުވެފައި ވެއެވެ.
1947 ވަނަ އަހަރު 'އިނގިރޭސި އިންޑިޔާ' އިނގިރޭސިންގެ އަތްދަށުން މިނިވަންވެ އިންޑިޔާއާއި ޕާކިސްތާނު އުފެދުމާއެކު ކަޝްމީރުގެ މިލްކުވެރިކަމާމެދު ދެ ގައުމުގެ ދެމެދުގައި އަރައިރުން ފެށުނެވެ. އަދި މި މައްސަލައިގައި ދެ ގައުމުން ވަނީ ދެ ހަނގުރާމަވެސް ކޮށްފައެވެ.
"މަސައްކަތްކުރެވެމުން މިދަނީ ނަސްލު ސާފުކުރުން ބޭނުންކޮށްގެން ކަޝްމީރުގެ އާބާދީ އެހެންގޮތަކަށް ބަދަލުކޮށްލަން." ޕާކިސްތާނުގެ ބޮޑުވަޒީރުގެ ޓުވީޓުގައި ވެއެވެ.
ކަޝްމީރު އިންޑިޔާގެ ދަށުގައި ބޭއްވުމުގެ ބޭނުމުގައި، އިންޑިޔާގެ ގާނޫނު އަސާސީގެ ވަކި މާއްދާއަކުން ކަޝްމީރަށް ޚާއްސަ އިމްތިޔާޒުތަކެއް ދިނެވެ. 70 އަހަރަށް ފަހު ގާނޫނު އަސާސީގެ އެ މާއްދާ، 370 ވަނަ މާއްދާ އުވާލަން ނިންމުމާއެކު ޕާކިސްތާނުނ ވަނީ އެކަމުގެ ރައްދުގައި އިންޑިޔާގެ ސަފީރު ފޮނުވާލައި، ސަމްޖޯތާ އެކްސްޕްރެސް ރޭލު ދަތުރުތައް ހުއްޓާލައި، ވިޔަފާރީގެ ގުޅުން ކަނޑާލާފައެވެ.
މިހާރު އިންޑިޔާއިން 'ޖައްމޫ އެންޑް ކަޝްމީރު' ގެ ނަމުގައި ހަދާފައިވާ ސްޓޭޓު އުވާލައި އެ ސަރަހައްދުގައި ދެ ޔުނިއަން ޓެރިޓަރީ ހަދަން ވަނީ ނިންމާފައެވެ. އަންނަ އޮކްޓޯބަރު މަހުގެ 31 ދުވަހު ޖައްމޫ އެންޑް ކަޝްމީރާއި ލަދާޚް ޔުނިއަން ޓެރިޓަރީ ވުޖޫދަށް އަންނާނެއެވެ. ބޭނުމަކީ އެސަރަހައްދުގައި މައި ސަރުކާރުގެ ބާރު ގަދަކުރުމެވެ. އަދި ކަޝްމީރުގެ މީހުންނަށް ކުރިން ލިބިފައި ހުރި އިމްތިޔާޒުތައް ނިގުޅައިގަތުމެވެ.
"ސުވާލަކީ ދުނިޔެ ބަލަހައްޓައިގެން އޮވެ އެމީހުން ރުއްސާނީ ހެއްޔެވެ؟ މިއުނިކްގައި ހިޓްލަރާ މެދު ކަންކުރި ގޮތަށެވެ." އިމްރާން ވިދާޅުވެފައި ވެއެވެ.
