އިންޑިޔާގެ މުމްބާއީން ފުރައިން ދަތުރުކުރަމުން ދިޔަ ރޭލެއް ފެންބޮޑުވެފައިވާ ސަރަހައްދަކަށް ހުއްޓި ހާލުގައި ޖެހުމުން އެރޭލުން ދަތުރުކުރި 700 އަށްވެރު ގިނަ ދަތުރުވެރިން ސަލާމަތްކޮށްފިއެވެ.
މުމްބާއީ ދެކުނުން 300 ކިލޯމީޓަރު ދުރުގައި އޮންނަ ކޮލްހާޕޫރަށް ދަތުރުކުރަމުން ދިޔަ މަހާލަކްޝަމީ އެކްސްޕްރެސް ހުއްޓުނީ ބޯކޮށް ވާރޭވެހި ރޭލު ދަގަނޑު ފެނު އަޑިޔަށް ދިއުމުގެ ސަބަބުންނެވެ. އޭރު ރޭލަށް ދަތުރުކުރެވުނީ މުމްބާއީއާ 90 ކިލޯމީޓަރު ދުރަށެވެ.
" އެކްސްޕްރެސްއިން ދަތުރުކުރި ހުރިހާ ދަތުރުވެރިން ވަނީ ރައްކާތެރިކަމާއެކު ސަލާމަތްކުރެވިފައި. އެމީހުންނަށް ކާބޯތަކެއްޗާ ބޭސްފަރުވާ ވަނީ ފޯރުކޮށްދެވިފައި. ރޭލުގައި މާބަނޑު 9 މީހުން ތިބި. އެ އެންމެން ވަނީ ރައްކާތެރިކަމާއެކު ސަލާމަތްކުރެވިފައި. އެކަކު ވަނީ ޗެކަޕް ހެދުމަށް ހޮސްޕިޓަލުގައި އެނދުމަތި ކުރެވިފައި." ތާނޭ ޑިސްޓްރިކްޓްގެ ކަލެކްޓާ ރާޖޭޝް ނަރްވޭކަރު ވިދާޅުވިއެވެ.
ހުކުރުދުވަހުގެ ރޭ މުމްބާއީން ފުރި ރޭލު ހުއްޓުނީ އެރޭ ދަންވަރު 3 ޖެހިއިރުއެވެ. ނޭޝަނަލް ޑިޒާސްޓާ ރެސްޕޮންސް ފޯސް (އެންޑީއާރްއެފް) އާއި އިންޑިޔާގެ ކަނޑުގެ ސިފައިން ގުޅިގެން މީހުން ސަލަމާތްކުރުމުގެ މަސައްކަތް ފަށައި ފުރަތަމަ 150 ދަތުރުވެރިން ސަލާމަތްކުރެވުނީ ރޭލު ހުއްޓުނުތާ 9 ގަޑިއިރު ފަހުންނެވެ. އެންޑީއާރްއެފުން ބުނި ގޮތުގައި މީހުން ސަލާމަތްކުރުމުގެ މަސައްކަތް ވަނީ 3 ގަޑިއިރު ތެރޭގައި ނިންމާލާފައެވެ.
މީހުން ސަލާމަތްކުރުމުގެ މަސައްކަތަށް ފަހު، އިންޑިޔާގެ ހޯމް މިނިސްޓަރު އަމިތު ޝާހު ކުރެއްވި ޓުވީޓެއްގައި ވިދާޅުވެފައި ވަނީ ހުރިހާ ދަތުރުވެރިން ސަލާމަތުން ރައްކާތެރި ހިސާބުތަކަށް ގެންދެވިފައިވާ ކަމުގައެވެ.
އެންއާރްޑީއެފުން ދިޔަ 45 މެންބަރުންގެ ތިން ޓީމާއި، ކަނޑުގެ ސިފައިންގެ 3 ޓީމުގެ އިތުރަށް، ވައިގެ ސިފައިންގެ ދެ ހެލިކޮޕްޓަރު ވަނީ މީހުން ސަލާމަތްކުރުމުގައި ހަރަކާތްތެރިވެފައެވެ.
މަހާރާޝްޓްރާ ސްޓޭޓަށް ބޯކޮށް ވާރޭ ވެހުމުގެ ސަބަބުން ގިނަ އަދަދެއްގެ ރޭލުތަކުގެ ދަތުރުތައް ހުއްޓިފައިވާއިރު، ހުކުރު ދުވަހު މުމްބާއީ އެއާޕޯޓުން ފުރަން އޮތް ބައެއް ފްލައިޓުތައްވެސް ވަނީ ކެންސަލްވެފައެވެ. އަދި މުމްބާއީއަށް އައި ބައެއް ފްލައިޓުތައް އެހެން ތަންތަނަށް ފޮނުވާފައި ވެސް ވެއެވެ.
