އެމެރިކާގެ ރައީސު ޑޮނާލްޑް ޓްރަމްޕް ވައިޓް ހައުސްގައި ޕާކިސްތާނުގެ ބޮޑުވަޒީރު އިމްރާން ޚާނާ ބައްދަލުކުރައްވައިފިއެވެ.
އިއްޔެ މެންދުރު 12 ޖެހިއިރު (ރާއްޖޭ ގަޑިން ރޭ 9 ޖެހިއިރު) ވައިޓް ހައުސްގެ އޯވަލް އޮފީހުގައި އޮތް މި ބައްދަލުވުމަކީ ދެ ބޭފުޅުންގެ މެދުގައި ބޭއްވުނު ފުރަތަމަ ބައްދަލުވުމެވެ. މި ބައްދަލުވުމަކީ އަފްޣާނިސްތާނު މައްސަލައިގެ ސަބަބުން ދެ ގައުމުގެ ދެމެދުގައި ގޯސްވެފައި އޮތް ގުޅުން ރަނގަޅުކުރުމަށް އެޅޭ ފިޔަވަޅެއް ކަމުގައި ބެލެވެއެވެ.
މި ބައްދަލުވުމުގައި ރައީސު ޓްރަމްޕް ވަނީ ކަޝްމީރުގެ މައްސަލައިގައި މެދުވެރިއަކަށް ވެވަޑައިގަތުމަށް ބޮޑުވަޒީރު މޯދީ އޭނާގެ ކިބައިން އެދިވަޑައިގަތް ކަމަށް ވިދާޅުވެފައެވެ. އެހެންނަމަވެސް، އިންޑިޔާއިން ވަނީ އެކަން ދޮގުކޮށްފައެވެ.
"އޭނާ (މޯދީ) ހަގީގަތުގައި ވެސް ވިދާޅުވި 'މެދުވެރިއަކަށް ނުވަތަ މައްސަލަ ނިންމާ މީހަކަށް ވެވިދާނެތޯ؟ އަހަރެން ދެންނެވިން 'ކޮންތަނެއްގައިތޯ؟ އޭނާ ވިދާޅުވި 'ކަޝްމީރުގައި". ވައިޓް ހައުސްގައި ވާހަކަފުޅު ދައްކަވަމުން ޓްރަމްޕް ވިދާޅުވިއެވެ.
"އަހަރެންނަށް އެހީވެވޭ ކަމުގައި ވަނީ ނަމަ، މެދުވެރިއަކަށް ވާން އަހަރެން ބޭނުން." ޓްރަމްޕް ވިދާޅުވިއެވެ. ރައީސު ޓްރަމްޕްގެ މި ވާހަކަފުޅަކީ އެމެރިކާގެ ސިޔާސަތަށް ބަދަލު އައިކަން ހާމަވެގެން ދިޔަ ވާހަކަފުޅެކެވެ. ކުރިން ކަޝްމީރުގެ މައްސަލައިގައި އެމެރިކާގެ ސިޔާސަތަކީ އެ މައްސަލަ ހައްލުކުރަން ދެ ގައުމަށް ދޫކޮށްލުމެވެ.
އިންޑިޔާއިން ވަނީ ރައީސު ޓްރަމްޕް މި ވާހަކަފުޅު ދޮގުކޮށްފައެވެ. އިންޑިޔާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާނު ރަވީޝް ކުމާރު ކުރެއްވި ޓުވީޓެއްގައި އޭނާ ވަނީ ޓްރަމްޕްގެ މިވާހަކަފުޅަށް ރައްދު ދެއްވާފައެވެ.
"ބޮޑުވަޒީރު މޯދީގެ ފަރާތްޕުޅުން އެފަދަ ހުށަހެޅުއްވުމެއް ރައީސު ޓްރަމްޕަށް ހުށަހަޅުއްވާފައި ނުވޭ. އަބަދުވެސް އިންޑިޔާ ހިފަހައްޓަމުން އައި އުސޫލަކީ ޕާކިސްތާނާއެކު ހުރި މައްސަލަތައް ހައްލުކުރަން ޖެހޭނީ ދެ ގައުމު ވާހަކަދައްކަގެންކަން." ރަވީޝް ކުމާރުގެ ޓުވީޓުގައި ވެއެވެ.
އަފްޣާނިސްތާނުގެ މައްސަލައިގައި ރައީސު ޓްރަމްޕް ވިދާޅުވީ އަފްޣާނިސްތާނުން އެމެރިކާ ސިފައިން ފޭބުމުގެ މަސައްކަތް ޕާކީސްތާނާ ގުޅިގެން ކުރަމުންދާ ކަމުގައެވެ. އޭނާ ވިދާޅުވީ އެ ސަރަހައްދުގެ "ޕޮލިސްމަނަށް" ވުމަށް އެމެރިކާ ބޭނުންނުވާ ކަމުގައެވެ.
ބޮޑުވަޒީރު އިމްރާން ޚާނާއެކު ބޭއްވެވި ބައްދަލުވުމުގައި ރައީސު ޓްރަމްޕް ވަނީ ދެ ގައުމުގެ ދެމުދުގައި ކުރެވޭ ވިޔަފާރި އިތުރުކުރުމަށާއި، އެމެރިކާއިން ޕާކިސްތާނުގައި އިންވެސްޓް ކުރުމަށްވެސް ޝައުގުވެރިކަން ފާޅުކުރައްވާފައެވެ.
